پاریس سلاڤێ ل پێشمەرگەی ڤەدگێڕینیت
شەمال ئاکرەیی
ب گاڤەکا ب فرە – رەهەندێن هێمایى و دیرۆکى یێن کویر و پڕ رامان، ب ئامەدەبوونا سەرۆک مەسعود بارزانی و ئانا هیدالگۆ سەرۆکا باژێرڤانییا پاریسێ، ل رۆژا ئەینی ٥ی ئیلۆنێ ٢٠٢٥ێ، رێورەسمێن ڤەکرنا پرۆژەیێ “رێیا پێشمەرگە”ی ل پارکا لا ئۆندرێ سیترۆێنزۆنا، کو د کەڤیتە د زۆنا ١٥ێ ل پایتەخێ فرەنسا دا بریڤەچوو. ئەڤ پرۆژەیە، وەک سیمبۆلەکێ ژ هەژی ژ بۆ رۆلێ هێزێن پێشمەرگەیێ کوردستانێ و ژ بۆ بەلگەکرنا وێ پەیوەندییا بهێز یا فرەنسا ل گەل گەلێ کوردستانێ یە. ڤەکرنا ئەڤێ رێیێ و دانانا تابلۆیا پێشمەرگەی، نە بتنێ ناڤکرنا جهەکى بوو ل فرەنسا، بەلکو وەک پەیامەکێ ئاشکرایە بۆ جیهانێ، کو خەبات و تێکۆشینا پێشمەرگەی نە ب تنێ ب سەر سنورێن جوگرافی یێن کوردستانێ ڤەمایە، بەلکو ژێ دەرباز بوویە و بهایێن مەزن یێن مرۆڤایەتیێ ڤەگرتینە: ئازادى، ئاشتى، و بەرەڤانىکرن ژ کەرامەتا مرۆڤى.
دەهان سالە، هێزێن پێشمەرگەی وەک سەنگەر و هێلا ئێكێ یا بەرەڤانیێ ژ گەلێ کوردستانێ دهێتە ناسین و بەرهنگاریکرنا بندەستیێ و ستەم و دیکتاتۆریەتێ رۆلێ هەرە سەرەکی ل سەر ملێن پشمەرگەی بوویە. د دریژاهییا خەباتا خۆ دا، پێشمەرگەی ناڤێ خۆ د ناڤ بەرپەڕێن دیرۆکێ دا ب زێڕی نەخشاندییە. بەلێ، ئەو قارەمانییا بێ هەڤتا یا پێشمەرگەی، کو سەرنجا هەموو جیهانێ بۆ خۆ راکێشای، ل سالا ٢٠١٤ێ بوو، دەمێ ب مێرخوازییەکا خۆڕاگرانە و ب لێزانینەکا ب ئەزموون، ل هەمبەری هێرشێن رێکخراوا تیروریستییا “داعش”ێ راوەستییای. ل دەمەکى کو باژێرێن عیراقێ و سووریا، ئێک ل دویف ئێک دکەفتنە د دەستێ تیرۆرستان دا، هێزێن پێشمەرگەی ب رێبەراتییا سەرۆک و لێڤەگەڕ مەسعود بارزانی ب سەربلندى ل سەر هێلێن ئاگرى راوەستییان، نە ب تنێ بۆ بەرەڤانیکرنێ ژ ئەرد و گەلێ کوردستانێ، بەلکو بۆ بەرەڤانیکرنێ ژ خەلكێ سڤیل و پاراستنا هەمو پێکهاتەیێن ئۆلى و نەتەوەیى یێن، کو ل ژێر گەفا ژناڤبرنێ دا بوون.
شەڕێ پێشمەرگەی ل دژى “داعش”ێ نە شەڕەکێ ناڤخۆیى بوو، بەلکو پشکەک بوو ژ شەڕەکێ جیهانى ل دژى دڕندەترین رێکخراوێن تیرۆرستى یێن کو مەترسی و گەف بوون ل سەر بهایێن مرۆڤایەتیێ و ئاشتییا ناڤدەولەتى. دەمێ ئەورۆپا و جیهان د رەوشەکا ترسێ دا بوون ژ بەر بەرفرەهبوونا “داعش”ێ و د مەترسییا لێدانا پایتەختێن مەزن دا دژیاین، پێشمەرگەیێن کورد ل چیایێ شنگالێ، ل دەشتا نەینەوا، ل سنورێن کەرکوک و مەخموورێ.. تد، قوربانى ددان داکو رێیێ ل بەرفرەهبوونا مەترسیێ بگرن بەرى ئەو شەڕ بگەهیتە کۆلانێن پاریس و لەندەن و بەرلینێ. وان ب نوینەراتییا هەموو مرۆڤایەتیێ شەڕ کر و رێگرى ل ژناڤچوونا بهایێن ئازادیێ و پێکڤەژیانێ کر، لەوڕا ب ناڤکرنا جهەکی ب ناڤی پێشمەرگەی د دلێ پاریسێ دا، ب تنێ دانپێدانەکا دادپەروەرانەیە ب رۆلێ وان یێ دیرۆکى.
دانانا ناڤێ پێشمەرگەی ل سەر رێیەکێ ل پاریسێ، گرنگییەکا چەند لایەنی وەردگریت. ئێکەم، رێزگرتنەکا فەرمییە ژ وەلاتەکێ مەزن یێ ئیکەتییا ئەورۆپى بۆ رۆلێ پێشمەرگەی د بەرەڤانیکرنێ ژ بهایێن مرۆڤایەتیێ یێن هەڤپشک دا. دویەم، پەیامەکێ پشتەڤانیێ یە بۆ گەلێ کوردستانێ یێ کو هێشتا بۆ مافێن خۆ یێن رەوا د چارچووڤێ ئاشتى و دیموکراسی و پێکڤەژیانێ دا تێکۆشینێ دکەت. سێیەم، ئەڤ جهـ و تابلۆیە، بیرئینانەکا هەردەمى یە بۆ بەرەبابێن داهاتى ل فرەنسا و جیهانێ، کو ئەو ئازادییا ئەو ئەڤرۆ پێ شاد دبن ب هەرهویى نەبوویە، بەلکو د رێکا وێ دا ب هزاران شەهید ژ کورد و یێن دى کەفتینە.
پاریس، ئەو باژێرێ کو هێمایێ شۆڕش، ئازادى، و مافێن مرۆڤى یە، دەمێ کو ناڤێ “پێشمەرگە”ى ل سەر کۆلان و جهێن خۆ هەلدبژێریت و دادنێت، پەیامەکێ سیاسی و ئەخلاقى د ئێک دەم دا دگەهینیت: کو قوربانیێن ڤان پێشمەرگەیان نە یێن ناڤخۆیى نە و ب جوگرافیایەکا دیارکرى ڤە گرێداىی نینە، بەلکو پشکەکن ژ دیرۆکا خەبات و تێکۆشینا جیهانی یا ل دژى ستەم و تیرۆرێ.
ژ لایەکێ دى ڤە، ئەڤ پرۆژە رەهەندەکێ رەوشەنبیری ژى هەلدگریت، ژبەر کو دەلیڤێ ددەتە فرەنسییان و سەرەدانکەرێن پاریسێ ژ هەموو جیهانێ کو پتر سەرهەلی داستانێن پێشمەرگەی و شەڕێن وان یێن قارەمانانە ببن. جهـ ل ڤێرە نە ب تنێ رێیەکە کو ناڤەکى هەلدگریت، بەلکو دبیتە دەڤەرەک بۆ بیرەوەریێن هەڤپشک و پرەک کو تێکۆشینا گەلێ کوردستانێ ب بهایێن مرۆڤایەتیێ یێن کو فرەنسا شانازیێ پێ دکەت ڤە گرێددەت.
ل دووماهیێ، دشێین بێژین، کو “رێیا پێشمەرگە”ی ل پاریسێ نە ب تنێ تابلۆیەک یان نڤیسینەک، بەلکو هێمایەکێ نەمرە بۆ قوربانیێن، کو ل هەمبەر تیرۆرێ ل نوینەراتییا جیهانێ راوەستیاین. دیسان ئەڤە داخوازییەکە بۆ بیرلێکرنێ د رامانا ئازایەتى دا و دلخوازییا هەیی بۆ بەڕەڤانیکرنێ ژ بهایێن بلند یێن مرۆڤایەتیێ. پێشمەرگەی خوینا خۆ رێژت داکو یێن دى ب ئێمناهی بژین و ئەڤرۆ پاریس سلاڤێ لێ ڤەدگەرینیت ب دانپێدانەکا نەمر یا کو دێ بۆ نڤشان بەردەوام ڤەگێڕیت، کو گەلەک ب ناڤێ کورد هەیە خودان پێشمەرگەیە، بۆ بەرەڤانیکرنێ ژ ئازادى و ئاشتى و هەموو بهایێن مرۆڤایەتیێ ل دژی دڕندەترین هێزا تیرورسیت شەڕ کر.
