بارزانیێ نەمر دبێژیت:. (ئەڤە شەرەفەکا مەزنە ، کو وەکو پێشمەرگەیەک د شورەشا ئازادیێ دا پشکدار ببم). هەروەسا د فەرموود: (هندی چەکێ پێشمەرگەیاتیێ د دەستێن من دا بیت، ئەز خودانێ بریارا خۆ مە).
سەروک مسعود بارزانی دبێژیت: ( ب سەرفرازی ڤە دبێژین بو من پیروزترین و بلندترین پلە و پایە پێشمەرگەیاتیە). هەروەسا دبيژیت (پێشمەرگە ژ دایکبوویێ خوین و خەبات و روندکێن گەلێ کوردستانێ یە، چەکێ پێشمەرگەی پارچە ئاسن و کوگەهـ و ئامرازێ شەرکرنێ نینە، چەکێ پێشمەرگەی دیروک و فیداکاری و کەرامەت بیروباوەرا وی یە، چەکێ پێشمەرگەی ئەو سوز و پێگیربوونەیە کو هەردەم بۆ گەل و ئاخ و نیشتیمانێ وی یێ هەی).
ئەز بخۆ ژی ل سەر رێبازا پارتی و بارزانی بویمە پێشمەرگەیێ کوردستانێ، ئەرکێ من دگەل پێکهاتێن پێشمەرگەی خەباتکرن بوو ژبۆ رزگارکرن و پاراستنا کوردستانێ، ئانکو پێشمەرگەیاتی ئەرکەکێ نەتەوەیی و نیشتیمانی و مروڤی یە.
پێشمەرگە ئەو هێزا خۆبەخشا رێکخستیا چەکداریا کوردستانێ یە، هاتیە دامەزراندن و رێکخستن داکو خەباتا چەکداری بکەت و گیانێ خۆ پێشکێشی رزگارکرن و پاراستنا کوردستانێ بکەت،
پێشمەرگە هێزا لەشکەرێ کوردستانێ یە، پێتڤیەکا نەتەوەیی و نیشتیمانیا کورد و کوردستانێ یە یا هاتیە پيکئینان ژبۆ رزگارکرن و پاراستنا کوردستانێ.
هەر ئێکێ چەکێ پێشمەرگەیاتیێ ب هەلگریت، خۆ ب پێشمەرگەیێ کوردستانی دزانیت، و ئارمانجا وی رزگارکرن و پاراستنا کوردستانێ یە، و ئەڤ ئەرکە ب سەرفرازترین کارێن نەتەوەی و نیشتیمانی و جڤاکیێن کوردستانێ دهێتە نیاسین، چونکی پێشمەرگە ئەو کوردێ دلسوزە یێ خەبات و تێکوشینێ دکەت و قوبانیێ ب خوین و گیان و سەر و مالێ خۆ دەت ژبۆ رزگارکرن و پاراستنا کوردستانێ.
پێشمەرگە گرنگترین و کاریگەرترین هوکارێ دابینکرنا ئاسایشا نەتەوەیا کوردستانێ یە. و ژبەر گرنگیا رولێ پێشمەرگەی، ل هەرێما کوردستانێ وەزارەتەک بناڤێ وەزارەتا پێشمەرگەی دامەزراندیە،و لدیف یاسایێ کاروبارێن پێشمەرگەی هاتینە رێکخستن و برێڤەبرن.
سەروک بارزانی د فەرموود: (دەمێ پول بریمەری حاکمێ ئەمریکی ل ئیراقێ هەولدا پێشمەرگەی ب رێزا میلیشیا دانیت و حەل کەت، من گوتێ: پێشمەرگە میلیشیات نینە، پێشمەرگە بە بریارەکێ دروست نەبویە حەتا ب بریارەکێ حەل ببیت، نە ب بریارا من و نە ب بریارا تە و نە ب بریارا هیچ کەسەکی، پێشمەرگە ب خوین و روندکێن مللەتەکی دروست بویە، خەلکێ دی ب بریارەکێ دروست بوینە و دشێن ب بریارەکێ حەل ببن، کو بریمەری گوتی ئەڤە بو من خەتا سورە، من بەرسڤ لێدا و گوتێ ئەڤە بو من دە جارا خەتا سوورە و پێشمەرگە حەل نابیت. و ئەڤە ئەز چوومە کوردستانێ زەلام بە وەرە پێشمەرگەی حەل کە باشە)!.
پيشمەرگەی ل سەردەمێ شورەشا رزگاریخوازا کوردستانێ یاسایا لەشکەرێ شورەشگێرێ کوردستانێ هەبوو و ل سەر دچوو، و پشتی دامەزراندنا هەرێما کوردستانێ پەرلەمانێ کوردستانێ یاسایا وەزاتەتا کاروبارێن پێشمەرگەی دەرئینا و کارپێکر، و ل سالا ٢٠٠٥ ێ وەرە بوویە دامەزراوەکا دەستوریا کارپێکری ل ئاستێ دەولەتا عیراقێ و بودجە بۆ هاتیە تەرخانکرن.
ل برگا ٥ ژ بەندێ ١٢١ ێ دا هاتیە:
ژ تایبەتمەندیێن حکومەتا هەرێمێ یە ب هەر پێتڤیەکا کارگێریەکا هەرێمێ رابیت و ب تایبەتی ئاڤاکرن و رێکخستنا هێزێن ئاسایشا نافخویا هەريمێ، وەکو پولیسا و ئاسایشێ و زێرەڤانێن هەرێمێ ( پێشمەرگە).
هوسا دیاردبیت کو ل هەمی ئاستاندا پێشمەرگە، پێشمەرگەیێ کوردستانێ یە، هەر تاکەک کو دبیتە پێشمەرگە، خۆ دەتە نیاسین ب پێشمەرگەیێ کوردستانێ، و حەتا ئەو هێزێن سیاسیێن هێزێن پێشمەرگەی پێکئیناین ب پێشمەرگەیێن کوردستانێ دەنە نیاسین، هەوەکو مللەت ژی یێ بڤی ئەرکی رابیت ب پێشمەرگەیێ کوردستانێ نیاس دکەت، و ل ئاستێ حکومەتا کوردستانێ ژی هەر بناڤێ پێشمەرگەیێ کوردستانێ نیاسیە، و ل ئاستێ عیراقێ ژی هێزێن پێشمەرگەی یاسایی کریە، و ل ئاستێ جیهانێ ژی هەر بناڤێ پێشمەرگەیێ کوردستانێ هاتیە نیاسین.
هەر چەندە د هندەک قوناغاندا ژ ئەنجامێن ناکوکیێن سیاسی، هێزێن سیاسی ململانێ بپێکهاتێن پێشمەرگەی کرینە و دژی هەڤدوو بکارئیناینە لێ هەر دوی دەمیدا ژی هەر د سەنگەرێ کوردستانێ دابوونە، و ل هەمبەری داگیرکەرێن کوردستانێ ملبملێ هەڤ بوونە دژی دژمنێن کوردستانێ. ژبەر هندێ پێتڤیەکا نەتەوەیی و نیشتیمانی بوویە ناکوکیێن سیاسی دناف پێکهاتێن پێشمەرگەیدا نەمینن و بهێنە ئێکخستن، و خوشبەختانە ئەڤروکە ٢١ ێ ئەیلولا ٢٠٢٦ ب ئامادەبوونا رێزدار نێچیرڤان بارزانی سەروکێ هەرێما کوردستانێ و رێزدار مەسرور بارزانی سەروکێ حکومەتا هەريما کوردستانێ و ئامادەبونا کاربدەستێن پەیوەندیدار رێورەسمێن راگەهاندنا ئێکخستنا پێشمەرگەیێ کوردستانێ هاتنە برێڤەبرن و وەکو سازیەکا فەرمیا کوردستانێ هاتە ناسکرن، رێزدار نێچیرڤان بارزانی گوت: دڤێت پێشمەرگە هێزەکا نیشتیمانی بیت دوور بیت ژ دەستێوەردان و ناکوکیێن حزبی، هەروەسا د فەرمود: دڤێت پێشمەرگە ل سەر هەڤرکیێن حزباتیێ بمینیت جونکی هێزا حزبی نینە بەلێ هێزا کوردستانێ یە، چ هێزەک ل دەرڤەی وەزارەتا کاروبارێن پێشمەرگەی نامینیت، داخوازێ ژ حکومەتا عیراقا فیدرال دکەین لدیف دەستوری و یاسایێ سەرەدەریێ دگەل پێشمەرگەیدا بکەت. پێشمەرگە خودانێ دیروکەکا پرشنگدار، لەوما ئەڤروکە ئەم ڤێ دیروکێ و سەرجەم ڤان قوربانیدانان دناڤ ئێک دەزگەهێ نیشتیمانی دا کومڤەدکەین، دیروکەکا چەندین نڤشێن پێشمەرگەی دروست کرینە، دکەینە هێزەکا ئێکگرتی بۆ پاراستنا پاشەروژا کوردستانێ ، باشترین وەفاداری ژی شەهیدێن مە ئەوە کو قوربانیدانا وان بکەینە بنەمایێ پێکڤەکارکرنێ و ئێکرێزیا نافخویا مە.
هەروەسا رێزدار مەسرور بارزانی د فەرمود: ئەڤرۆ روژەکا دیروکی یە بۆ کوردستانێ و بۆ پێشمەرگەی و روژەکا گەلەک تایبەتە ژی بۆ من بخۆ، کو هەر ژ روژا ئێکێ یا دەستبکاربوونا من وەکو سەروکێ حکومەتا هەرێما کوردستانێ ، د کارنامەیا کابینا نەهێ یا حکومەتێدا مە سوز دا ژی ب هەموو شیانێن خۆڤە کار بۆ ئێکگرتنا هێزا پێشمەرگەیێ کوردستانێ بکەین،لەوما دەمێ چار سالێن بوری دا ل بن رێنمایی و سەرپەرشتیا راستەوخۆ یا سەروک بارزانی کو رولەکێ کاریگەر د ئيکخستنا هێزێن پێشمەرگەی دا هەبوو، و ب هەڤکاری و پشتەڤانیا کاک نێچیرڤان بارزانی سەرەکێ هەرێما کوردستانێ و دوستێن مە ل ئەمریکا و هيزين هەڤپەیمانان، پشتی چەندین کومبون و کارکرنا چر و کارێ بێ راوەستان، مە شیایە بگەهینە ڤێ قوناغا نهۆ کو ئەڤرۆ ئێکگرتنا هێزێن پێشمەرگەی رابگەهینین. ئەڤ ئێکگرتنە، چەند گرنگە لێ قوناغا داهاتی گەلەک گرنگترە، کو ئەو ژی پێک دهێت، ژ قوناغا پێشڤەبرنا شیانێن سەربازی و دابینکرنا چەکێ پێشکەفتی و بەرگریا ئاسمانی و پێشخستنا شیانسازیا پێشکەفتی یا هەمە لایەنێن پێشمەرگەی، و ب تایبەتی شیانێن مروڤی، و گرنگیدان ب ئاست و جورێ مەشقا لەشی و هشیاریا پێشمەرگەی ب گورەی پیڤەر و ستاندارێن سەربازیێن یێن نێڤدەولەتی و بکەینە هێزەکا نیشتیمانیا پیشەیا رێکخستی و هەڤگرتی و ل ئاستێ ئەرک و بەرپسیاریا نیشتیمانی دابیت بۆ بەرهنگاریا ئالینکاریا و پاراستنا ئاسایش و سەقامگیریا هەرێما کوردستانێ.
سەرفرازە پێشمەرگەیێ کوردستانێ ب ئەرکێ خویێ نەتەوەیی و نیشتیمانی.
پیروزبیت ئيکخستنا پێشمەرگەیێ کوردستانێ.
بژی پێشمەرگه
