چەند نەخوشە مروڤ کەسەکێ پەککەفتی یان دین یان هەژار یان لاواز یان یێ بەلنگاز ببینیت و نەشێت چ بۆ بکەت ژ وێ تەنگاڤیێ دەرباز کەت، گەلەکا نەخوشە تو گەنجەکی ببینی زانکویا تەواو کری و باوەرنامەکا وەرگرتی و کارەک ب دەست نەکەڤیت، هەروەسا یا نەخوشە تو ببینی ل بەر تەحرا چلێ هاڤینێ کومێن پالا ل جهێن شولی د راوەستا بن و کەس بکار نەئێخیت، ئەو ژی یا نەخوشە نهانیەک نەبیت تێڤە ب حەویێت، و پارێ دختور و دەرمانان نەبیت، یا ژ هەمیا نەخوشتر بەریکا ڤالا بیت و قەستا مالا خۆ بکەت!.
چ گونەهە ئەڤ مروڤێ نازک و نازدار یێ بێ بەهربیت ژ پێتڤیێن بنەکیێن ژیانێ، و دڤان دەرد و ژاناندا بنالیت!. دهەمان دەمدا ببینی هندەکێن دی د هەمی بیاڤاندا ببەرفرەهی و خوشگوزەرانێ دا بژین، بۆ وان دلا بخوازە بیت!، هەکو دبێژن: (هندەک بۆ دمرن و هندەک پێ دمرن). راستیەک هەیە دڤێت لبەرچاڤ بیت، ئەوژی هەر دەولەمەندیەکا نە رەوا ژ مافخوارنەکا نە رەوا دهێت، و بێزاریێ و نەرازیبوونێ چێدکەت و کێشە لێ دکەڤن!. و هەستەک چێدبیت کو ستەم و چەوساندنا هەی.
ئەڤە ستەم و چەوساندنا مروڤیە چ سروشتی بیت یان چيکری بیت.
گەلەک جورێن چەوساندني هەنە، یا جڤاکی و یا چینایەتی و یا سیاسی و یا ئاینی و یا ئابوری و یا رگەزی و یا ئەتنی و رەنگی و یا سروشتی. هندەک هەنە چ جورێن ستەم و چەوساندنێ نەدیتی نە، هەکە د دەولەتەکا سەبەخۆ و دجڤاکەکێ بەختەوەر دابیت، و هەنە هندەک دیتی نە، و کوردان تایبەتی چینا هەژار و ژوانا ئافرەتان هەمی دیتی نە، کو ئافرەتە، چەوساندنا رەگەزی دیتیە، کو کوردە چەوساندنا نەتەوەی دیتیە، کو هەژارە چەوساندنا چینایەتی دیتیە، ژبلی گڤاشتنێن جڤاکی و ئاینی و سیاسی و سروشتی، و د هەمی ڤان جوراندا، مروڤ ململانا خۆ دکەت ژبۆنا ئازادیێ و ئاسایشێ و ژیانەکا بەختەوەر.
ئانکو دڤێ هەبوونێ دا بەختەوەری پێتڤییە و ئارمانجە.
مروڤی تەمەنەکێ ژیانێ هەیە، وهەکە تو ب چار قوناغ دانی، چارێکا ئێکێ یا نەبخویێ و بێ دەستهەلاتیێ یە، یا بخودانکرن و پەروەردەکرن و فێرکرن و پيگەهاندنێ یە، ئەوژی چاوا و ب چ شێوە و ب چ ژیر و ب چ کەرستە!؟، لەوان مەرچ نینە کەسانەک ساخلەم و چاک و ووچ ژێ چێبیت!، و چاريکا دی یا خۆ ئاڤاکرن و پيکئینان و بەرپسیاریێ و بەرهەمداریێ یە، ئەو ژی ژبەر کومەکا هوکاران مەرج نینە مروڤێ سەرکەفتی بیت!، و قونا غا دیفدا قوناغا گەهشتنێ و ئارامیێ و سەقامگیریێ و پشتراستبوونێ یە، ئەو ژی لژێر باندورا هەردوو قەناغێن بەرێ، ب ئەرێنی یان ب نەرێنی ب ئەنجام دهێت، و قوناغا دوماهیێ ژی ئەو ژی هەکە تەمەنی هاریکار بیت و قوناغێن بەر ب ئەرێنی بن دێ ئارامیەکا ب پەند و وانە و سەربۆڕ بیت و بێهیڤیبوون سەرهەلدەت و بەرەف پیربوون و لاوازبوون و نەمانێ چیت!. و هەر قوناغەکێ ژی گوهورینێن خۆیێن تایبەت یێن جەستەیی و ئەرکان و هزرکرنێ و کەساتیێ هەنە، ئاستەنگ و هەلنگفتنێن خۆ هەنە، و ژ ئێکی بۆ ئێکێ دی جوداهی هەنە، و ژینگە و بارودوخێن جڤاکی و ئابوری و ئاینی و سیاسی باندورا خۆ دکەت.
و ل هەمی وان قوناغان مروڤ دکەفیتە بەر ئێش و نەخوشی و دەردەسەری و بێ بەهرییێ ژ گەلەک پێتڤیان، و ئەوێ ب بەختە یێ ساخلەم و د ژینگەهەکا باش و ئارامدا مەزن د بیت و بشێت هیڤی و خواست و ئارمانجێن خۆ بجهبینیت.
مروڤی دڤێت ب ئارامی و ب سەرفرازی و ب بەختەوەری بژیت، بەلێ بێ بەختیا مروڤییە، کو بژیت ب گرفت و کێشە و ئالوزی و ب کەسەر، خۆ هەنە هەر ژبوونێ پەککەفتی و لاواز و دەبەنگ و ددین، کو د ئێش و ئازارندانە و سەرئێشێ بۆ یێن دی ژی چێدکەن ە د هەژاریي دا دژین، وهەنە د ساخلەم و دژینگەهەکا ساخلەم و باش دا دژین و رێ یا وان یا خوش و ڤەوژارتیە، و ب دفن بلندی دژین!.
هەمی مروڤ ب پيکهاتێ خۆیێن جەستەیی و ب هەستان ڤە وەکهەڤ هەڤن، لەوان یا پێتڤییە خۆ ئەگەر هندەک جوداهیێن چینایەتی و ئەتنی و ئاینی ژی هەبن، پێتڤییە وژدان و دادپەروەری ژی هەبیت و مافێن ژیانێ و بەختەوەریێ بەر ب هەمیان بکەڤیت.
بەختەوەری پێتڤیا مروڤانە چ تاک چ کوم چ کومەل چ مللەت، لەو بوویە ئارمانجەکا سەرکی یا مروڤی و کار و بزاڤێ بۆ دکەت.
بەختەوەری هەستێن نافخویێن مروڤی یە، کو مروڤی پشتراست و دلخوش و رازی دکەن، و دکەڤیتە ژێر باندورا هوکارين ساخلەمی و ژیری و دەرونی و جڤاکی و سیاسی و ئابوری و روشنبیری. بەختەوەری حەز و ڤیانا مروڤی یە، لەوان، ل هەر جهـ و دەمان بوویە هیڤی و ئارمانجا مروڤی، بۆ خۆ و بۆ جڤاکی و لوی دەمی بجهـ دهێت دەمێ هەمی پێتڤیێن مروڤی و جڤاکی یێن بنەکی وەکو ئاسایشێ و ئازادی و مافێن ئابوری دابین دبن و مروڤ پێ ئارام ببیت، و مروڤ خاستیێ بەختەوەریێ و پێشڤەچوونا بەردەوامە لەو دڤێت کاری بۆ بکەت.
ل هەمی ئەرک وکاران هەر مروڤ لێگەرێ بەختەوەریێ یە، ئەڤ بەختەوەریە د وارەکێ سەقامگیر ب داهينانێ و سەرکەفتنێ دکاری دا و ب هەڤگونجاندنا جڤاکی و ب دەستکەفتیێن مادی و مورالی دهێت.
هەلبەت بنەمایێن بەختەوەریێ یێن هەڤپشک هەنە، بەلێ جواهی ل رادێ بەختەوەریێ ژ تەمەنەکی بۆ ئێکێ دی، و ژ تاکەکی بۆ ئێکێ دی و ژ جڤاکەکی بۆ ئێکی دی و ژ کلتورەکی بۆ ئێکێ دی هەنە، و دژیانێ دا گەلەک ب دەرد و کەسەرا دمرن و ناگەهنە ئارمانج و مەبەستێن خۆ، و هندەک ژی دبنە گوری و قوربانێن رەنجا خۆ و نابینن، و هندەک ژی دبنە گوری و قوربان بۆ ئارمانج و مەرەمێن هندەکێن دی، قو هەنە ژی ل سەر خۆین و گیان و کەدا هندەکێن دی بەختەوەریەکا دەمکی دبینن!.
ئەڤ مروڤێ هوسا نازک و خوشتڤی دڤێ ژیانا پری ئالوزی و رکەبەری و پێکدادان هەژی ژیانەکا بەختەوەرە، و ئەڤ بەختەوەریە ژ بەرپسیاریا تاکی و خێزانێ و جڤاکی و دامەزراوێن گشتی و دەستهەلاتداریە، هەر ئيک ل رادێ ئەرک و کارێ خۆ ژێ بەرپرسە.
خۆ ئەڤە حەز و پێتڤیەکا بسانا هی نینە، لەوان هەمیشە د هەمی ژینگەهـ و بارودوخاندا بوویە ئارمانجەکا کاربوکریا بەردەوام، هەر بیروباوەرەک و ئاینەک و سازیەکا گشتی و رێکخستنەکا سیاسی، ژ تاکی تا دەولەتێ بەختەوەریا تاکی و جڤاکی پێناڤی ئارامیێ و سەقامگیریا جڤاکی و نیشتیمانی و دەولەتێ د کارناما خۆدا دانایە. و تنێ هندەک دەولەت تێدا سەرکەفتی بووینە و شیاینە خەلکێ خۆ بەختەوەرکەن بجهئینانا دادپەروەریا جڤاکی و ئابوری و خوشگوزەرانیا تاکان و ئاسایشا نافخۆیی و خزمەتێن بنەکی، و بڤێ چەندێ نیشتیمانێ خۆ ئارام و سەقامگیرکریە.
مروڤ پێتڤی ژیانەکا ئارامە و هەژی سەرفرازیێ و بەختەوەریێ یە، دا بهایێ مروڤی بزانین و بەهایێن مروڤایەتیێ بجهبینین و پێکڤە کارکەین ژبۆ دابینکرنا ئارامیێ و بەختەوەریێ.
