مروڤ چ تاک چ کوم چ رەگەز چ ئەتن چ ئاین چ ئول چ رەنگ چ چین بیت پێتڤی ب رێزگرتنێ یە، و مروڤ ب ريزگرتنێ جوان و بها دکەڤیت، و لێکتێگەهشتن و رێکەفتن و هەڤگرتنان چێدکەت.
ريزگرتن بەهایەکێ سنجیێ باشێ مروڤی یە ورەفتارەکا جڤاکیا شارستانی یە و ڤاژیکرنا بهادانێ یە ل خو و ل یين دی و پرا ئاڤاکرنا پەیوەندیين جڤاکی و پیشەیی و سیاسی یە، و هەستکرنە ب بهایێ خۆ و یێ دی، دەربرین لێ دهێتەکرن ب جاڤدان و پیتەدان و سەرەدەریکرنەکا باش و پاراستنا مافان. و ئەڤ رەفتارە بەردەوامیێ ددەتە هەمی جورە پەیوەندیان.
رێزگرتنێ ل یێ دی بگرە دا رێزگرتن لتە بهێتەگرتن، ئانکو سەردەریکرنا وەک هەڤ. و دەمێ ئيک گەلەک رێزێ ل مروڤی دگریت کورد دبيژنێ جامێری گەلەک قەدرێ خۆ گرت.
رێزگرتن ل خۆ و ل یێ دی و ل زاروکی و ل مەزنی و زمانی و زانستی و داب و نەریتان و بیروباوەران، و ل سروشتی و ل ژینگەهێ و دانپێدان ب ماف و هەستێن یێ دی، دێ ل هەمبەری وێ رێزگرتنێ وەرگری، وەکو کورد دبيژن تو چ د چینی دێ وێ هەلینی.
مروڤ هنگی ب بها دکەڤیت و خوشتڤی دبیت دەمێ رێزێ ل یێ دی دگریت، و هەر رێزگرتنەک، ل هەمبەری وێ رێزگرتنەک دهێت، و هەر بێرێزیەک ل یێ دی بێرێزیەکێ ڤاژی دکەت.
نە مافان پێشیلکە و نە یاریان ب هەستان بکە، نە ستەمێ بکە و نە زوریێ بکە، و ژ مافێن خۆ یێن رەوا زێدەتر دلێ خۆ نەبێ و بۆ خۆ نە ئینە و داخواز نەکە، لدیف یاسایێن ئاسمانی و مروڤی سەرەدەریێ بکە و ب دەست خۆ ڤە بینە.
کێشەێن مروڤان یێن جڤاکی و سیاسی و بیروباوەران سەرا بێرێزکرنێ یە، ستەم و زوریا داگیرکەر و دەستهەلاتدار و بالادەستا بێرێزکرنە ل مافداران، و کارڤەدان ل سەر وێ بێريزکرنێ توندوتیژی لێ دکەڤیت و زیان بهەمیان دکەڤیت.
و ژ بەرکو خودێ مروڤ ب ژیری بەخشی یە، لەوان لێ دهێتە خواستن باشیێ و خرابیێ ژيکجوداکەت و باشیێ هەلبژێریت و خۆ ژ کەرب و کینێ و زێدەرویێ و ستەمکاریێ و گەندەلیێ دیرکەت و یێ ب ویژدان و دادپەروەربیت، و رێزێ ل مافێن مروڤان و مافێن بریاردانا چارەنڤیسا گەلان بگریت دا رازیبوونێ چێکەت و ئارامی چێگیربیت.
بارزانیێ نەمر د چەندین فەرموودەێن خۆدا یين بنەمایێن رێزگرتنێ تێدا، وەکو رينیشاندەر گەلێ کوردستانێ ئاراستە و رێنما و پەروەردە دکەت، کو خۆ پێگیرکەت و کەساتیەکا باش و چاک ژخۆ چێکەت و کارتيکرنەکا ئەرینی بکەت و لجهێ رێزێ بیت.
بارزانی برێزڤە باسێ پيکهاتێن کوردستانێ دکەت و د فەرموود:
( کوردستان نیشتیمانێ هەموو نەتەوە و ئاینانە)، لڤێرە بنگەهێ پێکڤەژیانێ و هەڤپشکیا تەڤ پێکهاتان د کوردستانێ دا دسەپینیت.
و ل سەر مافين رەوایێن گەلێ کوردستانێ ب رێزڤە دفەرموود:
( مە ئاخا کەسێ داگیرنەکریە و ژ مافێن خۆ پتر مە نەخواستیە)، لڤێرە خۆ یا دکەت کو مە زێدەگاڤی ل سەر ئاخا کەسێ نەکریە و مە تەماعی ژ د ئاخا کەسێ دا نینە، و ئەوا مە دڤێت مافي مە یێ رەوایە.
و سەبارەت گرنگیا هەڤگرتنێ ب رێزڤە ئاموژگاریان ددەت و دبێژیت:
( یاباش ئەوە ئەم دلێن خۆ ژ کەرب و کینێ پاقژ بکەین و خۆ ژ ئێک و دوو نێزیک بکەین، یەکبوونا خۆ موکوم و پایەدار بکەین)، لڤێرە داخاز دکەت ب دلەکێ پاقژ و دویر ژ کەرب و کینێ هەڤبگرین و ئێکەتیا خو موکوم کەین و ناڤ و دەنگیا خۆ بلندکەین دا بشێن خۆ ب پارێزین و سەرکەفتنان تومارکەین.
و سەبارەت تەماعیێ و ستەمێ و زوریێ د فەرموود:
(ئەو کەسێ تەماعێ مال و نامووسا خەلکێ بیت، و زولم و زورداریێ دکەت، خۆدێ و خەلکێ ژ خۆ نەرازی دکەن ، ئەو قەد ب مروڤ ناهێتە هژمارتن) دڤێ رينمایێ دا خەلکی ئاگەدار دکەت کو خۆ تەماعیا مال و نامووسا خەلکی دویر بکەن و ستەم و زوریێ نەکەن، ئەوێن وان رەفتاران دکەن ب مروڤ ناهێتە هژمارتن و خەلک و خودێ ژ خو نەرازی دکەن .
هەروەسا خەلکی ئاراستەدکەت بۆ ريبازا دروست دەمێ د فەرموود:
(مروڤ دڤێت لایەنگیرێ دادپەروەریێ و ویژدانێ و یەکسانیێ بیت د ژیانێ دا)، بڤێ ژی کوردستانیان ئاراستەی رێبازا دروستا مروڤایەتیێ دکەت ئەژی پێتڤییە مروڤ لایەنگیرێ دادپەروەریێ و ویژدانێ و وەکهەڤیێ بیت و بجهبینیت.
و سەبارەت ب گرنگیا رێزگرتنێ و یاسایێ د فەرموود:
(مرۆڤ ب رێزگرتن و پێگیریێ ب یاسایێ جوانتر دبیت) لڤێرە خۆیا دکەت کو پێتڤییە مروڤ دجڤاکیدا یێ ب رێزگرتن بیت و پيگیریێ ب یاسایێ بکەت دا یێ جوان بیت کاروبار ب باشی برێڤە بچن .
دڤان فەرموداندا بارزانیێ نەمر رێزەکا مەزن دایە مروڤی و دەستنیشانکرنەکا دلسوزانە بۆ پرسێن وی یێن بنەکی کرینە، و هەکە ئەم خۆ دڤان فەرموودەیان بگەهینین و کاری پێ بکەین، ئەڤە تێرا هندێ هەنە کو مروڤێن چاک چێبن و کارين باش بکەن و کاروباران ب باشی برێڤە ببەن و کێشەیان چارەسەرکەن، و دادپەروەری و وەکهەڤی بجهبینن و دلێ خەلکی خۆشکەن.
هەروەسا ئەگەر هەمی دەستهەلاتدارين جیهانێ رێزگرتن هەبیت و ب رێزگرتن سەرەدەریێ بکەن، دێ هەمی شەر و ئالوزی و کيشە رێیێن چارەسەریێ بخۆڤە بینن و ئاسایش و سەقامگیری جيگیربیت.
باوەردکەم رێزگرتن کلیلا ڤەکرنا هەمی گرێ و ئالوزیانە،، و هەردەمێ رێزگرتن هەبیت چ ستەم و چەوساندنا رەگەزی و ئەتنی و ئاینی و چینایەتی نامینیت، لەوان گوتیە ب ڤیان و دلوڤانی سەرەدەریێ بکە.
رێزگرتن بەرێ بنیاتی یە بۆ ئاڤاکرنا خێزانەکا بەختەوەرو ئارام و جڤاکەکێ هەڤگرتی و پەیوەندیێن ساخلەمين مروڤایەتی و سەقامگیریا جیهانی، ژبەر هندێ رێزگرتن ئەرکەکێ مروڤی و سنجی و ئاینی و یاسایی یە، مافان د پارێزیت و ژینگەهەکا ئارام و باش د ئافرینیت و تەنایا تاکی و کومێ و تەڤایی جێگیردکەت.
