نامهیهكا دیرۆكى یا بارزانیێ نهمر بۆ (دیگۆل)ى..
دهقێ نامەیا مەلا مستەفا بارزانی بۆ جەنەڕال دیگۆل؛ سەرۆكێ وی سهردهمی یێ فەرەنسا:
جەنەڕال…
دەلیڤەیێ بدە پیرەمێرەکێ وەکی من، دا کو ئەڤێ داخوازیا گرنگ بۆ هەوە بنێریت. پیرەمێرەکی، کو ژ دەستپێکا لاوینییا خۆ ڤە، بۆ ئازادی و پاراستنا کەرامەتا گەلێ خۆ خەباتێ دکەت.
هوون مەزنترین خەباتکەرێ سەرهەلدانێ نە ل ئەورۆپایێ، هوون ئەون یێن کو وەلاتێ خۆ بەرەڤ سەرفرازییێ بری، هوون نەشێن هەست ب ئێش و ئازارێن گەلێ کوردێ چیایی نەکەن، یێ کو دەمێ شەش سالێن ڕەبەقە ل باکورێ عێراقێ، د خەباتەکا بێ بێهنڤەدان دایە. ژ وێ ژی پتر، هوون سەرۆکێ فەرەنسایێ نە، سەرۆکێ وێ نەتەوهیا بلند و پایەبەرزن، کو پرەنسێپێن ئازادى یێن سیاسی و مەبدەئى مافێ چارەنڤیسێ گەلان پێشکێشی جیهانێ کری. ژ وێ ژی پتر، هوون (جەنەڕال دیگۆل) ڕزگارکەرێ هەموو وەلاتێن بیانی یێن فەرەنسی ئاخێڤن، دژمنێ سەرسەختێ هەر ڕامانەکا چەوساندنێ نە و دۆستێ ڕاستەقینەیێ هەر مرۆڤەکێ ئازادیخوازن.
جەنەڕال.. هوین د ڕژد بوون ل سەر دەربڕینا نەرازیبوونێ ل هەمبەر شەڕێ (ڤێتنامێ)، ئەز یێ پشتراستم، کو ل دەڤ هەوە دۆزا گەلێ کورد ژ یا ڤێتنامییا کێمتر نینە. ئەم د ڤێ شەڕ و خەباتا پاراستنا نەتەوهیا خۆ دا، ب تەمامی ب تنێ نە، ڕێكخراوا نەتەوەیێن ئێکگرتی ئەم یێن پشتگۆهـ هاڤێتین، هەروەسا چەندین زلهێز ژی د هاریکاریکرنا عێراقێ دا ب نووترین چەکێن وێرانکەر هەڤڕكیێ دکەن، لەورا دووماهیک لایەن مابیت، کو ئەم چاڤەڕێی ئۆمێدێ لێ بکەین، ب تنێ (دیگۆل)ێ فەرەنسایێ یە. ئەڤڕۆ، دەمێ عێراقی داخوازا چەکی ژ فەرەنسایێ دکەت، ئەم وەسا دبینین کو بێی چارەسەرکرنەکا مەبدەئی یا کێشهیا کوردان، هەر هنارتنەکا چەکی بۆ عێراقێ ب تنێ دێ بیتە ئەگەرێ وێرانکرنا وەلاتێ مە و کوشتنا ب کۆم یا ژن و زارۆکێن مە.
قورئانا پیرۆز دبێژیت: (بۆ هەر مرۆڤەکی ل ئاسمانان بەهەشتەکا بچووک هەیە، کو ل دەمێ نڤێژێ دشێت بەرێ خۆ بدەتێ). هوون و فەرەنسا بەهەشتا ئاسمانی یا مە نە.
مستەفا بارزانی
٨ێ شباتا ١٩٦٨
نامهیا دیرۆكى یا مهلا مستهفا بارزانی، ئهوا ل سالا 1968ێ بۆ جهنهرال (شارل دیگۆل)، سهرۆكێ وی دهمی یێ فرهنسا هنارتی، سهردهمهك بوو كو گهلێ كورد ژ بلی چیا و بارزانیێ نهمر، هیچ دۆستهك نهبوو، چاردور دژمن و نهحهزێن گهلێ كورد بوون و وهلاتێن زلهێزێن جیهانێ ژی ب چهكی و چهبلخانا پشتهڤانیا وان دكر ژ بۆ نههێلانا گهلێ كورد.
سهردهمهك بوو راگههاندن وهكی ئهڤرۆ یا بهێز و بهربهلاڤ نهبوو، رێكێن گههشتنا دهنگێ كوردان و مهزلۆمیهتا وان؛ نه د گههشته جیهانا مرۆڤایهتیێ. سهردهمهك بوو، هێزهكا مهزن ل سهر سهرێ ملهتێ كورد بوو، هێزا ملهتێ كورد ژی نه دهاته ههڤبهركرن ل گهل وێ هێزا مهزنا دژی ملهتێ كوردستانێ.
گرنگییا وێ نامهیێ ژ وێ خواندنێ و ههلسهنگاندنێ گهلهك مهزنتره یا كو ههر كهسهك خواندنێ بۆ دكهت، ئهم ژی ژ لایێ خۆڤه د ڤان چهند رێزان دا دبینین.
د وێ نامهیێ دا، بارزانیێ نهمر بۆ جارا ئێكێ ب شێوهیهكێ فهرمی و ئاشكهرا داخوازا پشتهڤانیێ ل ئێك ژ مهزنترین و كاریگهرترین وهلاتێن جیهانێ دكهت. ئهڤه نیشانا وێ یهكێ بوو، كو كێشهیا كوردستانێ نه ب تنێ كێشهیهكا ناڤخۆ یا عیراقێ یه، بهلكو كێشهكا نێڤدهولهتی یه.
سهردهمهك بوو، كو زۆر بهیا وهلاتێن جیهانێ پێزانین ل سهر كوردان نهبوون، ئهو نامه بزاڤهك بوو، بۆ دانهنیاسینا مافێن كوردا ب جیهانێ و بهحسكرنا وی شهرێ گران، كو ل سهر مللهتێ كورد دهاته كرن و گههاندنا دهنگێ مللهتهكێ مهزلووم بۆ ئێك ژ سهرۆكێن كاریگهرترین وهلات ل سهر ئاستێ جیهانێ.
بارزانیێ نهمر ل گهل خهباتا چهكداری، نیشان دا، كو رێیا سیاسی و دیبلۆماسی ژی گهلهك یا گرنگه. ئهڤه هۆشمهندییا بارزانی بوو ژ بۆ خهبات و بهرخودانا مللهتێ كورد.
سیناهی و رۆناهییهك بوو، كو پهیوهندیێن نێڤدهولهتی دروست بكهت. نامهیهكا گرنگ بوو، نیشانا وێ چهندێ بوو، كو سهركردایهتییا كوردان دشێت راستهوخۆ پهیوهندییێ ل گهل سهرۆكێن وهلاتێن جیهانێ دروست بكهت.
ڤێ نامهیێ سهلماند، كو بهردهوامی یا كێشا كوردان، كێشهیهكا كورت خایهن و ناڤخۆیی نینه، بهلكو كێشهیهكا درێژخایهنه و پێدڤی یه ب رێكێن نێڤدهولهتی ئهڤ كێشه ل دهڤهرێ بهێته چارهكرن.
ڤێ نامهیێ پهنجهرهكا دی ل جیهانێ ڤهكر، دا كو جیهان د وێ پهنجهرێ دا تهماشهی مللهتێ كورد و بن دهستی یا ڤی مللهتی بكهت.
وهك باب و باپیرێن من بهحسا كهسایهتییا مهلا مستهفا بارزانی دكر، كهسهكێ گهلهك هێژا و ب سهنگ بوو، ههروهسا كهسهكێ زۆرێ راستگۆ بوو، دهما یێ روینشتی با یێ پیر بوو، لێ دهما راببا سهر پێیان و دهست دابا (برنۆ)یێ، وهك گهنجهكێ خورت و هێژا دهاته پێشچاڤ.
بارزانیێ نهمر د گۆته وهلاتێن دهردور: ئهم شهرخواز نینین، بهلێ ئهگهر هێرش ل سهر گهلێ مه بهێته كرن، ئهم دێ ب دژواری بهرهڤانیێ ژ گهلێ خۆ كهین و ل سهر حهقیێ چ جارا تهسلیم نابین و دێ بهردهوام خهباتێ كهین تا مللهتێ كورد وهكی ههمی مللهتێن جیهانێ، ب مافێن خۆ یێن ڕهوا شاد دبیت.
لهورا ئهڤرۆ وهفادارییا مه بۆ پارتی، وهفادارییه بۆ وێ مێژوو یا سهرفهرازا ب خوینێ هاتییه نڤیسان، بۆ گههشتن ب ئارمانجا سهربهخۆیا كوردستانێ. رێبازا بارزانی؛ بوویه ناسنامه یا مه و پارتی ژی بوویه ڕهشمالا مه یا مهزن، كو تێدا ههست ب رۆمهت و ههبوونا خۆ دكهین.
