کورد ژ کەڤنترین مللەتێن دەڤەرا روژهەلاتا ناڤینە و ب ئاشتیانە ل کوردستانێ ئاکنجی بووینە و ئاشتیخوازن و دلسوزن و خوش باوەرن و رێزێ ل بیانیا و جوداهیێن رەگەزی و ئەتنی و ئاینی دگرن، و فراوانخوازی نەکریە و شەرين داگیرکرنێ وتالانکرنێ نەکرینە، و ڤیایە ب ئاسایش و ئازادی وسەرفرازی د وەلاتێ خۆدا بژین.
کوردان هەمی پيکهينەرين خۆیێن نەتەوەیی هەنە، و جودانە ژ نەتەوەیێن دی ب جوگرافیێ، مللەتی، زمانی، جلوبەرگ، رەوشت و تیتال، کلتور، و رەفتاران، مللەتەکێ نەرمە و سەرەدەریەکا ئەرێنی دگەلدا پيکهات و لایەنان دکەت.
سەروک د پەرتوکا خۆدا بۆ دیروکێ دبێژیت: (کورد نەتەوەیەکە، خودان دیروک و جوگرافیا و زمان و روشەنبیری و رەوشت و تیتالێن خویێن تایبەتە، و ب هزاران سالە ل سەر ئاخا خو دژیت، ب درێژاهیا ڤی ماوەی یێ پێگیربوویە ب هەمی بنەمایێن لێبورینێ و ب هەڤرا ژیانێ، جهێ سەرفرازیێ یە رهوریشالێن روشەنبیریا پێکڤەژیانێ دگەل نەتەوە و ئولێن دیتر دناڤا کوردان دا دکوور و دیروکی نە، دماوێ بوری دا نەتەوا کورد شیایە خو ژ گەلەک بزاڤێن بەهژاندنێ و ژ ناڤبرنێ رزگاربکەت و بەر سینگێ هەر بزاڤەکا بو ڤێ مەرەمێ بێتەکرن بگریت.
بەری پينچ سەد سالان وەلاتێ کوردان ل سەر هەردوو ئمبراتوریەتين ئوسمانلی و سەفەوی هاتیە ليکڤەکرن ، پشتی جەنگێ جیهانیێ ئێکێ بێی ڤیانا وان ل سەر چار دەولەتان هاتە ليکڤەکرن. ڤي ليکڤەکرنێ رەوشەکا جیوسیاسیا ئالوز و ب گرێک ئینا پيش، مخابن ل چ پارچەیان ژڤان چار پارچەیان باوەری ب مافێن رەوایێن کوردان نەئینان و حاشاتی ژبوونا کوردان هاتەکرن، د ئەنجامێن ڤێ سیاسەتا پر شاشی دا شەرەنیخەکا دیرودريژ هاتە مەیدانێ دا، نە ئەڤ حکومەتە شیان کوردان ژناف ببەن و نە ژی کورد شیان وان حکومەتان ب هەرفینن. د ئەمجامدا زیانڤيکەفتیێن سەرەکی گەلين دەڤەرێ بوون، و ئاشتی ل ڤێ دەڤەرێ بنەجهـ نەبوو، و خوینەکا زوور هاتە رێتن، ئەڤ رەوشا نەدروست دبيژیتە مە پێتڤییە هەردوو ئالی سەرژنوی پێداچووني بخۆدا بکەنەڤە، ل شوینا شەر و حاشاتیکرنێ هزرێ ل چارەسەریەکا ئاشتی و دیموکراتی بکەن. ژ ئەنجامێ ڤی کەتوارێ دڤان سەد سالاندا دروست بووی هەر پارچەیەکێ تایبەتمەندیا خۆ پەیداکریە و د شیاندا نینە ئارێشە و چارەسەریێن هەر پارچەیەکێ ببنە نموونە بۆ پارچەیا دی، دڤێت ئارێشەیێن هەر پارچەیەکێ ل دویف تایبەتمەندیێن وێ و کاودانێن وێ ب رێکا دیالوک و و دانوستاندنێ و ريکێن ئاشتیانە و دیموکراسی بێهێنە چارەکرن).
ل ڤان سەد سالين بوریدا، ڤێ دابەشکرنێ و لێکڤەکرنيێ باندورەکا مەزن ل بزاڤا رزگایخوازیا نەتەوەیا کوردستانێ کریە، بزاڤێن سیاسیێن رزگاریخواز ب شورەشين چەکداری ڤە ل هەر چارپارچەیان سەرهەلداینە و توشی هەلنگفتنێن مەزن بووینە و تنێ ل کوردستانا باشور یا ب سەر عیراقێ ڤە شیایە هەريما کوردستانێ وەکو قەوارەکێ نەتەوەیێ دەستوری ب دەستڤەبینیت و دانپێدانەکا نێڤدەولەتی دابینکەت و گەشەیێ پێ بکەت. ئەوێن دیتر ل روژئاڤا دەڤەرکا دەستهەلاتداریەکا خۆ مالی چيکریە، لێ هشتا بارودوخەکي مژوکیێ مەترسیدار هەیە، و ل باکور خەباتا نیڤ سەدەی ژ قوربانیدانێ یا بوویە پروسەکا ئاشتیێ یا لاواز بێی باسێ مافێن نەتەوەیێن کوردستانێ بکەن، و ل روژهەلاتێ بێدەنگیێ پەرێ خۆ ل سەر هەمی پروسا سیاسی و مافێن کوردان دادایە.
زمان توخمێ بنەکیێ نەتەوەبوونێ یە و ل دەف کوردان زمانێ کوردی ب جوداهیا زار و دەڤوکا ڤە پیروزیا خۆ هەیە، و هەر کوردەک ل کیرێ بیت شانازیێ ب کوردبوون و زمان و کلتورێ خۆ دبەت.
سەروک بارزانی ب هەلکەفتنا روژا جیهانیا زمانێ دایکێ د پەیاما خۆدا دبێژیت: (زمانێ دایکێ هێڤێنێ رەسەنایەتی، ناسنامە، هوشیاری و هەڤدەنگیا نەتەوەییە، پاراستنا وی ئەرکەکێ نیشتیمانییە ل سەر مللێن هەمیان).
هيژا نێچیرڤان بارزانی ل بیرەوەریا روژا جیهانیا زمانێ دایک دبێژیت: (پاراستنا زمانێ دایک، پاراستنا ناسنامە و مێژوویا دەوڵەمەند و داهاتوویێ کوردستانيێ یە).
هێژا مەسرور بارزانی ب هەلکەفتنا روژا جیهانیا زمانێ دایک دبيژیت: (زمان، بنەمایەکێ گرنگ و سەرەکیێ بوون و ناسنامەیا نەتەوەیی و نیشتمانیا مەیە. حکومەتا هەرێما کوردستانێ، پابەندبوونا خۆ ب گرنگیدان ب زمانێ کوردی و زمانێ هەموو پێکهاتەیێن گەلی کوردستان دووپات دەکەتەڤە).
هوسا خۆیا دبیت و لدیف گوتنێن هەرسێ بەرێزان ژی پرسا نەتەوەیی پرسا زمانی یە، و زمانە مە ژ نەتەوەیێن دیتر جودادکەت، لەو پێتڤیە گرنگیەکا پتر ب زمانێ کوردی بهێتەدان، و هەمی دەولەتين پارچەکا کوردستانێ داگیرکری زمانێ کوردی ب زمانەکێ فەرمیێ دەولەتێ دانیت و کوردان ژی بکەتە هەڤپشک د دەولەتێ دا دا ئاشتی و ئاسایش و سەقامگیری جێگیربیت.
ژلایەکي دی ڤە، دیارە هشتا نەتەوەیێن دەولەتدار کوردبوونا کوردان ناپەژرینن، لەوان ئەڤە چەندین جارە میدیاکارێن عەرەب پسیارێن کوردبوونێ دگەل رێزدار مەسرور بارزانی د ئازرینن، بەرێز ژی ب سەرفرازانە بەرسڤێ لێ ددەت..
ل دیدارا کەنالێ سکای نیوزێ عەرەبی ل ٨ ی شواتا ٢٠٢٦ ێ ريزدار مەسرور بارزانی سەروکێ حکومەتا هەريما کوردستانێ ل گوپیتکا جیهانیا حکومەتان ل دوبەی بەرسڤا میدیاکارێ عەرەب عماددین ئەدیب ب ئنگلیزی ددەت..
نە کێشەیە کو ئەز کوردم
تنێ ئەوين تەعەدودیێ رەد دکەن و رێزێ ل رەگەزێن دی نەگرن، ناسناما کوردی ب کێشە دبینن!
ئەز کوردم و خودێ ئەز کورد دروستکریمە
چ جارا نەشيم نکولیێ لێ بکەم، و شانازیێ پێ دبەم چ ئەز ل عیراقي بژیم یان ل هەر جهەکي دی، ئەز کوردم و نەشيم ناسناما خۆ بگوهورن و چ جاران ژی ناگوهورم، تنێ ئەوێن فرەیێ رەتدکەن و ريزگرتنا رەگەزی نەکەن، ناسناما کوردی ب کێشە دزانن. کوردستان هاتیە دابەشکرن د مێژوویێ دا، و ميژوو یا دادپەروەر نەبوو بەرامبەر دوزا کوردی.
هەرەوسا ريزدار مەسرور بارزانی ل کوربەندێ ئاشتی و ئاسایشێێ ل روژهەلاتا ناڤێن ئەوا ل دهوکێ هاتیە بەستن ل روژێن ١٦ و ١٧ و ١٨ ی چریا دوێ یا سالا ٢٠٢١ ێ، بەرسڤا روژنامەڤانێ بەریتانی مارتن شولوف ددەت دەمێ پسیار ژي کری، (رێکێ بدە من پسیارەکێ ژتە بکەم وەکو سەروک وەزیرێن کوردستانێ: تو کوردی بەراهیێ یان ئیراقی بەراهیێ ؟)، دەمل دەست ريزداری بەرسڤ لێدا و گوتێ.. ئەز کوردم.
ئەز کوردم.. بەرسڤەکا سادە و پر رامان و پەیام و مەبەست بوو، بەرسڤەک بوو دەربرین ژ راستیەکا مێژویی و جوگرافی و مروڤاتی یا هەر تاکەکێ کورد دکر وەکو روژێ گەش دکەت.
بەلێ ئەم کوردین و شانازیێ ب کوردبوونا خۆ دبەین، ئەم کوردین و ل کیرێ بژین هەر ئەم کوردین و زمانێ مە کوردی یە، و هەتا ماینە ژی هەر دێ کوردبین.
کوردبوون ناسناما مەیە، و ئەرکەکێ نەتەوەیی ونیشتیمانی و مروڤییە بپارێزین.
ئەم باوەرین ما دەم سەروکێن مە هوسا دلسوزێن کورد و کوردستانێ نە، کوردستان ل دەمێن نێزیک دێ ب ماف و ئارمانجێن خۆیين نەتەوەیی شاد بیت و گەلێ وێ ژی سەرفراز بیت.
