ب ناڤێ خودێ یێ مەزن و دلۆڤان
وەکی هەمی لایەک ئاگەهدارن، ل گوڕەی ڕێککەفتنا د ناڤبەرا هێزێن هەڤپەیمانان و حکومەتا عیراقا فیدرال دا، ئەڤرۆ 30ی ئەیلوولا 2026 دواهیین ڕۆژە بۆ ب دوماهیک هاتنا ئەرکێ هێزێن هەڤپەیمانان ل عیراقێ و هەرێما کوردستانێ.
هەڤپەیمانان د شەڕێ دژی تیرۆرێ دا و هەروەسا د زڤڕاندن و ب هێزکرنا ئارامیێ دا ل عیراقێ پشتەڤانیا هێزێن عیراقێ و هێزێن پێشمەرگەیی کر.
هێزێن هەڤپەیمانان د ماوێ مانەڤا خۆ دا هاریکاریەکا گەلەک مەزن یا هێزێن عیراقێ و هێزێن پێشمەرگەیی کر و تەنانەت قوربانیێن زێدە ژی دان. نوکە ژی پشتی ب دوماهیک هاتنا ئەرکێ وان، ئەڤە د پاشەڕۆژێ دا بۆ حکومەتا عیراقێ و هەرێما کوردستانێ دمینیت کو ل گوڕەی ڕەوش و مەرجان و ژ بۆ پاراستنا ئارامیێ، ڕێککەفتنێن دووقۆڵی دگەڵ وەلاتێن هەڤپەیمان بکەن.
ل ڤێرێ جهێ خۆ یە سوپاسیا هەوڵ و ماندیبوونا هێزێن هەڤپەیمانان بکەین، ڕۆڵێ وان د تێکشکاندنا داعشێ و زڤڕاندنا ئارامیێ بۆ عیراقێ جهێ ڕێز و پێزانینەکا مەزنە. هەروەسا سڵاڤان بۆ گیانێ پاقژ یێ هەمی شەهیدێن پێشمەرگەی، هێزێن عیراقی و هێزێن هەڤپەیمانان دشینین و بیرهاتنا وان دێ هەر ب بەرزاتی مینیت.
دەربارەی هەرێما کوردستانێ ژی گەلەک کەس ژ بەر پەرۆشیێ و هندەک ژی ژ بەر کین و لێکدانێن نەدرست وەسا هزردکن کو ب نەمانا هێزێن هەڤپەیمانان ئێدی هەرێم ژی دێ کەڤیتە بن گەف و مەترسیێ و دێ دوماهیک پێ هێت. ئەز دخوازم خەلکێ خۆشتڤی یێ کوردستانێ ژ وێ یەکێ پشتڕاست بکەم کو هەماهەنگیەکا گەلەک باش دگەڵ حکومەتا عیراقا فیدرال دا هەیە بۆ بەرسڤدانا هەر جۆرەکێ گەف و مەترسیێ، چ ئەو گەف د بن ناڤێ داعشێ دا بیت ئان ژی هەر ناڤەکێ دی بیت.
هەر کەس و لایەنەکێ خەیالا وێ یەکێ هەبیت ببتە گەف و زیانێ بگەهینتە ئارامیا هەرێما کوردستانێ، بلا بزانیت کو ل کوردستانێ ب قەدەر پێدڤی پێشمەرگە و قەهرەمان و گیانفدایێن وەلات هەین کو بەرەڤانیێ ژ خەلک و ئاخا کوردستانێ بکەن و هەمی گەف و دەستدرێژیان تێکبشکێنن.
هێزا پێشمەرگەیێن کوردستانێ ژی کو ڕەهـ و ڕیشالێن وێ د مێژووا خەباتا ڕزگاریخوازیا کوردستانێ دا هەنە و زادێ خوێنا شەهیدان و ڕوندکێن چاڤێن دایکێن شەهیدانە، دێ هەر مینیت. هێزا پێشمەرگەیێن کوردستانێ ب هەماهەنگیا تەمام دگەڵ هێزێن عیراقا فیدرال دا، ئامادەنە بۆ بەرەڤانیێ، پاراستنا ئارامیا وەلات و نەهێلانا هەمی جۆرێن گەف و مەترسیان.
مەسعود بارزانی
30ی ئەیلوولا 2026
