هەڤپشکی، هەڤسەنگی و لهەڤهاتن: خواندنەک بۆ پەیامێ دروشمێ لیستا ٢٧٥
شەمال ئاکرەیی
د گەرمە گەرما بانگەشەیا هەلبژارتنێن جڤانا نوینەرێن ئیراقا فیدرال دا و ل دەمەکی کو لیست و قەوارەیێن سیاسی ب دروشمێن جوداجودا، دخوازن دەنگدەران بۆ لایێ خۆڤە رابکێشن، پارتی دیموکراتی کوردستان ب لیستا هەژمار ٢٧٥ و ب دروشمێ “هەڤپشکی، هەڤسەنگی و لهەڤهاتن“ێ یا هاتییە مەیدانێ. ئەڤ دروشمێ سێ ڕەهەندی، نە ب تنێ پەیڤێن برسقەدارن بۆ هەلبژارتنێ هاتینە داڕێژتن بەلکو کۆمەکا پەیامانە و پوختەیێ وێ لێڕامانا سیاسییە کو پارتی دخوازی ل ئیراقا بهێت کاری پێبکەت.
(هەڤپشکی) خۆ ب خۆ دا ئاماژەیەکە بۆ رەتکرنا سیاسەتا پەراوێزکرنێ و تەکڕەویێ د بڕیاردانێ دا. گەلێ کورد وەکوو دویەم نەتەوەیێ مەزن ل ئیراقێ و پێکهاتەیەکێ سەرەکی، داخوازا پشکداریکرنەکا ڕاست و دروست دکەت د داڕێژتنا سیاسەت و بڕێڤەبرنا وڵاتی دا، نە ب تنێ پۆستێن شکلی هەبن. هەڤپشکی ئانکو پشکەک ژ بڕیارێ ل سەر پرسێن چارەنڤیسساز یێن وەکوو بودجەی، یاسایا نەفت و گازێ و سیاسەتا دەرڤە.
د ڤی سیکۆچکێ دروشمێ پارتی دا، (هەڤسەنگی) ئاماژێ ب هندێ ددەت کو ئیراق وەکوو وڵاتەکێ فرە – پێکهات، پێدڤی ب هەڤسەنگییەکا هویرە د ناڤبەرا هێزین سیاسی و پێکهاتەیێن نەتەوەیی و مەزهەبی دا. لاوازبوونا هەر لایەیەکی، هەڤسەنگیێ تێک ددەت و دێ وەلاتی بەر ب نەسەقامگیریێڤە بەت. ل ڤێڕە، پارتی داکۆکیێ ل سەر وێ چەندێ دکەت کو هەبوونەکا ب هێز یا کوردان ل بەغدا، زامنێ پاراستنا ئەڤێ هەڤسەنگیێیە و ڕێگریێ ژ زاڵبوونا ئێک لێنێڕین ئان ئێک پێکهات ب سەر ئەوێن دیتر دکەت. ئەڤ خالە ژ بۆ پاراستنا مافێن گەلێ کوردستانێ یا گرنگە، دیسان ژ بۆ سەقامگیرییا ئیراقێ ژی ب گشتی.
(لهەڤهاتن)ژی بنەمایەکە بۆ تەکەزکرنێ ل سەر فەرهەنگا دیالۆگ و لێکتێگەهشتنێ ل باتی زمانێ زۆرینە و کەمینەیا هەژماری. ئەزموونا سالێن بۆری یا سەلماندی کو پشت گوهئێخستنا بنەمایێن لهەڤهاتنێ ل پرسێن نیشتمانی، ژێدەرێ سەرەکی یێ پەیدابوونا قەیرانێن سیاسی بوویە. پارتی دڤێت ئیراقا فیدرال بۆ وێ رۆحیەتێ بزڤڕیت کو دەستوورێ هەرتمی ل سەر هاتییە ئاڤاکرن، ئەو ژی ڕێککەفتنە دناڤبەرا پێکهاتەیان.
