دوزێن نەتەوەیی ب بریاردانا چارەنڤیسیا مللەتی بدروستاهی چارەسەردبیت، ئەڤە ژی د دەولەتين رژيێمێن دکتاتوری و شوفینی ب رێکا خەبات و شورەش و سەرهلدان بجهدهێت، و د دەولەتێن دیموکراتیدا ب راپرسینێن گشتی و ئازاد دا بجهدهێت. و ل هەردوو رەوشاندا دڤێت هێز و شیانێن بجهئینانێ و سەقایەک و بارودوخەکێ گونجای یێن نافخویی و بابەتی بۆ هەبیت.
کوردان ژ کەڤندا ئازادی و دەولەت ڤیایە و کار و خەبات بۆ کریە، و ل هندەک سەردەمان دەولەت و میرنشین ل کوردستانێ چێکرینە، و پاشی کەفتینەڤە بەر لێمشتێن درندانەیێن دژمن و داگیرکەرێن کوردستانێ و ژناڤبرینە، لێ ئەڤ حەز و ڤیانە هەر هەبووینە و کرینە ئارمانجێن بزاڤ و شورەش و سەرهلدانێن سیاسیين کوردستانێ، لێ مخابن هێزێن دەرەکی و داگیرکەران نەهێلا کوردستان ب ئارمانجين خۆیێن نەتەوەیی شاد ببیت، و کوردستان داگیرکر و دابەشکر و ليکڤەکر، و سیاسەتێن بەهژاندنێ و ژناڤبرنێ دژی کوردستانێ بکارئینان!. و سەرەرای وان هەمی سیاسەتێن سەرکوتکەر و دژمنکارانە لێ کورد و کوردستان هەرمان، و خەباتا رزگاریخوازا کوردستانێ ب شێوازێن جوراجور درێژی کێشایە و د بەردەوامن.
حەز و ڤیانێن کوردستانیان دیارن و ئارمانج زەلالە، و ل ریفڕاندومێ، راپرسینا تەڤایا ٢٥ ئەیلولا ٢٠٢٥ ێ گەلێ باشورێ کوردستانێ ب ئاشکەرایی دەنگێ خۆ دا بۆ سەربەخۆیا کوردستانێ، و ئەڤ ئارمانجا تەڤ کوردستانیانە، بەلێ بجهئینانا وێ دکەڤیتە بن هوکارين نافخویی و بابەتی. یێن نافخۆیی خۆ ئەگەر هێزێن سیاسیێن کوردستانێ د هەڤگرتی ژی نەبن، لێ رایا مللەتی دیارە و بریارەکا پێگیرە، و دڤێت ل ئاستێ نافخۆ ب هەڤگرتن پلانەکا گونجای بۆ بهێتە دارێژتن و کار بۆ بهێتە کرن دا هوکارێن بابەتی بۆ بەرهەڤ بن وهەبوونا کوردستانا سەربەخۆ بهێتە پەژراندن.
هوکارێن بابەتی یێن رێگر گەلەکن، ل ئاستێ دەولەتێن داگیرکەر هەر ئێک بتنێ، و ل ئاستێ دەولەتێن هەريمایەتی پێکڤە و ل ئاستێ نێڤدەولەتی.
یا ئاشکەرایە هەر دەولەتەکا داگیرکەر دانێ ب هەبوونا پارچەکا کوردستانێ د سنوورێ وێ دەولەتێ دا ناکەت، و سیاسەتێن سەرکوتکرنێ و بەهژاندنا کوردان دهاژون، و د بەرهەڤ نینن دانپێدانێ ب مافێن نەتەوەیێن کوردستانێ بکەن، و ل ئاستێ دەولەتێن هەرێمایەتی یێن داگیرکەر، رێکەفتنێن هەرێمایەتی هەنە بۆ سەپاندنا سیاسەتێن سەرکوتکەر و لێدانا هەر بزاڤەکا رزگاریخوازیا کوردستانێ ل هەر پارچەکێ، و ل ئاستێ نێڤدەولەتی ژی خۆ کوردستانا مەزن د چارچوڤي رێکەفتنێن نێڤدەولەتیدا دابەشکریە و ليکڤەکریە و حەتا نوکە پاشگەز نەبووینە ژ وان ريکەفتنان و پشتەڤانیا بزاڤا کوردستانێ بۆ سەربەخۆ یێ ناکەن و رێگریێ لێ دکەن!.
د ژیواریدا بزاڤا رزگارخوز و شورشێن چەکداری دژی داگیرکەران بەردامبوونە، و ل ئەنجامێ خەبات و قوبانیدانەکا مەزن یا سەدەیەکی ل باشورێ کوردستانێ ژ سەردەمێ بزاڤێن شێخ مەحمودی، و شورشێن بارزان، و دامەزراندنا پارتیا دیموکراتیا کوردستانێ، و شورشاا ئەیلولا نیشتیمانی ب سەروکاتیا بارزانیێ نەمر و ريکەفتنا ١١ ی ئادارا ١٩٧٠ و دانپێدان ب مافێن ئوتونومی، و شورشا گولانێ ب سەروکاتیا رێزدار مسعود بارزانی، و بەرەیا کوردستانی، و سەرهلدانا ١٩٩١ ێ، و بریارا ژمارا ٦٨٨ یاجڤاتا تەناهیا نێڤدەولەتی، و روخاندنا رژێما دکتاتوری و ئاڤاکرنا عیراقا نوی تنێ هەرێما کوردستانێ وەکو کیانەکێ کوردستانیێ فیدرالی یێ دەستوریێ دانپێدای د چارچوڤێ دەولەتا عیراقێدا هەبوونەکا نەتەوەیی نیشادایە و جێگیرکریە، ئەو ژی دکەڤیتە ژێر گەفێن سیاسی و ئابوری و ئاسایشێ، و هێشتا هەمی دەڤەرێن کوردستانێ بۆ نەڤەگەراندینە!.
ل باکورا دەولەتا دوستەکی، و شورشێن شێخێ نەهری، و شێخێ پیرانی و سەید رزای، و پشتی چل سالێن خەبات و قوربانیدانا پککێ ل چارێکا دوماهیێ یێ سەدەیێ بیستێ تا نوکە، تنێ پروسەیا ئاشتیێ د چارچوڤێ چاکسازیێن ناڤخویين دەولەتا تورکیا دهێتە هاژوتن و نەگەهشتیە ئاستێ لێکتێگەهشتن و رێکەفتنەکێ بناڤێ مافێن نەتەوەیێن کوردستانێ.
لروژ ئاڤا یا هەستەکا نەتەوەیا ب هێز، و بزاڤەکا سیاسی و روشنبیریا لاواز هەی، پشتی چەندین سالێن شەر و پێکدادانێ و رزگارکرنا دەڤەرين کوردستانێ ب سەرکردایەتیا پەیەدێ و هەسەدێ، و روخاندنا رژێما دکتاتوری، ب چاڤدێریا ئەمریکا دانوستاندن هاژوتن، و وێ سەرکردایەتیێ سیاسەتا تێکەلکرنا هێز و پێکهاتێن خۆ دگەل دەولەتا سوریا پەژراند بەرامبەر هندەک مافێن روشنبیری و ئیداری، هەر چاوا بیت ئەڤە بۆ روژ ئاڤا دەستکەفتیەکە، چونکی کورد ل روژئاڤا د فەرهەنگا سیاسیا سوریادا نەبوون و ئەڤرو کرنە هەڤپشک و زمانێ کوردی کرە زمانەکێ فەرمی، ب هیڤینە هەمی مافێن وان یێن مایی ژی بهێنە دەستەبەرکرن.
ل روژهەلاتێ خودانا دەولەتا میدیا و کومارا کوردستانێ و شورشا شیای سالا ١٩٧٩ پترا دەڤەرين کوردستانێ رزگارکەت، هەرا دهێتە لێدان و سەرکوتکرن و هێشتا پرسا کوردی نە ئێخستیە بەر دانوستاندنێ و چارەسەرکرنێ!.
حەز و ڤیان و ئارمانج گەلەن بەلێ یا بدەستڤە هاتی کێمەکە ژ مافێن رەوا یێن گەلێ کوردستانێ.
کوردستان خۆدان دوزەک رەوایە، بەلێ ژیوارەکێ نەخواستی ل سەر هاتیە سەپاندن، و دناڤبەرا ئارمانجێ و ژیواری دا سیاسەت دهێتە هاژوتن بۆ بدەستڤەئینانا ئەوا د شیانادا، و ئەڤە ململانەک و هەڤرکیەکا بەردەوامە دناڤبەرا داخوازەکا رەوا یا مللەتی و رەتکرنەکا نەرەوا یا داگیرکەران و ستەمکاران، و ل دوماهیێ سەرکەفتن هەر بۆ مافدارایە، و ل وێ ئومێدێینە ببینین هەرچار پارچەیێن کوردستانێ د ئازاد و دەولەتا کوردستانێ یا سەربەخۆ.
