بەرپسیاری ئەرکە، و بجهئینانا ئەرک و کارێن دەستنیشانکریە ل دیف دەستور و یاسایا و پەیرەوان. ئانکو پيگیرکرنە ب جهئینانا وان ئەرکێن پێ هاتیە راسپاردن، و هەلگرتنا بەرپسیاریا ئەنجامێن وێ و لێکەفتێن لێپرسینێ.
هەستکرن ب بەرپسیاریێ پرسەکا وژدانییە، و پيگیریەکا سنجی و جڤاکی و یاسایا هەر تاکەکییە، و دلسوزی و داکوکی کرنە ب ئەنجامدانا وی ئەرکی کو بەرپسیاریا وێ وەرگرتی.
مروڤ کو ژیندارەکێ جڤاکییە و دگەل کومێ دژیت بەرپسیاری ژ هەر گوتن و کریار و رەفتارەکا وی بۆ چێدبیت و دکەڤیتە بەر لێپرسینا جڤاکی لەو دڤێت بژیرانە و لدیف یاسا و داب و نەریتان سەرەدەریێ بکەت.
مروڤ د ژیێ گەهشتنێ دا بەرپرس دبیت و دکەڤیتە بەر کومەکا بەرپسیاریان، بەرپسیاریێ وەکو تاک کو پێ رابیت و بجهبینیت، و پێگیربیت ب بەهایێن مروڤی یێن سنجی، و بەرپسیاریا جڤاکی چ وەکو ئەندام یان بەرپرس د خێزانەکێ دا، یان توخمەکێ کارا یێ جڤاکی بیت د بیاڤێن سیاسی و ئابوری و روشنبیری دا، کو پێگیر دبیت ب یاسا و داب و نەریتێن جڤاکی و یێن کاری.
هەنە حەژ بەرپسیاریێ دکەن وەکو پلە و پایە و دەستکەفت، و داکو خۆ نیشا بدەت ئەو ژی تشتەکە دجڤاکیدا و دەستکەفتیا ب دەست خۆڤە بینن، و هەنە ژی حەژ بەرپسیاریێ دکەن داکو ئەرکەکی بجهبینن، و ئەڤە هەستکرنە ب بەرپسیاریێ و مروڤين ژڤی توخمی گرنگیا بەرپسیاریێ دزانن و ب دلسوزی کاردکەن دا وی ئەرکی ب شێوەکێ باشتر بجهبینین.
گەلەکا گرنگ و پێتڤییە یێ دلێ خۆ دبەتە فەرمانبەریەکا گشتی یان پلە و پایەکێ تێبگەهیت بەرپسیاری چییە، و د ئەرکێ خۆ بگەهیت و بدلسوزی کار بکەت بۆ بجهئینانا ئەرکێن وێ بەرپسیاریێ، و بزانیت د بەرپسیاریێ دا ئەو بەرپرسە ب ئەنجامدانا ئەرکێن خۆ لدیف دەستهەلاتێن پێ هاتینە دان، هەروەکو بەرپرسە ل هەر کێماسیەکی و کەمتر خەمیەکێ، و دێ کەڤیتە بەر لێپرسینی و ليکەفتێن وێ یێن یاسایی و سیاسی و جڤاکی.
دڤێت هەردەم و د هەمی ئەرک و کاراندا مروڤ یێ ب وژدان بیت، و ب وژدان سەرەدەریێ دگەل بەرپسیاریێ بکەت، و
وی ئەرکی بۆ مەبەستێ کەسوکی و بەرژەوەندێن تایبەت بکارنەئینیت، دا کاروبار باشتر برێڤە بچن و شاشی و سەرپێچی کێم ببن، و پرانسیبێن دادپەروەریێ بجهبهێن، و رازیبوونا تەڤایی چێبیت، بەروڤاژی ڤێ دێ ستەم و زوری هێتە بکارئینان، و قورغکاری هێتەکرن، و مەبەستێن کەسوکی و بەرژەوەندێن تایبەت بجههێن، و نەرازیبوون چێبیت و سەقامگیری تێک چیت.
یا سروشتیە پلە و پایە دلخواز بیت، و کار بۆ بهێتە کرن، بەلێ بۆ هەر کارەکی و بتایبەتی بۆ یێن گشتی دڤێت مروڤ ل ئاستێ وی ئەرکی بیت و هەژی وێ بەرپسیاریێ بیت، و هەست ب بەرپسیاریا وێ بکەت، و بشێت ب سەرفرازی بەردەوامیێ بدەتە ئەرکێ خۆ، و ببیتە جهێ رێزگرتنێ، و باوەریا خەلکێ.
گرنگە هەر مروڤەک کار بکەت و یێ دلسوز و پاقژ و بنەجهـ بیت د کارێ خۆدا، چونکی دي کەڤیتە بەر لێپرسینا یاسایی و جڤاکی و خودایی.
بارزانیێ نەمر د فەرموود: (دڤێت مروڤ لایەنگیرێ دادپەروەریێ و وژدانێ و وەکهەڤیێ بیت دژیانێ دا)، ئەڤە ستونێن ب دەستڤەئینانا رازیبوونێ و پشتراستکرنا خەلکی نە، ژ مروڤی دهێتە خواستن بجهبینیت دا ئارمانج بجهبهێت.
خودي مەزن دبێژیت: (و بێژە: کار بکەن، خودێ و پەیامبەرێ وی و باوەردار دێ کار و کریارێن هەوە بینن، و پاشی هوین دێ هێنە زڤڕاندن بۆ دەف وی خودایێ زانایێ نهێنی و ئاشکرایان، ڤێجا دێ هەوە ژ وان کاران ئاگەهدار کەت یێن هەوە دکرن).هەروەسا د فەرموود: (وان رابگرن، ب ڕاستى دێ پرسیار لێ هێنەكرن). ئەڤە ئاگەدارکرنا خودێ یە بۆ بەنیێن وی کو چارەنڤیسێ وان گرێدای کارێن وانە.
پەیامبەر د فەرمود: (هین هەمی شڤانن و هەر ئێک ژی بەرپرسە ژ شڤانیا خۆ).
لڤێرە جيگیر دکەت کو شڤانی ئەرکە و بەرپسیاری لێ دکەڤیت، و بەرپسیاری یا هەمیانە هەر ئێک ل ئاستێ وی ئەرکێ ل سەر ملێن وی.
بڤێ چەندێ خۆیا دبیت مروڤ بەرامبەر ئەنجامدانا ئەرک و کاران دێ کەڤیتە بەر لێپرسینا وژدانی و جڤاکی و یاسایی و خودایی.
و هەر دەمێ ئەرک و کار لدیف ڤێ فەرموودان بهێنەکرن بهێنە کرن دێ دادپەروەری و وەکهەڤی بجههێت، و رازیبوون بدەستڤە هێت و ئارامی جێگیربیت.
