ب ناڤێ خودایێ مەزن و دلۆڤان
ھەرێما کوردستانێ چ جاران نەبوویە پشکەک ژ وان کێشە و ئالۆزی و شەڕێن ل دەڤەرێ ھەین، بەلێ مخابن کۆمەکا خەلکی ھەنە بێی کو کەس ڕێگریێ لێ بکەت، تەرکیزا وان یا سەرەکی ئەوە کا دێ ب چ ڕەنگ و ب چ ڕێک دژاتییا ھەرێما کوردستانێ کەن و هەردەم ب نادادپەروەری ھێرشی سەر ھەرێمێ و پێشمەرگەی دکەن و دبنە گەف ل سەر ژیان و سەقامگیرییا خەلکێ کوردستانێ.
ل درێژاھییا سالێن بوری، ب دەھان جاران ب زولم و بێ چ پاساوەکی ب درۆن و موشەکان ھێرش کریە سەر ھەرێما کوردستانێ و بارەگایێن پێشمەرگەی و خەلکێ بێگونەھ شەھید و بریندار کرینە. ژ وێ دەمێ ئەڤ شەڕە ژی دەستپێکری، پتر ژ ٤٥٠ جاران ب موشەک و درۆنان ھێرش کرینە سەر ھەرێما کوردستانێ و بارەگایێن ھێزێن پێشمەرگێ کوردستانێ. ھەر د وێ ماوەیێ دا پێنج جاران ھێرش کریە سەر بارەگایێ مە، بەلێ مە بێدەنگی ھەلبژارتییە دا کو دلتەنگی و تۆرەیی د ناڤ جەماوەری دا پەیدا نەبیت.
دوھی ژی ل باژێرێ دھۆکێ ب درۆنان ھێرش کریە سەر مالا سەرۆکێ ھەرێمێ. بابەت نە مال یان بارەگایێ کەسەکییە، ھەر جھەکێ کوردستانێ و ھەر مالەکا کوردستانی ل دەف مە بھایێ خۆ یێ ھەی.
ئەڤ جۆرە ھێرشە شەڕفرۆشتنەکا ئاشکرایە و زولمەکا مەزن و زێدەگاڤی و نادادپەروەرییەکا مەزنە بەرامبەر ھەرێما کوردستانێ و دڤێت چارەسەرییەکا جدی و ئێکلاکەر بۆ بھێتە دانان. د ڕاستی دا ئەڤ چەندە ب شەرمزارکرن و تەلەفۆن و بروسکە و لیژنان چارەسەر نابیت. دەستھەلاتدارێن عێراقێ دڤێت خۆ ئێکلا بکەن، یان دڤێت ڕابگەھینن کو نە د شیانێن وان دانە ڕێگریێ ل وان گرووپێن ژ یاسایێ دەرچووی بکەن، یان ژی دڤێت ب جدی بھێنە سەر ھێلێ و پاراستنا دەولەتێ بکەن و ڕێکارێن جدی بگرنە بەر دا کو ئێدی ڕێ نەھێتە دان ھێرشێن نەھەق بۆ سەر ھەرێما کوردستانێ بھێنە کرن.
ل ڤێرە دووپات دکەین، گەلێ کوردستانێ ب ئیرادەکا پولایین بەرگریێ ل پەیاما ئاشتیانە و دۆزا ڕەوا یا خۆ دکەت و چ گەف و ھێرش و دوژمنان نەشیایە و نەشێن وێ ئیرادەیێ بشکێنن.
