ئحسان ئامێدی
پێشمەرگە پیروزترین و بەربەلاڤترین ناڤە ل کوردستانێ، و نهو ژی ڤی ناڤی جهێ خۆ د فەرهەنگا سیاسیا جیهانێ دا کریە، چونکی پێشمەرگەی باشترین و پیروزترین ئەرک پێناڤی مافێن مروڤی و ئاشتیێ و ئازادیێ و دادپەروەریێ ئەنجامدایە، و ل سەر دەمێ شەرێ دژی داعش نوینەراتیا جیهانا ئازاد کریە ژبۆ ژناڤبرنا ستەم و زوریا وێ گروپا تیروریستیا جیهانی.
پێشمەرگە ئەو ئەرکێ مەزنە یێ بۆ هەر ئێکی هەی پێ رابیت، بەلێ هەمی کەس نەشێن پێ رابن، ژ بەرکو هەمی مروڤان ئەو باوەری و بەرهەڤی و وێرەکی نینە خۆ بکەنە گوری و قوبانا مللەتی، لەوان ئەوێن پێ رادبن سەفرازیەکا مەزن ب دەستڤە دئینن و شانازیي پێ دبەن، وەکو ل سەر وێ رێبازێ شەهید دبن دچنە د تومارا نەمریێ دا .
ل جیهانێ گەلەک گروپێن چەکدار خەبات کریە، لێ چ گروپان وەکو پێشمەرگەی رولێ خۆ نە دیتی یە و ناڤێ خۆ بەلاڤ نەکریە کو بشێت خەباتا خۆ یا چەکداری بکەتە د خزمەتا مروڤایەتیێ دا، و هەڤپەیمانیەکا خەباتگێری دگەل پتر ژ شیست دەولەتان پێک بینیت، و دیربیت ژ کارێن تیروریستی.
پێشمەرگە ئەوێ دژمنان ب ( چەتە و رێگر و تێکدەر ) بناڤ دکر ئەڤروکە دەولەسەری خەبات و قوربانی دانا راست و دروست و رەوا بوویە ناڤەکێ پیروزێ جیهانی.
پێشمەرگە ب رولێ خۆ یێ مروڤایەتی، شیایە پشتەڤانیا نێڤدەولەتی ب دەستخۆ ڤە بینیت و ناڤداریەکا جیهانی تومارکەت، لەوان نوینەرێن وی ل پلاتفورمێن نێڤدەولەتی ئامادەدبن و رێز لێ دهێتەگرتن و ناڤێ وان بلند دهێتە راکرن.
ئەو چالاکیا ل فەرەنسا هاتیە کرن بناڤێ پێشمەرگەی ب ئامادەبوونا سەروک بارزانی و نوینەرێن پێشمەرگەی و کەساتیێن جیهانی، نە ریدانەکا نیشکەیی بوو، بەلکو بەرنامەکێ خاندی و دارێژتی بوو، بو رێزلێنان و پشتەڤانیکرنا پێشمەرگەی و دوزا کوردستانێ بوو ژ لایێ ئێک ژ پێنچ دەولەتێن هەرێن مەزنێن جیهانێ.
فەرەنسا گوپیتکا شارستانیەتي و مافێ مروڤانە، دەولەتەکا زلهێزا جیهانی یە، دەولەتا هزروبیر و زانست و تەکنولوژیا و دادیا جڤاکی یە، ئەنداما هەردەما جڤاتا تەناهیا نیڤدەولەتی یە، ئەنداما قلپا ناتویە، ئەندام ئيکەتیا ئوروپا و بازاري ئوروپایێ هەڤپشکە، ئەنداما هەڤپەیمانیا نیڤدەولەتیا دژی تیرورێ یە، ل هەمی بلاتفورمێن نێڤدەولەتی رولەکي کارا هەیە، و ژبەر رولێ وێ یي مەزن ل پلاتفورمێن نێڤدەولەتیدا ، رولەکێ سەرکی دیتی یە د دەرئینانا بریارا جڤاتا تەناهیا نێڤدەولەتی یا ژمارە ٦٨٨ ل ١٩٩١/٤/٥ و چێکرنا دەڤەرا ئارام و دژی فرین و هەرێما کوردستانێ.
ڤێجا دەمێ ئەڤ دەولەتە ببیتە پشتەڤانا کوردستانێ و ناڤێ پێشمەرگەیێ رزگارکەر و پارێزڤانێ کوردستانێ بلند راگریت و ب شانازی ڤە نا ڤێ پێشمەرگەی دانیتە سەر پارکەکی ل پایتەختێ خۆ ئەڤە سەرفرازیەک مەزنە بۆ کوردستانێ و پشتەڤانەکا نێڤدەولەتا مەزنە بۆ دوزا وێ یا رەوا.
مە هەمیان دیت ل ڕۆژا هەینی ٥ێ ئەیلوولا ٢٠٢٥، سەرۆک مەسعود بارزانی ل پایتەختا فەڕەنسا ـ پاریسێ، ب ئامادەبوونا خاتوون ئان هیدالگۆ سەرۆکا شارەوانیا پاریسێ و ژمارەیەکا بەرپرسێن حکومی و کەسایەتی و ڕۆشنبیرێن وی وڵاتی، هەروەسا شاندەکێ ل پارێزگەها هەولێرێ و پێشمەرگەیێن دێرین و کوردێن ئاکنجیێن ئەورووپا و فەڕەنسا، ل پارکا “ئۆندرێ سیترۆێن” پەردە لەسەر تابڵۆیێ پێشمەرگەی هەڵدا و شەقامەک ب ناڤێ پێشمەرگەی ڤەکر.
دڤێ هەلکەفتنێ دا، سەرۆکا شارەوانیا پاریسێ گوتارەک پێشکێش کر و ڕۆڵی پێشمەرگەی و هەریما کوردستانێ بلند نرخاند. پاشی سەرۆک بارزانی گوتارەک پێشکێش کر و خۆشحاڵیا خۆ دیارکر ب سەبارەت ناڤکرنا شەقامەکی ل پاریسێ ب ناڤێ پێشمەرگەی.
سەوک بارزانی د گوتارا خۆدا گوت:
فەڕەنسا ب درێژاهیا مێژوویێ هەمیشە هەڤپشک و دۆستا گەلی کوردستانێ بوو. ل سەردەمێ ژەنەرال دیگۆڵی تا نوکەا، فەڕەنسا پشتەڤانا دۆزا کوردستانێ کریە و یەکەم وڵات بوو کو ڕێک دای ئەنستیتیوتا کوردی ل پاریسێ ڤەکەن.
هەروەسا بارزانی فەرموویە، پێشمەرگەی ئەرکەکێ پیرۆز جێبەجێ کریە. ئەو ڕێزا وە ل پێشمەرگەی گرتی، ڕیزگرتنە ل خەباتا پێشمەرگەی و دۆستایەتیا فەڕەنسا و کوردستانێ. کوردستان هەمیشە دێ جهێ یەکگرتن و هەڤپشکیێ بیت، و پێشمەرگە ژی پارێزەرێ ئازادیێ و دیموکراسیێ و مافی مرۆڤی بیت. ل شەڕی داعشدا پێشمەرگەی ١٢ هەزار شەهید و بریندار دان، بەلێ سەروەرییەکا مەزن بۆ خۆ و نەتەوەیا خۆ تۆمار کر کو ئەڤڕۆ ل پاریسێ باخچەیەکی ب ناڤێ پێشمەرگەی ڤەکەین. ب دڵنیایی دبێژم تا کوردەک مابیت، سوپاسی فەڕەنسا دێ کەین. خۆشحاڵییە کو ب گۆڕینا حکومەتان ژی، هەڵوێستێ فەڕەنسا بەرامبەر کوردستانێ نەگۆهوری. یەکەم سەرۆکێ ئەوروپا کو پێشوازییەکا فەرمی ل من کری، سەرۆک میتەران بوو ل ساڵا ١٩٩٢. یەکەم خانما ئەورووپی کو روندک بۆ قوربانیێن کوردستانێ بڕێژیت، خاتوون میتەران بوو ل ساڵا ١٩٨٩ێ. ئەڤ تشتە چ جاران ژ بیر ناچن.
فەڕەنسا و پاریس ل دڵی گەلی کوردستانێ دایە. بژی پاریس، بژی هەولێر، بژی هەڤپشکیا کورد و فەڕەنسا.
دڤي هەلکەفتنێدا سەروک بارزانی چەند دیاری پێشکێشی خانما سەروک شارەوانیا پاریسێ کرن، د هەمان دەمدا خانما نافئینای ژی دیاریەک پێشکێشی سەروکی کر، هەروەسا سەروک بارزانی میدالیا ڕێزلێنان دا ئێک ژ پێشمەرگەیێن بریندارێن شەڕێ دژی داعش. پاشی دڤان رێورەسماندا سەرەدانا پێشانگەها وێنەیێن کر، کو پانوراما وێنەیێن مێژوویێن خەباتا پێشمەرگەی بوون ل سەردەمێ شورەشێ تا نوکە.
هەلبەت ئەڤ چالاکیە بڤان رێورەسما ب ئامەدەبوونا سەروکێ پێشمەرگە و پێشمەرگەیێن دێرین و بریندار سەرکەفتنەکا دی یا مەزنە دبوارێ سیاسی و دیبلوماسیا کوردستانێ دا و دێ پێگیریەکا سیاسی و ئەخلاقی بۆ فەرەنسا و هەڤپەیمانين وێ چێکەت کو پتر پشتەڤانیا کوردستانێ و دوزا وێ یا رەوا بکەن.
پێشمەرگە ئەڤ ناڤي پیروز ل کومارا کوردستانێ ل مهابادێ ب ئامادەبوونا بارزانیي نەمر هاتیە دانان ل سەر وان شورەشگێرێن کوردستان رزگاردکر و د پاراست، و ل هەمی پارچێن کوردستانێ بۆ ناڤەکێ ب رێز و پیروز و دەربر، و نهو ژی وەکو ناڤەکێ جیهانی ل ناڤەندێن نێڤدەولەتی دهێتە ب کارئینان و چوویە د فەرهەنگا سیاسی و لەشکەری یا جیهانی دا.
پێشمەرگە رزگارکەر و پارێزڤانێ کوردستاني یە، کەلەمێ چاڤێ دژمنا یە، و ژ کەڤندا دەمێ رژێمێن حکمدار دانوستاندن دگەل سەرکردایەتیا کوردستانێ دکرن، دا داخازکەت پێشمەرگە چەکێ خۆ دانیت، بارزانیێ نەمر ئەڤ داخازە رەتدکر، و دابیژیت پێشمەرگە وەکو پێتڤیەکا مێژوویی و نەتەوەیی دروست بوویە، کەسێ ماف نینە بێژیتێ چەکی دانە، و هەکە مە چەک دانا ئەڤە بریارا مە کەفتی د دەستێن یێن دی دا!.
هەروەسا دەمێ پول بریمەری حاکمێ ئەمریکی ل ئیراقێ هەولدا پێشمەرگەی ب رێزا میلیشیا دانیت و حەل کەت، سەروک بارزانی گوتێ:
بپێشمەرگە میلیشیات نینە، پێشمەرگە بە بریارەکێ دروست نەبویە حەتا ب بریارەکێ حەل ببیت، نە ب بریارا من و نە ب بریارا تە و نە ب بریارا هیچ کەسەکی، پێشمەرگە ب خوین و روندکێن مللەتەکی دروست بویە، خەلکێ دی ب بریارەکێ دروست بوینە و دشێن ب بریارەکێ حەل ببن، کو بریمەری گوتی ئەڤە بو من خەتا سورە، من بەرسڤ لێدا و گوتێ ئەڤە بو من دە جارا خەتا سوورە و پێشمەرگە حەل نابیت. و ئەڤە ئەز چوومە کوردستانێ زەلام بە وەرە پێشمەرگەی حەل کە باشە!.
ئەڤ چالاکیە و ئەڤ ناڤلێنانە سەرفرازیەک مەزنە بو هەر کوردستانیەکی و شانازیەکا مەزنە بۆ هەر پێشمەرگەیەکی کو ناڤێ وی یێ پیروز ل پایتەختەکا جیهانی ببیتە نیشانەکا شارستانی، پیروزە و هەر سەرفراز بن.
