وەشانێن ناڤەندا خانی یا رەوشەنبیری و راگەهاندنێ/ پشكا رەوشەنبیری
وەشانا هژمارە ( 9 )
ناڤێ پەرتووكێ: شێخ عوبەیدوللاهێ نەهری
نڤیسكار: مەسعود خالد گولی
بابەت: ژیاننامە
ب خواندنا ڤێ پەرتووكێ دإ بۆ مە دیار بت، كو بزاڤا شێخ عوبەیدوللایێ نەهری بزاڤەكا نەتەوایەتییا مودێرنا كوردی بوو، مەرەما ستراتیجییا شێخ عوبەیدوللای پێكئینانا دەولەتەكا سەربخوەیا كوردی بوو، كو هەمی كورد بێی جیاوازییا (خێزانی، مالباتی، ناوچەیی یان زاراڤی) ل سەر بنچینەیا پەیوەندیێن نەتەوەیی و دەولەتەكا ب ناڤ (ئیسلامی) دا كۆم بكەت، و (ئاسایشا سەر و مالێ خەلكی، بازرگانی، خویندەواری، پیشەسازی و…هتد) د كوردستانێ دا دابین بكەت. هەڤكارییەكا دۆستانە ل گەل مەسیحییان ل سەر بنیاتێ لێبۆرینا ئایینی و رێز ل هەڤدوگرتنێ دامەزرینت و هەڤپەیمانییێ ل گەل موسلمانێن ئیرانی و عەرەب دروست بكەت و دانپێدانا سیاسی و یاساییا وەلاتێن مەزنێن ئەوروپی بدەستڤە بینت، بۆ ڤێ چەندێ ژی گەلەك نامە ل گەل ڤان لایەنان یێن پێك گوهارتین و نوینەرێن تایبەتێن خوە یێن هنارتینە جەم وان دا دۆزا كوردان و كاودانێن كوردستانێ بۆ وان رۆن بكەت. لەو شێخ عوبەیدوللا دهێتە هژمارتن ئێكەمین رێبەرێ كورد، كو ب رێكا كارێ دیبلوماسی پرا دیالۆگێ ل گەل دۆست و دوژمنێن خوە ئاڤا كری و نە ب تنێ پەیوەندیێن وی ل گەل كوردان بوون، بەلكو وی پەیوەندی ل گەل عەرەب و ئیرانی و تورك و دەولەتێن زلهێزێن وی سەردەمی (رۆسیا، ئنگلیز و ئەمریكا) ژی هەبوون. راستە، كو هەمی هەولێن وی بێ ئەنجام بووینە، لێ شكەستنا ڤێ بزاڤا وی بوو بەرێ بنیاتەكێ موكوم بۆ بەرپابوونا دەهان بزاڤ و شۆڕشێن دی یێن كوردان.
