ب هەلكەفتا جەژنا نەورۆزێ و سەری سالا 2726ێ كوردی، پیرۆزباهییێ ل مالباتێن سەربەرزێن شەهیدان و پێشمەرگەیێن قارەمان و هەمی كوردستانیێن خۆشتڤی ل ناڤخۆ و دەرڤەی وەلاتی دكەم، هەروەسا جەژنا نەورۆزێ ل هەمی وان گەلێن جیهانێ و دەڤەرێ پیرۆز دكەم یێن كو نەورۆز پشكەكە ژ فەرهەنگ و دیرۆكا وان، هیڤیدارم سالەكا تژی خۆشی و بەختەوەری بیت بۆ هەمی لایان.
نەورۆز بۆ گەلێ كوردستانێ هەمی دەمان مزگینییا دەسپێكەكا نوویە و ئۆمێدەكا نوویە و سەركەفتنێ ب سەر ستەمكار و سەختیان دا بوویە، ئەڤە وەكی فەرهەنگەكا دەولەمەند یا بەردەوامبوونێ و تێكۆشانێ بۆ گەهشتنا ب ئازادی و ئاشتیێ د دیرۆكا گەلێ كوردستانێ دا ڕەهێن كویر داكوتانە.
نەورۆزا ئەڤسالە هەڤدەمە دگەل گوهۆڕین و ئالۆزی و گرژیێن زۆر ل دەڤەرا مە و جیهانێ ب گشتی، د ڤی ڕەوشا هەستیار و دیرۆكی دا، پێدڤیە پتر ژ هەر دەمەكێ لایەنێن سیاسی هەماهەنگ و هاریكارێن ئێك بن و پشتەڤانێن بەرژەوەندی و ئارامی و ئاسایشا وەلاتێ مە بن.
هیڤیدارم نەورۆزا ئەڤسالە ببیتە دەسپێكەك بۆ تەبایی و برایەتییا پتر د ناڤبەرا لایەنێن سیاسی و خەلكێ خۆشتڤی یێ كوردستانێ دا، و ئەڤێ نەورۆزێ و هەمی جەژنێن دی ب شادی و كامەرانی ببۆرینن، ئۆمێدا وێ چەندێ دخوازیم گەلێن دەڤەرێ دویر ژ شەڕ و گرژی و ئالۆزیان بشێن د ئاشتی و ئارامیێ دا بژین.
نەورۆزا هەوە پیرۆزبیت و هەر ب خێر و خۆشی بمینن.
