شێڤ ئەو زەڤیا بەرهەڤ بۆ چاندنێ، لێ هشتا نەهاتیە چاندن، جوخین هندەک دەڤەر لجهێ بێدەر ب کاردئینن، ئەو جهە یێ دەرامەت لێ دهێتە کومکرن و گێرەکرن و کا و دان ژێک دهێنە جوداکرن و دهێتە ڤەگوهاستن بۆ عمبار و کادینان.
کێشە و ململانا مروڤان ژ کەڤندا ل سەر کاری و عەردی و بەرهەمی و ڤەگوهاستنێ و بازارکرنێ هەبووینە و زیانێن مەزن گەهاندی نە، ژبەر هندێ زانایێن وان سەردەمان پەند و ئاموژگاریێن خۆ ددان داکو شەر چێنەبن و زیان ڤێ نەکەڤن، و ئەگەر ببن ژی ل وان جهان بن یێن کێمتر زیان ژێ چێدبن، لەوان دگوتن شەرێ ل شێڤێ چێترە ژ قەرقەشا ل سەر جوخینێ، لڤێرە شیرەت ل خەلکی دکرن کو کێشێن خۆ ل شێڤێ، ئەو زەڤیا نەچاندی بەری زەحمەتێ پێڤە بەن و بهێتە بەرهەمی چارەکەن، خۆ ئەگەر لوێرێ شەری ژی بکەن دێ زیان بتنێ ب شەرکەرا کەڤیت، و دەرامەت نەهاتیە چاندن کو زیان ڤێ بکەڤیت و کارتێکرنێ ل خەلکی بکەت. بەلێ هەکە بۆ دەمێ کومکرنا بەرهەمی و دەرامەت هاتە ڤەگوهاستن بۆ سەر بێدەرێ، ئێدی دێ کارێن پێتڤی هێنەکرن قرش بهێتە گێرەکرن و کا و دان بهێنە ژێکجوداکرن و ڤەگوهاستن بۆ مالان و عمبارکرن، لوی دەمی هەر قەرقەشەکا ل سەر بێدەرێ چێبیت دێ بیتە هویێ کار راوەستاندنێ و تێکدانا رەوشا بێدەرێ، و ژ گوتنەکا سار پيکدادان چێدبیت و چریسکەکا ئاگری تێرا هندێ هەیە گوڕی ب هەمیێ بکەڤیت و بسوژیت و زیان ب هەمیان بکەڤیت!.
ئانکو مەبەست ژڤێ پەندێ کێشەیێن خۆ د دەمێن خۆدا لجهێ بەرژەوەندێ چارەسەرکەن، و گفتوگو و شەرێ خۆ لوێرێ بکەن و ئێکلاکەن، بەری کەدا کار و رێنجبەریێ بەرهەم بهێت دا زیان مەزن نەبن.
بەلێ دیارە رێڤەچوونا ژیانێ کەفتیە ژێر باندورا حەزێن کەسوکی، و یاسایێن ئاسمانی و یێن مروڤی نەشیاینە مروڤی هەڤسارکەن و بۆ ئاراستەیا باشتر پاژوون، لەوان هەمیشە کێشە و شەر و پيکدادان هەنە!، شەڕ و قەرقەشە ل شێڤێ ژی هەنە و ل جوخینێ ژی و چووینه ناڤ گوندی و کەفتیە ناڤ مالاندا ژی و سەرێ هەمیان پێڤە گێژبوویە و زیان ب هەمیان گەهشتیە!.
جڤاک ب گشتی سیاسی بوویە و لبن باندوڕا پێشکەفتنا زانستی و تەکنولوژی و بیاڤێن سوسیال مەدیایێ هەمی بووینە مەدیاکار و مایێ خۆ د هەمی پرسادا دکەن و ئەڤە مافەکێ سروشتییە، بەلێ پەندەکا کوردی هەیە دبێژیت: پيژتنا نانی بۆ نانپێژی بهێلە، باشە هەر ئێک شولا خۆ بکەت. بەلێ دەمێ بیاڤەکێ چالاکیێن مروڤی باندوڕا خۆ لسەر ژیانا خەلکی هەبیت، لوی دەمی مافێ خەلکی یە ب ئازادی رایا خۆ دەرببڕیت.
هەڤولاتیان ئاسایش و پاراستن و دەرفەتێن کاری دڤێن دا ب ئارامی بژین، سیاسەت ژی کارێ سیاسەتڤانان و لایەنێن سیاسی یە دا بەرژەوەندێن گشتی بجهبینن، ئەو بخۆ ژی هەر هەڤولاتینە کارێ سیاسەتێ هەلبژارتین و دکەن، و لایەنێن سیاسی هيز و رەوایا خۆ ژ مللەتی وەردگرن، و دەنگێن هڤوەلاتیان د هەلبژارتنان و ڕاپرسیناندا دڤێن، دا ب سەرکەڤن و ب ئارمانجێن خۆرا بگەهن.
مللەتی ب گشتی یا خۆ گوتیە و کریە، ل سەردەمێ شورش و سەرهلدانان پێشمەرگەبوونە، و ل هەمبەری دژمن و داگیرکەران سینگێ خۆ کریە مەتال و خۆ کریە گوری و قوربان، و ل هەلبژارتن و راپرسیناندا ژی یا خۆ گوتیە و رایا خۆ دەربڕیە، ئێدی بەرپسیاری یا لایەنێن سیاسییە رێزێ ل ئیرادا مللەتی بگرن و یا مللەتی گوتی بجهبینن.
ل سەر ڤی بنگەهی دڤێت پرسا هەلبژارتنا گەڕا شەشێ یا پەرلەمانێ کوردستانێ ل بارەگایێ پەرلەمانێ کوردستانێ بهێتە چارەسەرکرن، ئەندامێن پەرلەمانی ل وێرێ بەرهەڤ بن و گفتوگو و دانوستاندن و قەرقەشە و حەتا شەرێ خۆ بۆ چارەسەرکرنێ لوێرێ بکەن، ونە ڤەگوهێزن بۆ ناف جڤاکی و نە هێلن زێدەتر سەرێ خەلکی پێڤە گێژبیت و پتر بێزار بن!.
دێ بێژین لبن باندوڕا لایەنێن سیاسی ئەندامێن هندەک لایەنان ئامادەنابن و پرس چارەسەر نابیت، پا چ بکەن!؟ بلا هەلبژارتنەکا دی بکەن و بریاربدەستێن لایەنێن سیاسی سویندا شەرەفێ بخۆن کو پيگیریێ ب یاسا و رێنما و ئەنجامێن هەلبژارتنان بکەن!.
هندە هندی شەرێن ناڤ شێڤا هاتینەکرن و ل سەر بێدەرا و لناڤ گوند و باژێران و کولان کولان و مال بۆ مالان ژی هاتینە کرن و لدوماهیێ ژبلی زیانا و شەرمزاریێ ب نەچاری پێکهاتن کرن، ئەڤجا مادەم هوسانە، و دەماهی هەر پێکهاتنە، کەرمکەن لدیف بنەمایێن دیموکراتیەتێ کێشەیێن خۆ چارەسەرکەن و مللەتی ئارام کەن.
شەڕ و کێشە و ئالوزی و پێکدادان لدەڤەرێ و ل جیهانێ گەلەکن و کوردستان دناڤ وی ئاگری دایە، و دنافخۆدا ژی قەرقەشە و شەرێ سیاسی و مەدیایی دەرونێ خەلکی تيکدایە، ئێدی دبێژن هندی ئەڤ شولە درێژ بوو سەرێ مە پێڤە گێژ بوو!.
مللەت پێتڤی ب رزگارکەرەکی یە، ژڤێ گيژبوونێ رزگارکەت، ب هیڤینە هەمی لایەنێن پەیوەندیدار ل سەر دەستپێشخەریا سەروک بارزانی کوم ببن و ڤێ پرسێ ئێکلاکەن.
دێ بێژین، قەرقەشا مەدیایی چيترە ژ شەرێن چەکداری! لێ یا باش و باشتر هەردوو نەبن و پێکهاتن هەبیت!.
هەر ململانەکێ دوماهیەکا هەی، هەر ئالوزیەکێ ڤەبوونەکا هەی، و هەر کێشەکێ چارەسەریەکا هەی!. و دوماهی هەر پيکهاتنە، ڤێجا مادەم هوسانە، بوچی دێ دەمی ژخۆ بەن و قوربانیان دەن، هەما لوژیکێ ژیری بکاربینن و گفتوگویان ل سەر بنگەهێن دیموکراتی و یاسایی بکەن و بگەهنە ئەنجامەکێ ئەرێنی، مللەتی ئارام کەن و خۆ سەرفراز کەن.
