گەلەک خوشە مروڤ ب سەرفرازی و ئارامی بژیت، ململانا ژیانێ ژبۆ ژیانەکا سەرفراز و ئارامە، ئەم خۆدان ئارمانجین و بهیڤینە، و د رژدین ل سەر ب دەستڤەئینانا مافين خۆ یێن رەوا.
ئەم ب ململانا ژیانێ ڤە بۆ پەیداکرنا خارنێ و ڤەحەویانێ، و دابینکرنا ئاسایشێ و ئارامیێ، ڤە وەستیاین و هێشتا گەف و مەترسی هەنە، ئەم ب دەنگوباسان ڤە هێر بووین هێشتا دەنگوباسەکێ خوش نینە، و ئەم ب ئالوزیان و قەیرانان ڤە شڕ بووین و هێشتا ڤەبوونەک نینە، ئەم ب ریدانان و کارەساتان ڤە بێچارەبووین و هێشتا چارەبوونەک نینە، ئەم ب دەرد و ژانان ڤە بێزار بووین و هێشتا تەناهیەک نینە.
بەلێ ئەم خەباتکەر و بەرگریکارین و هەر بهیڤینە، ئەم ریبریبوون و قەپخازیێ دگەل هەمی دژمن و نەیاران دکەین و خۆ راگرتینە، داگیرکەر ژی هەر ب عەقلیەتا جاران پێکدادانێ دکەن، هەر وەکو قوچانا دگەل کەڤری یە، شاخێن وان د شکێن و سەرێ وان بخوینە. و کورد و کوردستان ب دەرد و برینێن خۆ ڤە د ململانا هەبوونێ دا ماینە و بهیڤینە.
ئەڤە ژیانە و ئەم یێن هەین، مە ئارمانج هەنە و ب هیڤینە پێرابگەهین، و دێ ململانا خۆ کەین، ململانا ژیانێ، یا کەساتیێ، یا خێزانیێ، یا جڤاکی یا مللەتی یا نەتەوەیی یا دەولەتبوونێ، دا سەرفرازیي ب دەستڤە بینین و تەنا بین.
براستی مە گەلەک بیاڤ و ئاستێن ململانێ هەنە!؟، هەمیا ژی پيکڤە دهاژوین و گەلەک ئاستەنگ د رێکا مەدا هەنە و تێرا ئاسێ بووینە، و د هەولا دەربازبوونێ داینە، تا ژ ئاستەنگەکێ دەربازدبین چەندێن دی لبەر سینگێ مە هەنە. لێ هەر بهیڤینە لێ دەربازبین و بەرەف ئاسویێن گەش بچین و ب ئارمانجا را بگەهین و ب دەولەتبوونێ تەنا و ئارام بین.
ميژوویا جڤاکێن ڤێ دەڤەرێ ب قەوارەیێن وانێن سیاسی ڤە، ژ دەولەت و ئمراتوریەتێن کەڤن بۆ دەولەتێن هەڤچەرخ مێژوویەک خویناوی یە، هەر شەر و کوشتن و وێرانکرنە، هەروکو ئەڤە بوویە سروشت و تیتالێ مروڤێ ڤێ دەڤەرێ!.
دەولەت پێتڤیەکا سیاسی و جڤاکی و ئابوریا جڤاکێ مروڤییە، ژبۆ رێکخستناکاروبارێن جڤاکی و بجهئینانا ئاسایشێ و سەقامگیریێ، و دادپەروەریێ و ماف و ئازادیێن هاولاتیان و خزمەتێن باژێرڤانی و پاراستنا خەلکی و جڤاکی و دامەزراوێن وان، بەلێ مخابن سەربورا دەولەتینیێ ل روژهەلاتا ناڤەراست سەربوڕەک شکەستی بوویە، دەولەت کریە ئامرازەک د دەستين دەستهەلاتداراندا بۆ سەرکوتکرنا مللەتی و بجهئینانا بەرژەوەندێن دەستهەلاتداران.
ل ميژوویا هەڤچەرخا ڤان دەولەتێن کوردستان داگیرکرین و بخورتی پێڤە گرێداین روژەکا بتنێ ژی نینە ئەڤ دەولەتە د تەنا و ئارام بن، و ئەوا دبێژنێ ئاسایشا نافخویی و سەقامگیریا سیاسی هەر نە بوویە و ب عەقلیەتا ڤان نەتەوەیێن بالا دەست هەر نابیت!. د هەمان دەمدا ل جیهانا دیموکراتی دەولەتێن ئارام و سەقامگیر هەنە و خزمەتا هاولاتیێن خۆ و مروڤایەتیێ دکەن و د گەشەبوونا بەردەوام دانە.
ئەم ل وێ باوەرێینە کو چارا مە کوردستانێ د دەولەتبوونێ دایە، و ژ بەرکو کوردستانی جڤاکەکێ ئارام و ئاشتیخوازە لەوان دشێت ددەولەتا خۆ یا سەربەخۆدا ئارام و تەنا بیت و ئاسایشا نافخویی بجهبینیت و سەقامگیریا هەرێمایەتی جێگیرکەت و هاریکاربیت ئاشتیا جیهانی بجهبهێت.
لێ ئەو داگیرکەرێن دنافخودا د شەر و پێکدادانان دا، کوشتن و کودەتا دکەن ناهێلن ئەڤ خەونا کوردان بجهبهێت!.
دەولەتێ و کونفیدرالیەتێ و فیدرالیەتێ و ئوتونومی و چ رەنگێن هەڤپشکیێ نا پەرژینن ، هەر هەبوونا کوردان وەکو نەتەوەیەک دناف دەولەتێن داگیرکەردا قەبیلناکەن، و نا هێلن د وەلاتێ خۆدا ئارام و تەنا بن!.
ئەڤە عەقلیەتا کەڤنار هێشتا زالە و سیاسەتا دەولەتێ پێ دهێتە برێڤەبرن لەوان هەمیشە ئەڤ دەولەتە د شکەستینە.
سەیرە لڤی سەردەمی هشتا دەستهەلاتدار هەبن نەهێلن مللەت دەربرینێ ژ ئیرادا خۆ بکەت و خەونا خۆ بجهبینیت و وان ژی چ چارەسەریێن دادپەروەرانە نەبن؟.
باشە حەتا کەنگی ئەڤ مللەتە دڤی دەردی دا بیت، ما نابیت جارەک تەنا بیت.
