هونهرمهندێ ستران و لاوكێن رهسهنێ فولكلۆرێ كوردی سالح ئامێدی، ناڤێ وی یێ دروست (سالح محهمهد عهلی حامده، ل سالا 1948ێ ل باژێڕێ دیرۆكى ئامێدیێ د مالباتهكا كورد پهروهر دا ژ دایك ببوو.
وی زارۆكینییا خۆ ل ئامێدیێ بۆراند بوو، گهنجاتییا خۆ ل باژارێن مویسل و بهغدا دهرباس كر. پاشى ل باژێرێ دهۆكێ ئاكتنجى بوو. ئەو ژ زارۆكاتیێ ڤه حهز و ئەڤینا هونهر و مۆزیك و سترانێن كوردی ههبوو. ل مویسل گوهدارییا سترانێن محهمهد عارفێ جزیرى دكر، ههر ل وێرێ ئهو نیاسى، گهلهك پێ داخبار بوو و ب شێوازێ وى سترانێن وى دگۆتن، ههتا كو شییاى پتر ژ (300) سێ سهد سترانێن وى ژبهر بكهت.
د دهستپێكا سالێن 1970ێ دا دهست ب ستران گۆتنێ كر. پاشى باشتر ههر یهك ژ هونهرمهندێن نهمر محهمهد عارفێ جزیری و عیسا بهرواری ناسین و تێكهلیێن ژ نێزیك ههبوون.
سالح ئامێدى، گهلهك ژ دهنگ و ئاوازێن زهلال یێن هونهرمهندێ مهزنێ كورد محهمهد عارفێ جزیری، كارتێكرنهكا مهزن ل سهر ههبوو، محهمهد عارف جزیری ژی گرینگییهكا مهزن ددا وی و پشتگیرییا وی دكر و وهكی كوڕێ خۆ دههژمارت و پشتهڤانى لێكر.
ئهو سترانێن محهمهد عارفێ جزیرى، ههمى ژبهر كرن و تۆمار كرنهڤه ب دهنگێ خۆ. پڕانییا ڤان ستران و لاوكان د مهراسیمێن نهتهوهیی و نیشتمانی، كۆمبوونێن دیوانخانه و كۆچكێن مالێن ههڤالێن خوه دا دگۆتن.
ئهوى د 40 سالان پتر دا سترانێن كوردی پاراستن و دگۆتن.
د سالا 2015ێ دا چوو مهكههێ (عومرێ)، ههر ل وى دهمى دا دهست ژ ستران گۆتنێ بهردا و توبه كر و ل شوینا سترانان گهلهك جاران بانگ ددا. ڤێ دووماهیێ نهخۆش بوو. سێ رۆژان بهری وهغهرێ بكهت ل شهڤا 8- 9/8/2026ێ، وهسیهتا خوه كربوو كو ههكه بمریت، جهنازێ وى ل گۆرستانا شاخكێ یا دهۆكێ بڤهشێرن.
ژ بهر وێ چهندێ، ل رۆژا 9ى تهباخا 2026ێ، ل گۆرستانا شاخكێ هاته ڤهشارتن.
روحا وى شاد بیتن و جهێ وى بهههشت بیت.
