وهشانێن ناڤهندا خانی یا رۆشنبيرى و راگههاندنێ / پشكا رۆشنبیری
وهشانا هژماره (33)
ناڤێ پهرتووكێ : چیرۆكێن كرمانجی
نڤیسكار : عهلی شێخ غیاسهددین نهقشبهندی بامهڕنی
بهرههڤكرن: عهبدولرهحمان عهلی نهقشبهندی
بابهت: چیرۆك
بهرههڤكهر، د پێشهكێیا پهرتووكێ دا دبێژیت: ((ل بیرا منە، كانێ چ كەد و رەنج و بزاڤ، نڤیسەری كربوون و كێشابوون، ژ بۆ كو ئەڤ پەڕتووكە، ب زاراڤێ كرمانجی، ل باژێڕێ (دهۆكێ) بهێتە چاپكرن، كانێ چەند جاران، نڤیسەر چوویە وەزارەتا رەوشەنبیری و راگەهاندنێ یا عیراقێ، ژ بۆ كو چاپكرنا پەڕتووكێ ل دهۆكێ ئەرێ بكەن. وەزارەتا رۆشەنبیرییا عیراقێ، بهانە دگرتن و دگۆتن، ئەم هاریكارییا چاپكرنا پەڕتووكێ ل دهۆكێ ناكەین، هەكە پەڕتووك ب وی ئاوایێ مە دڤێت نە هێتە چاپكرن. وان دزانی كو چاپخانا دهۆكێ ئەو شیانێن تەكنیكی نینن یێن ئەو دبێژن. نەیسە پشتی گەلەك هاتن و چوونا، نڤیسەری، بێ هاریكارییا وەزارەتێ، ل چاپخانا دهۆكێ، پەڕتووك داچاپكرن)).
پهرتووكا چیرۆكێن كرمانجی یا نڤیسهر عهلی شێخ غیاسهددین ل سالا 1972 ل چاپخانا دهۆكێ هاتبوو چاپكرن، ئهڤ پهرتووكه ل دهمهكی هاتبوو چاپكرن كو گهلهك ژ كوردان نه دزانی ب زمانێ خۆ یێ دایك بخوینن و بنڤیسن، ل وی دهمێ نڤیسهری پێكول د كرن، كو ئهڤ پهرتووكه بهێته چاپكرن وهزارهتا رۆشهنبیرییا عیراقێ بهانه د گرتن، داكو چاپ نهبیت. ئهڤ پهرتووكا نوكه ل بهر دهست چاپا دویێ یه ژ پهرتووكا رهسهن، كو كوڕێ نڤیسهری یا بهرههڤكری، ژ ههژی ئاماژێیه كو چاپا ئێكێ (20) كورته چیرۆكن، بهلێ د ڤێ چاپێ دا (35) كورته چیرۆكن، زێدهبوونا چیرۆكان د ڤێ چاپێ دا بۆ وێ چهندێ ڤهدگهریت، كو نڤیسهری كۆمهكا دیتر یا چیرۆكان بهرههڤكربوو و بڕیار دابوو بهرگێ دویێ ژ پهرتووكا چیرۆكێن كرمانجی چاپ بكهت. د بهرپهڕێن پێشیێ دا بهرههڤكهری ب كورتی ژیانا نڤیسهری یا بهحسكری و پاشى چیرۆك دهست پێ دكهن
