سەروک بارزانی د پەیاما خۆدا ب هەلکەفتنا راگەهاندنا ئاگربەستێ ل ناڤبەرا ئەمریکا و ئیرانێدا د فەرمود: هیڤیدارین ئەف ئاگر بەستا ل ناڤبەرا ئەمریکا و ئیرانێ ئاشتیەکا بەردەوام، و ئاسایشێ و بەختەوەری بۆ دەڤەرا مە بجهبینیت، و دەستپێکەک بیت بۆ بدوماهی هاتنا ئيکجاری یا وان کێشەیان یێ ل دەڤەرا مەهەین. هەر ئاشتی باشترە ژ شەری.
ئەڤە هزر و بوچوون و سیاسەتەکا مروڤاتیا ئاڤاکەرە و خزمەتا مروڤایەتیێ ب تەڤ پيکهاتێن وێ ڤە دکەت. دڤيت شەر نەمینیت ب هەمی جور و هویين وێ ڤە، شەر وێرانکرنە، هەمی لایەنين شەرکەر زیان ڤێکەفتی دبن، و د گەرەوا وي دا دەردور ژی زیانڤێکەفتی دبن، و ل دوماهیێ سەرکەفتی بیت یان شکەستی بیت هەر دڤيت پيکبهێن و چارەسەریين ئاشتیانە بۆ بینەڤە.
شەرێ ئەمریکا وئیرانێ گەهشت بوو قوناغەکا مەترسیدار، و نەدیربوو کارەساتێن مروڤیێن مەزنتر لێکەفتبان، نهۆ ئاگربەستە و گفتوگو دهينە کرن، هیڤینە ئاشتی جێگیربیت، و هەمی دەولەت ژی پێداچوونێ د سیاسەتێن خۆ یين سەرکوتکەر دا بکەنەڤە و سەر ژنوی دەستورێن نوی دانن و سیاسەتێن گونجای پەیادە بکەن کو مافێن مروڤی و مافين چارەنووسا گەلان و دادپەروەریێ مسوگەرکەن، دا ئێدی هزر ل شەرا نەهێتەکرن، و شیانێن مروڤی یين ژیری و مادی بۆ ئاڤاکرنێ و سەقامگیریێ بن.
خۆیایە هەر کێشەکێ چارەسەریێن خۆ هەنە، دەمێ ژیر و نیازپاکی و وژدان هەبیت، چ کێشە ب شەری چارەسەر نابن، بەلێ ئالوزتر ليێ دهێن لەوان باشتر ل جهێ هزرکرنێ ل شەری هزر ل ريکێن چارەسەریێ بکەن.
جڤاکێ مروڤی قوربانیا شەر و پێکدادان و رکاتیێ و نەرەوایێ و نە دادپەروەریێ یە.
شەر و رکاتی ل سەر هەلویستێن توندوتیژ و نەرەوا یێن بووینە هویێن شەری و وێرانکرنێ، دبیت هوکارێن هێزێ د هاریکاربن کو لایەنەکێ نە مافدار سەرکەفتنەکێ بینیت، لێ ل بەراهیێ هەمی شەر و سەرکەفتنا قوربانیێن خۆ هەنە، و هەکە نەرەوایی بیت دي قوربانی و فهێتی ژی دگەلدا بیت، لەوان یا باشە ب ژیرانە سەرەدەری دگەل هەمی کيشەیان بهێتەکرن، و ب ريکين ئاشتیانە بهێنە چارەسەرکرن.
جڤاکێ مروڤی ميژوویەکا ستەم و خویناوی تومارکریە، و ب ملیونان مروڤ کرینە قوربانیا بیروباوەر و بەرژەوەندان پێناڤين جوداجودا، و هەمی ستەم و شەر و کوشتن د نەرەوانە، ژ بەر هندێ دڤيت مروڤ کو ژیرمەندە هوکارێن سەرهەلدانا شەر و پيکدادانا نەهێلیت دا قوربانی لێ نەکەڤن.
ژیرمەند و دەبەنگ، هێز و لاواز، مەزن و بچیک، زەنگین و هەژار، هەر مروڤە، دڤێت ئەوێن شیانين دەستهەلاتداریێ و رێبەراتیێ هەبن ژیر و هيز و مەزناتی و زەنگینیا خۆ بکاربینیت بۆ برێڤەبرنا جڤاکێ مروڤی ب ئارامی و خزمەتا هەمیان بکەت و لسەر بنگەهەکێ زانستی و ژیری خەلکی پەروەردە بکەت کو ببنە توخمێن چاک و بەرهەمهێنەر و بمفا بۆ خۆ و بۆ یێ دی، دا ئارامی جێگیربیت و مروڤ بەختەوەر بیت.
دژیانا جڤاکێ مروڤی دا هەردەم جوداهیێن رەگەزی و ئەتنی و ئاینی و بیروباوەری و چینایەتی هەنە، بەلێ ئەڤە هەمی مروڤن و هەڤپشکیا مروڤان دگەل هەڤ د پرسێن مروڤی و چارەنوسی و بەرژەوەندان گەلەک پترن یێن ژيکجودا دکەن، لەوان دڤێت هەڤپشکی مروڤان کومڤەکەت و بهەڤرا کارکەن بۆ مروڤی و مروڤایەتیێ.
جوداهیێن مروڤان کو بووینە هویێن وێرانکرنێ و ژناڤبرنا یێ دیتر، زمان و بیروباوەر بوون، کو مروڤ د شێت هەر زمانەکی بزانیت، و هەر بیروباوەرەکی وەرگریت و رێزێ لێ بگریت بێی کۆ خوین لي بکەڤیت، بەلێ مخابن سەرا ڤان توخمان ب ملیونان قوربانی کەفتینە!، و یا ژوێ خراپتر کارەساتێن مروڤی لێ کەفتین شەرێ دەستهەلاتداریێ و فراوانخوازیێ و بالادەستیێ و سەرکوتکرن و تەپەسەرکرنا یێ دیترە.
ئەگەر پرس شیان بن، هەمیشە هندەک دشێنە هندەکێن دی، و نە حنێرە یێ ب شیان یێ لاواز تەپەسەر بکەت بەلکو پەند ئەوە سەرەدەریەکا ئەرینی دگەلدا بکەت و هاریکاریا وی بکەت ئەو ژی پێ بگەهیت و ب شیان بکەڤیت و بشێت ببیتە بەرهەمهێنەرەکێ باش.
ستەم و زوری رەفتارەکا نەدجهێ خۆدایا مروڤییە، زێدەگاڤیە ل سەر مافداری، بێشیلکرنا دادپەروەریێ و مافێن مروڤییە، یێ ستەمێ بکەت دێ قوربانیێ دەت و کارڤەدان ل سەر ستەمی ژی قوربانی لێ دکەڤن، و ململانێ و پێکدادنان د ناڤبەرا ستەمکاری و ستەملێکری شەرەنیخەکا خۆیناویا نە رەوایە، و دەستهەلاتدار دەمێ ستەمکاریێ دکەن شورەش و سەهلدان لي چێدبن و قوربانی لێ دکەڤن ، ژ بەر هندێ پێتڤییە دەستهەلاتدار خۆ ژ ستەمێ دیرکەت و یاسایێ ب سەپینیت و دادپەروەریێ بجهبینیت دا ئارامی چێبیت.
فەرە ئێدی ژیرمەند هزرێ ل شيوازين رەوا یێن وەرگرتنا دەستهەلاتێ و بەرفرەهبوونێ و دەولەمەندبوونێ بکەن، و خەلکی نەکەنە قوربانا مەبەستێن خۆ، ئەو ژی ب رێکا رازیکرنا خەلکی و خزمەتکرنێ و زانستی و تەکنەلوژیایێ و بەهەمئینانێ و دابینکرنا دەرفەتين کاری و جيگیرکرنا ئاسایشێ بۆ بەختەوەری و سەرفرازیا مروڤی.
