شورەش پروسەیا گوهورینا بنەکی و رهوریشالیا بوارێن سیاسی و جڤاکی و ئابوریە د وەلاتی دا، مللەت پێ رادبیت برێکا سەرکردایەتیەکا ريکخستی د چارچوڤێ بەرنامەکێ دارێژتیدا، ئارمانج ژێ هەلوەشاندنا رژێمێ و سیستەمێ وێ یێ حکمرانی و ئاڤاکرنا سیستەمەکێ نوی کو دەربرینێ ژ ئیرادا مللەتی بکەت و بەرژەوەندێن وی بجهبینیت.
پارتی رێکخستنەکا سیاسیە ژ وان کەسان پيک دهێت یێن هەڤبیروباوەر و هەڤ ئارمانج، هەڤدگرن و بهەڤرا خەباتێ دکەن بۆ گەهشتن ب ئارمانجێن پارتێ و بجهئنانانا کارناما وێ.
کو بارزانیێ نەمر پارتیا دیموکراتیا کوردستانێ دامەزراندی و پروگرام و پەیرەوێ نافخۆ و پەیمانا مللی داناین، هنگی بارێ گرانێ رزگارکرن و پاراستن و برێڤەبرنا کوردستانێ ل سەر ملێن خۆ دانا و ب بەرپسیاریا خۆ زانی و ب ئەرک رابوو ئەوا پێتڤییە بکەت دا مللەتی ب ئارمانجێن وێیێن نەتەوەیی و جڤاکی بگەهینیت، و گوهورینێن بنەکی و رهوریشالی یێن سیاسی و جڤاکی و ئابوری ل کوردستانێ و عیراقێدا بکەت، و ئەڤە بخۆ کریارەکا شورەشگێریە و ب شورەش و سەرهلدمانا دهێتە کرن، لەوان هەر زی پارتی رێکخستنێن خۆ چێکرن و بەرفرهکرن و ئەرک و کار دابەشکرن ودەست ب چالاکیێن جوراوجور کرن و گەلەک ژوان ئەرکان بجهئینان.
ل پەیمانا مللی یا دامەزراندنا پارتیدا هاتیە: (ب رێکا خەباتا سیاسی کاردکەین ژبۆ د دروستکرنا دەولەتا هەڤگرتیا دیموکراتیا کوردستانێ ل عیراقێ). و د بەندێ ئێکێ یێ پروگرامێ پارتی یێ کونگرەیێ ئيکێ دا هاتیە: (ژ ئارمانجێن سیاسی سەربەخویا تەواوا کوردستانێ کو بڤان ريکێن خوارێ دێ ب وێ ئارمانجێ گەهین: ١-خەبات پيناڤی دروستکرنا دەولەتەکا هەڤگرتی د عیراقێ دا بناڤێ دەولەتا هەڤگرتیا دیموکراتیا کوردستانێ… هتد.). ئەڤە ئارمانج و ئەرک و بەرپسیاریێن پارتی بوونە ژ دامەزراندنێ، و کار و خەباتێن هەمەجوور بۆ کرینە.
ئەڤ پرانسیبە بوونە پێگیریەکا کارپێکەر و لدیف بارودوخان کار و بزاڤ بۆ کریە.
پارتی ب سەروکاتیا بارزانیێ نەمر بڤان بیروباوەر و بنگەهێ خۆیێ جەماوەری بۆ نوینەرا راستەقینەیا گەلێ کوردستانێ و سەرکردایەتیا وی کر و ب ئەرکێ خۆ یێ نەتەوەیی و نیشتیمانی و جڤاکی رابوو.
پاشگەزبوونا حکومەتا عیراقێ ژ سوز پەیمانێن خۆ بەرامبەر پارتی و گەلێ کوردستانێ، پارتی هشیاریا خۆ وەرگرت و بەرهەڤیێن ریبریبونێ کرن.
کو ل ١١ ی ئەیلولێ هێزێن لەشکەرێ عیراقێ لەشکەرکێشی ل سەر کوردستانێ کری و چەندین دەڤەرێن کوردستانێ بمبارانکرین و شەر دژی کوردستانێ هەلکری، پارتی بەرگری کر، و ل ١٩ ئەیلولا ١٩٦١ ێ مەکتەبا سیاسی یا پارتی بریار دا ریبری زێدەگاڤیێن حکومەتێ ببیت و شورەشێ هەلگیرسینیت، هوسا پارتی و جەماوەرێ کوردستانێ بەرسینگا وێ سیاسەتێ گرت و سەرهلدان کر و شورەشا ئەیلولا رزگایخوازا نیشتیمانی ب سەروکاتیا بارزانیێ نەمر ل ١١ ئەیلولا سالا ١٩٦١ لژێر دروشمێ دیموکراتی بو عیراقێ و ئوتونومی بو کوردستانێ هاتە راگەهاندن.
ل شورەشا ئەیلولا نیشتیمانی خەباتا چەکداری و شورشا جڤاکی و روشنبیری و میدیایی هاتە کرن، شورەشەکا مللی و جەماوەریا هەمی تەخ و تویژێن جڤاکی و هەمی پێکهاتێن نەتەوەیی و ئاینی یين کوردستانێ بوو، و چەندین دەستکەفتێن ميژوویی بدەستڤەئینان ژوانا رزگارکرنا گەلەک دەڤەرێن کوتدستانێ و دابپێدانا فەرمی یا حکومەتا عیراقێ ب مافێن نەتەوەیێن گەلێ کوردستانێ.
بارزانیێ نەمر د فەرمود: شورەشا ئەیلولێ لاپەرێن کەڤنێن مێژوویا مە رەنگین کرن. هەروەسا دبيژیت: مە کوردان روژەکێ شەرەک نەکریە مە دەستپێکر بیت، ئەم بەرەڤانیێ ژ خۆ و مافێن خۆ دکەین. شەرێ مە پێناڤی نەمانا شەری یە. ئەو شەرێ ئەم دکەین، شەرەکێ رەوایە. هەروەسا دفەرمود: تا دەستێن من تڤەنگێ دگرن، دێ بۆ ئازادیا کوردستانێ تێکوشم، من دڤێت ئالایا کوردستانێ بلند بکەم و نەهێلم جارەکا دی کوردستان دیل و داگیرکری بیت. ئەڤە شەرەفەکا مەزنە ، کو وەکو پێشمەرگەیەک د شورەشا ئازادیێ دا پشکدار ببم. هەروەسا د فەرمود: دڤيت مللەتێ مە هەر بگەهیتە مافين خۆ یێن رەوا، شورەشا مە ل سەر حەقیێ یە، مافێن گەلێ مە د حەقن، ئەڤ سالە نەبیت سالەکا دی، لێ هەر دڤێت دانپێدانێ ب حەقێ مە بکەن. هەروەسا دبێژیت: دەمێ مە دەست ب خەباتێ کری بۆ کوردستانێ بوو، لێ نوکە بارێ هەمی عیراقێ ل سەر مللێت مەیە، و دڤێت هەولان بۆ عیراقێ بدەین و وان ژی رزگار بکەین. و لسەر ڤێ رێبازێ پارتی خەبات کریە تاکو شیای رژيما دکتاتوری ب روخینیت و عیراقا دیموکراتیا فیدرالیا دەستوری د بەرژەوەندا هەمی عیراقیاندا ئاڤا بکەت.
سەروک بارزانی دبێژیت: شورەشا ئەیلولێ سەرهلدانا ئیرادە، و باوەری بخۆبوون و سەربلندیا مروڤێ کوردستانێ بوو، بناغەیەکێ موکوم و رێکخستی بوو بۆ بەردەوامیا خەباتێ و راوەستانا گەلێ کوردستانێ ل بەرامبەر زورداریێ، ڤێ شورەشا مەزن ب بەهایێن خۆیێن بلند و ب پێداگری و خۆراگریا بێ وێنەیا یا سەرکردایەتیيێن پێشمەرگەی و جەماوەری، دوزا رەوایا گەلێ مە ب پێنگاڤێن مەزن بەرەف پێشڤە بر ، شورەشا ئەیلولێ لژێر رێبەرایەتیا بارزانیێ نەمر بو ژێدەرێ هێزێ و ئیلهامبەخشییێ بۆ قوناغێن دی یێن خەباتا رزگاریخوازا گەلێ مە، و خەباتکارێن کورد ل تەڤایا پارچەیێن دی یێن کوردستانێ.
هێژا نێچیرڤان بارزانی دبێژیت: شورەشا مەزنا ئەیلولی، دایکا شورەشێن کوردستانێ، د قوناغەکا سەخت و دژواردا کو نکولی ل بوون و مافێن گەلێ کوردستانێ دهاتە کرن، بۆ هێڤێنێ هشیاری و بیر و ناسنامەیا نەتەوەیی و نیشتیمانی. شورەش ب کومکرنا هەمی چین و تویژێ و پێکهاتێن ئاینی و نەتەوەیی یێن کوردستانێ لژێر ئيک چەتر ئیرادەکا پولایین ئاڤاکر، و دەنگێ رەوایێ ئازادا گەلێ کوردستانێ گەهاندە تەواوا جیهانێ و بناغێ ئيکەم دانپێدانا فەرمی و دەستکەفتیێن دەستوریێن باشتر دانا.
هێژا مەسرور بارزانی دبێژیت: شێست و پێنجەمین سالیادا هەلگیرسانا شورەشا مەزنا ئەیلولێ، ب رێبەریا رێبەرێ مەیێ نیشتیمانی جەنابێ بارزانیێ نەمر، ب رێزەکا زورڤە یادا هەمی پێشمەرگە و خەباتکەر و تێکوشەر و تەڤ پشکداربوویێن وێ شورەشا جەماوەری و سەرتاسەریا کوردستانێ دکەین، کو هەموو پيکهاتێن ئاینی و نەتەوەیی یێن کوردستانێ پشکداری تێدا کری و چەندین دەستکەفتیێن ميژوویی ب دەستڤەئیناین، کو گرنگترینا وان نەچارکرنا رژێما عیراقێ بوو ل چارچووڤێ رێکەککەفتننامەیا ١١ ی ئادارا ١٩٧٠ ێ دا دانپێداني ب مافێن گەلێ کوردستانێ بکەت.
ئەڤە پارتیا بارزانیێ نەمر و سەروک بارزانی و رێبوارێن وێ رێبازێ نە، و د بەردەوامن لسەر شورەش و خەباتا خۆ تا گەهشتن ب هەموو ئارمانجێن مللەتی یێن کو ل ریفراندوما ٢٥ ئەیلولا ٢٠١٧ مللەتی ل سەر پشنیارا سەروک بارزانی بریارا خۆ ل سەر دای و گوتی بەلێ بۆ سەربەخۆیا کوردستانێ.
کوردستان ب سەرکردایەتیا پارتی و ب سەروکاتیا سەروک بارزانی، خودانا گەلەکێ دلسوز، پێشمەرگەیەکێ قەهرەمان، شورەشا ئەیلولێ، رێکەفتنا ١١ ی ئادارێ، شورەشا گولانێ، سەرهەلدانێ، دامەزراندنا هەرێما کوردستانێ، ئوتونومی، فیدرالیەتێ، روخاندنا دکتاتوریەتێ، ئاڤا کرنا عیراقا دیموکراتی و فیدرالی و دەستوری، و ریفراندوما سەربەخۆیا کوردستانێ یە، هەر دێ یا خۆراگر و سەرکەفتی بیت.
ل بیرەوەریا ٦٥ سالیا شورەشا ئەیلەلا نیشتیمانی.. سلاڤ بو گیاني بارزانیێ نەمر سەرکێشێ شورەشێ و ئدریسێ جانەمەرگ و تەڤایا شەهیدێن کوردستانێ.
سلاڤ بۆ پێشمەرگەیێن قەهرەمان یێن شیایین ب خەبات و قوربانیدانا خۆ مەزنترین داستانێن سەروەریێ تومارکەن.
سلاڤ ل گەلێ کوردستانێ یێ دلسوز و خۆراگر.
