
د ژیانا مە مروڤان دا، بیروباوەران رۆلەکێ گرنگ هەیە ژ بۆ دروست بوونا کەسایەتی و شێوازێ هزرکرنا مروڤی. وەک یا دیار هەر کەسەک ل دویڤ ژینگەها خۆ و ئەو جهێ تێدا مەزن دبیت ول دویڤ کولتوور و ئەزموونێن ژیانا خۆ، کۆمەکا بیروباوەران وەردگریت؛ ئەڤە ژی دبیتە ئەگەر کو کارتێکرنێ ل سەر شێوازێ هزرکرنێ و بڕیاردانێ بکەت. ئەم دشیێن بێژین هێزەکە دشێت مێشکێ مروڤی بگریت یان ڤەکەت.
مێشکێ گرتی ئەو شێوازێ هزرکرنێ یە کو مروڤ ب تنێ پشتبەستنێ ب بیروباوەرێن خۆ دکەت، ئانکو د قەبوولکرنا بۆچوونێن جودا جودا دا یێ لاوازە و گەلەک جاران ژی ئەڤە پەیدا دبیت دەمێ ترس ژ گهۆڕینێ هەبیت یان ژی پەروەردەیەکا سنوردارکری هەبیت.. بۆ نموونە د هندەک کۆمەڵگەهان دا دێ بینین کوهێشتا ئەو هزر يا هەیى دەمێ دبێژن (ئافرەت نەشێت د بوارێن زانستی و کارگێری و سیاسی دا د سەرکەفتی بن)، ئەڤ چەندە ژی وەدکەت کو ئەڤ هزرە ببیتە ئاستەنگەک ژ بۆ پێشکەفتنا ئافرەتان و دەرفەتێن وان.. یان ژی قوتابیيەک ئێک شێوازێ فێربوونێ بکاربینیت و دهەمان دەم دا گەلەک شێواز یێن هەین، ئانکو ئهو نەشێت رێکێن نوی قەبویل بکەت، ئەڤە ژی دێ وەکەت کو بێ بەهر بیت ژ پێشکەفتنێ.
د بەرامبەر دا مێشکێ ڤەکری دشێت هزرێن نوی و هزرکرنا رەخنەيی و شێوازێ هزرکرنەک جودا بکەت و گوهداريیێ بکەت، لەوما ئەگەر هزرەکا نوی هەبیت نە دێ رەت کەت؛ بەلکو دێ ب بەڵگە و لوژیک هەلسەنگاندنێ بۆ کەت.. بۆ نموونە ئەگەر د زانکۆیێ دا مامۆستا بابەتەکێ نوی بێژیت و دەمێ قوتابی گوهداريیێ دکەت؛ دشێت بۆچوونێن خۆ یێن جودا جودا پێشکێش بکەت و پرسیاران بکەت. هەر وەسا دێ بیتە ئەگەر کو پتر ئاستێ خۆ بلند بکەت و فێری داهێنانێ ببیت.
هەروەسا دێ بینین، کو کارتێکرنا بیروباوەران د ژیانا مە یا رۆژانە دا ژی یا بەرچاڤە،.ب نموونە دەمێ کەسەکی ئەو باوەری هەبیت کو شکەستن دووماهیکە ئەگەر د پرۆژەیەکی دا سەرنەکەفت؛ دێ شێت ب ساناهی دەست ژ پرۆژهيێ خۆ بەردەت بەلێ د بەرامبەر دا کەسێ مێشک ڤەکری شکەستنێ وەک ئامرازەک بۆ فێربونێ دبینیت و دهەلسەنگینیت و هەول ژ بۆ هندێ ددەت ب شێوازەکێ باشتر هزر بکەت. سەرەڕای ڤێ چەندێ ژی جوداهیيا بیروباوەران دشێت کارتێکرنەکا مەزن ل سەر پاشەرۆژ و سەرکەفتنا مروڤی بکەت.
هەروەسا سۆشیال میدیا و تەکنولوجیا ژی کارتێکرنەکا مەزن ل سەر دروست بوونا بیروباوەران هەیە. بۆ نموونە ئەگەر کەسەک د تورێن چڤاکی داب تنێ ل دویڤ وان پێزانینا بچیت یێن ل گەل بیروباوەرێن وی دگونجن، ئەڤ چەندە دێ بیتە رێگر ژبو دیتنا راستیێ بەلێ لێگەریان و دویڤچون بو پێزانین جودا جودا دێ بیتە ئەگەر کو مێشک بیتە مێشکەک ڤەکری …
ژبەرهندێ بیروباوەردشێن ببنە هێزەکا پێشکەفتی بو مروڤی یان ژی بیتە بەربەستەک د گەشەکرنا مێشکێ مروڤی دا.. مێشکی ڤەکری؛ رامان ژێ ئەو نینە کو قەبوولکرنا هەمی هزران بەلکو رامان ئەوە گوهدان و ڤەکۆلین و هەلسەنگاندنا وان ب شێوەیەکێ هوشیار، ئانکو پێدڤیيە هەردەم مروڤ یێ ئامادە بیت و پێداچوونێ د بیروباوەرێن خۆ دا بکەت داکو پتر پێشکەفتنێ ل دەڤ خۆ پەیدا بکەت.
#خوزیك دۆسكی




