گوتار

مرۆڤ کەنگی دبیتە مرۆڤ؟

گەلەک جارا دەما مرۆڤ بتنێ دمینیت و ب تایبەت ئەگەر ل بنارا چیایەکێ یان لبن سیبەرا دار بەڕۆیەکێ یان ل سەر کانیەکا زەڵاڵ یان ل کنارێ رویبارەکێ دروینت و گەلەک هزر دمێشکێ مرۆڤی دا دروست بن و دبنە پسیار و بوڤی کاودانی و بارو دوخێ ئەڤرو من بابەتەک گرنگ و هەژی دیت چەند رێزەکا بێخمە سەر پەرەکێ سپی بو خواندەڤانێن هێژا. مرۆڤ کەنگی دبیتە مرۆڤ؟ ئێکە ژوان پرسا ژرویێ فەلسەفی،رەوشتی، جڤاکی ومرۆڤی ڤە رامانێن کویرو دویر هەنە . پسیارەکە مرۆڤی نەچار دکەت لخۆ بنێریت و دگەل خو باخڤیت و هزر دهەبون وسەرەدەری وشێوازێ سەرەدەریێن خو یێن ڕۆژانە دگەل دەردۆرێن خوبکەت .
ئەرێ مرۆڤ دەما ژدایک دبیت بەسە یان دبیتە بەرسڤ بو ڤێ پسیارێ.
ئەرێ جەستە،زمان .بیرکرن،هوش تێرا وێ چەندێ هەنە بێژین ئەڤە مرۆڤەکێ تەمامە، یان ژی مرۆڤ بون تشتەکێ دی یێ کویر ترە کو پێدڤییا ب پەروەردێ ،ووژدانێ ،رەوشتی بەرپرسیاریێ یە؟
ئەوا ڕاست بیت، مرۆڤ بوون تنێ ناسنامەیەکا جان دارەکێ نیینە، بەلکی بەرپسیاریە بەرامبەر خو و بەرامبەری دەورو بەرا.
مرۆڤ ژدایک بوونا خو و ژرویێ جانی ڤە مرۆڤە، بەلێ پێدڤیا ب پەروەردێ ،فێربونێ و خوئاڤاکرنێ یە بو وێ یەکێ بکاریت ب رەنگەکێ دروست دگەل ژیانا خو و مرۆڤێن دەورو بەردا سەرەدەریێ بکەت و بژیت.
زاروک دەستپێکێ نزانیت ، دادپەروەری چی یە، رێزگرتن چی یە ، گەرم ، سەرما، بەخشین چی یەو دێ چاوا هەستێن بەرامبەر تێگەهیت.
ئەڤە دبورینا دەمی و ژیانا روژانە وب رێیا خێزانێ ،پەروەردێ،خواندن،ئەزمون وسەرەدەریکرن دگەل جڤاکی دێ فێربن.
لەورا جوداهیەکا مەزناهەی دناڤبەرا مرۆڤەکێ کو ب تنێ دژیت و مرۆڤەکێ کو ب هشیاری و ب ووژدان دژیت.
ئێک ژگرنگترین نیشانێت مرۆڤایەتیێ، شیانێت وێ چەندێ هەبن هەست ب ئازارێن خەلکەکێ بکەت. چونکی ئەو کەسێ دناڤ ئازارا دا بژیت باش تر دژیانێ دگەهیت و تێدگەهیت کو ئازار چەندا دژوارە.
مرۆڤایەتی ومرۆڤ بوون ئەو نیینە ب تنێ بو خۆ داخوازا خۆشی و ئارامیێ بکەت، بەلکو ئەوا ڕاست بیت ئەوە ئارامیێ و خوشیێ و خۆش گوزەرانیێ بو خەلکەکێ دی ژی ب خووازیت.
هندەک جارا پەیڤەکا خۆش دکاریت دلەکێ شکەستی ئارام و تەنا بکەت.
دەستەکێ پاڵپشت و هاریکار دکاریت ژیانا کەسەکێ بگهوریت و بێدەنگییەکا ب ووژدان دشێت رێکێ ل ئازاردانا مروڤەکێ مەزڵوم بگریت.
دجڤاکەکێدا کورێز ل دویف پیڤەرێن سامان، پایە و پوست ، دەسەلات و پلەو پایێن جڤاکی بهێتە پیڤان، ئا ل وی دەمی مرۆڤایەتی دکەڤیتە دمەترسێ دا.
ئەرێ کەرامەت و ڕۆمەتا مڕۆڤی ب وێ دهێتە کێشان و پیڤان و دیارکرن کا چەند پارە هەیەو چەندێ زەنگیننە؟ یان کا پلەو مەزنناتیاوی دجڤاکیدا چەندە؟
مرۆڤەکێ هەژار دکەڕامەتێدا کێمتر نیینە ژمرۆڤەکێ خودان پارەو زەنگین و خودان دەسەلات، مرۆڤەکێ نەخوێندەوار مافێ رێزگرتنێ هەیە، مرۆڤەکێ لاواز نابیت ببیتە ئارمانجا سڤکاتی وزڵم و زورداریێ.
مرۆڤ بوون دگەل کەسەکێ هەژار ب هەمان رێزڤە سەرەدەری دگەل دا بهێتە کرن هەروەکی تو کاچاوا سەرەدەریێ دگەل کەسەکێ زەنگین و خودان پارە دکەی.
مرۆڤ ددەمەکێدا دبیتە مرۆڤ کوئەو بخو بەرامبەر خو و شاشیێت خۆ ب ڕاوەستیت ژێ نەڕەڤیت ئەو بخۆ پرسیارا لخۆبکەت.
یەک ژتایبەت مەندیێت مرۆڤێ هشیارو سەرکەفتی ئەو شاشێت خۆ قەبول بکەت.
هندەک کەس هەنە هەردەم بزاڤێ دکەن شاشیێت خۆ ڤەشێرن و گونەهێت خو بێخنە ستوێ کەسێن دی.
بەلێ مرۆڤێ ب ووژدان باش دزانیت کوهیچ کەسەک بێ شاشی نیینە.
گرنگی دوێ چەندێدا نیینە کوتو هیچ شاشیەکێ نەکەی، یاژوێ گرنگتر ئەوە دەما شاشیەکێ دکەی دان پێدانێ ب وێ شاشیێ بکەت، و داخوازا لێبۆرینێ بکەت و بزاڤێ بکە ئەو شاشی دووبارە نەبیتەڤە.
دان پێدان ب شاشییا نیشانا لاوازیێ نیینە، بەلکی بەرۆڤاژی نیشانا پێگەهشتن و کەساتییا خو باوەرو ب هێزو هشیارە.
ئازادی یەک ژستوینێت گرنگێن بەهاێن مرۆڤایەتیێ و ژیانێ یە،
ژلایەکێ دی ئازادی رامانا وێ ئەو نیینە هەرچییا تەدڤێت و تو بخووازی بکەی،بێی هزر ژئەنجاما بکەی.
مرۆڤێ هشیار و پێگەهشتی دزانیت کو ئازادی یا وی ل وی جهی سنور دار دبیت کو پێشێلییا ماف و ئازادیا کەسانێن دی بکەت. لڤێرە دهێتە دیارکرن کونابیت ب ناڤێ ئازادیێ سڤکاتیێ ب کەسەکێ دی بکەی، و بناڤێ ئازادیێ مافێ کەسێن دی ل بەرچاڤ نەگرین و نابیت ب ناڤێ ئازادیێ ببینە هوکارێن ئازاردانا کەسێن دەردۆر. ب ڕەنگەکێ دی ئانکو ئازادییا ڕاستە قینە دگەل بەرپرسیاریێ دییار دبیت، جڤاکەک کوتێدا هەمی کەس تنێ هزر دبەرژەوەندیێن خو بکەت جڤاکەکێ پێش کەفتی نابیت .
زۆرکەس دکارن لسەر مرۆڤایەتیێ ب نڤێسن و ب پەیڤن گەلەک لسەر خوشەویستیێ، داد پەروەریێ، رێزگرتنێ بنڤیسن، بەلێ پسیاراگرنگ ئەڤەیە، دژیانا ڕۆژانەیا خودا چاوا سەرەدەریێ دگەل دەورو بەرێن خو دکەن.
مرۆڤایەتی دپاراستنا نهێنیا کەسەکێ ، دهاریکاریکرنا هەژارو نەدارەکێ ژ نەشکاندنا دلێ کەسەکێ ئا ل ڤی دەمی دچیتە دچاچۆڤی مرۆڤایەتیا ڕاست و دروست دا.
ل دوماهیێ دگەهینە وێ ڕاستیێ کومرۆڤ و مرۆڤ بون دوو ڕەهەندێن جودانە:
ڕەهەندێ ڕوحی و ڕەهەندێ سنجی و ڕەوشتی. هیچ مرۆڤەک دبنەرەت دا بێ بەها نەهاتییە دونیاێ، بەلێ کارو کریارێن ویینە کوپلە و ئاستێ وی یێ مەریفی و مرۆڤایەتیێ و بەرپسیاریێ دیار دکەت.
مرۆڤ دەمەکێ دبیتە مرۆڤ کو بشێت بەرامبەر هەژارا زلهێز نەبیت، بەرامبەر شاشیێت خو شانازیێ ب خو نەبەت، بەرامبەر ڕاستیێ خو نەڤەشێریت و بەرامبەر ئێش و ئازارێت جڤاکی بێ هەست نەبیت.
ل دوماهیێ مرۆڤ بوون ئەونینە کوتنێ وێ ب زانیت چاوابژیت بەلکو یاڕاست و دروست ئەوە بزانیت دێ چاوا و ب چ رەنگ دجڤاکی دا ژیت.

 

#مسلح یاسین

گۆتارێن پەیوەندیدار

Back to top button
XaniAI Icon پسیار ژ XaniAI بکە