گوتار

بوچی د جڤاکێ مەدا ئاخفتنێن نەرێنی بوینە بەشەک ژ ژیانا ڕۆژانە؟

د ئەڤرۆدا، ئەگەر سەرنج بدەینە ئاخفتنێن ڕۆژانە دناڤ جڤاکی مەدا، دێ بینین کو پەیڤێن نەرێنی بوینە بەشەک ژ ژیانا ڕۆژانە یا گەلەک کەسان و ئاخفتنێن نەرێنی بێی هزرکرن دهێن گوتن. هەروەسا دەربرینا پەیڤێن توند و ڕەخنە ل بەرامبەر ئێک و دوو، شکاندنا هەستان و بەلاڤکرنا رەشبینیێ بویە روتینەکا روژانە ل دەف هندەک کەسان دناڤ جڤاکی دا، تا وی ڕادەی ژی ب شێوەیەکێ نەرێنی بەرێخو ددەنە ڕویدانێن ژیانێ.

راستە، د ژیانا نوکەدا گەلەک فشار و ئاریشە هەنە، لێ جڤاک ژی یێ بوویە پاڵدەرەک ب هێزا خو یا نەرێنی، بۆ پتر بەلاڤبوونا ڤان فشار و ئاریشەیان. وەک یا دیار، ئەم دشێین بێژین ئەڤ چەندە گەلەک بەربەلاڤ بوویە؛ بەلێ نە بتنێ ل دەف تاکی پەیدا بوویە، بەلکو دناڤ خێزان، قوتابخانە، زانکۆ و جهێن کاری دا ژی یا بەرچاڤە.. ژلایەکی دیڤە تورێن کومەلایەتی ژی ڕولەکێ دگێرن؛ جاران دێ بینین پتریا کەسان رادبن ب بەلاڤکرنا دەنگ و باسێن نەرێنی، یان ژی ل سوشیال میدیایێ رادبن ب ڤەکرنا لایفا دەست دەنە رەخنە و کێمکرن و شکاندنا ئێک و دوو، ژبو هندێ داکو پتر لایک و کومێنتان بدەست خوڤەبینن.

ئێک ژ ئەگەرێن سەرەکی یێن بەلاڤبوونا ئاخفتنێن نەرێنی، کاریگەرییا ژینگەهێ و جڤاکێیە، ب تایبەتی ئەو کەسێن دناڤ ژینگەهەکا پری رەخنە و گازندەیێن نەرێنی دا دژین. ئەڤە ژی دشێن ببنە ئەگەر کو ب شێوەیەکێ نەراستەوخۆ ل سەر ڤان ڕەفتاران فێرببن و پاشی ببنە بەشەک ژ ڕوتینا ڕۆژانە، بێی کو هەست پێ بکەن. هەروەسا، فشارێن دەروونی، زێدەبونا فشارێن ژیانا ڕۆژانە و کێشەیێن ئابووری، نەبوونا باوەری بخوبونێ، کێمبوونا کەلتورێ گەنگەشێ و هێزا ئاخفتنا ئەرێنی، دیسان ژی نەبوونا دیتنەکا دروست و گەشبینانە بو ڕویدانان و نە چارەسەرکرنا وان، دشێن ببنە ئەگەرێ بەلاڤبوونا رەشبینیێ.

بەلێ، د راستی دا مە جارەکێ هزرکریە ئەرێ گوتن و پەیڤێن مە چ کارتێکرن ل سەر کەسانێن دی هەیە؟ یان ژی جاران دێ بینین گەلەک کەس هەول ددەن ب رێکا گلە و گازندەیان وێ فشارا دناڤ ناخێ خودا ڤالا بکەن، ئانکو ئەڤە نە بتنێ چارەسەریە بۆ ئاریشەیا وان بەلکو دبیتە ئەگەرێ هندێ کو پتر فشارێ ل سەر خۆ و دەوروبەران دروست بکەت . زێدەباری هندێ، ئاخفتنەکا نەرێنی دشێت باوەری بخوبوونا کەسەکی بشکێنیت، هەست ب نەخوشیێ بکەت و هەتا ببیتە ئەگەرێ دویرکەفتنا کەسان ژ ئێک. دووبارەکرنا ئاخفتنێن نەرێنی دشێن ببنە ئەگەر، کو کەسانێن دی هەست ب بێزاریێ و بێ هیڤیبونێ بکەن و ئەف شێوازێ ئاخفتنێ و نەبوونا گەنگەشەیەکا ساخلەم دشێت بیتە ئەگەر فشارێن دەرونی زێدەببن و کارتێکرنەکا نەرێنی هەبیت ل سەر تەندروستیا دەرونی ژبەرکو هێشتا کلتورێ گەنگەشەیێ و ئاخفتنێ دناف چڤاکی دا یێ لاوازە ..

پتریان دەمان دێ بینین گەلەک کەس ب کرنا گلە و گازندە و ڕەخنەیان، دکەڤنە د ڕولێ قوربانیێ دا، بێی کو بگەهنە ئەنجامەکی؛ ژبەرکو پتر ب کرنا ڤێ کریارێ فشاڕێ ل سەر خۆ زێدەدکەن و کارتێکرنێ ل دەرونێ خۆ ژی دکەن، هەروەسا ل سەر دەوروبەرێن خو ژی، بێی کو چ مفا هەبیت بو هەردوو لایەنان.

بو چارەسەرکرنا ڤێ ئاریشەیێ، پێدڤییە هەر ئێک ژمە ژ خۆ دەست پێ بکەت. هەروەسا، هزر د گوتن و پەیڤێن خو دا بکەت و بێژیت: ئەرێ ئەڤ پەیڤە د پێدڤینە؟ ئەرێ دێ مفای گەهینیت، یان ژی دێ بیتە ئەگەرێ بێ هیڤیبونێ، نەخوشی و بێزاریێ؟ دهەمان دەم دا هەبوونا کەلتورێ گوهداریکرنێ دناڤبەرا تاکان دا دێ بیتە ئەگەر کو پتر لێک تێگەهشتن هەبیت. پێدڤییە ئاخفتن ب شێوازێن جودا جودا هەبیت و رێزگرتن هەبیت د بیروبوچونێن جیوازدا.

ژبەر ڤێ چەندێ، ئاخفتنێن مە قودیکا هزر و ڕەفتارێن ناخێ مەیە. ئەگەر مە ب ڤێت چڤاکەکێ ساخلەم و ئارام دروست بکەین، پێدڤییە دەست ب گهورینا شێوازێ ئاخفتنا خۆ بکەین. چونکی پەیڤ دشێن تاکا ئاڤا بکەن و دشێن بێ هیڤیبونێ ژی پەیدا بکەن. د هەمان دەم دا، جڤاک هەردەم پێدڤی ب هێزا گوتنێن ئەرێنی هەیە، داکو ببنە پالدەرەک ژبو هندێ کو کومەلگەهەکا پێشکەفتی بهێتە ئاڤاکرن.

#خوزیک دوسکی

گۆتارێن پەیوەندیدار

Back to top button
XaniAI Icon پسیار ژ XaniAI بکە