ئحسان ئامێدی
ئارامی و گەشەبوونا کوردستانێ د بەرژەوەندا هەمیان دایە
وە کوردستان بومباران و کیمیاباران و ئەنفال کرن و وێرانکر!، وە مللەتێ وێ برسیکرن و ترساندن و کوشتن و دەربەدەرکرن!، و ب وێ سیاسەتێ هین ژی یێن هاتینە کوشتن و وێرانبووین!، ما بەس نینە؟.
ژ مەراکوشێ تا کەنداڤی گەلەک مللەتێن دی هەبوون، وە ب سیاسەتێن داگیرکەرنێ وخۆ سەپاندنێ و بالا دەستیا خۆ ژناڤبرن و عەربکرن، سەر هندێ را کورد و کوردستان مان و شیان هەبوونا خۆ وەکو نەتەوەک و کلتورەک ب پارێزن و گەشەیي پێ بکەن.
مە هزرکر لبن ناڤي ئاینی دي ئەڤ هەبوونە و پێکهاتێن نەتەوەیێن جودا مینن و رێز لێ هێتەگرتن، لێ مخابن چیێ دەستهەلات گرتی ئایین ژی د بەرژەوەندا خۆ و نەتەوەیا خۆ بکارئینا و سیاسەتا خۆ سپاند، و یێن دی ڤەدەرکرن و پەراوێزکرن، و یێ رایەکا نە وەکی وان هەبا ژناڤ دبر!، پشتی هاتنا سیستەمين دەولەتێن نەتەوەیی و نیشتیمانی، دەستهەلاتدارێن ڤان دەولەتێن نوی چێکری هەمان سیاسەت بکارئینا!، و ب هەمان عەقلیەت و رەفتار سەرەدەری دگەل یێن دیتر کر!، ئێدی هەر کوشتن و وێرانکرن و ژناڤبرن بوو، دێ بێژی جڤاکێ مروڤی بۆ کوشتنێ یێ ئافراندی.
نهۆ ژی و پشتی سیهـ و چار سالێن سەربورا هەرێما کوردستانێ، و هەرێم بوویە کیانەکێ فیدرالیێ دەستوریێ دانپێدای، هشتا دەردورێن کوردستانێ هەرێ وێ سیاسەتێ دهاژون و هەمی گەف و گڤاشتن و دژمنکاریە دژی هەريما کوردستانێ، بۆ نەچارکرنا هەرێمێ داکو سیاسەتێن وان قەبیلکەت و ژێر دەست ببیتە ڤە!.
مخابن لڤی سەردەمێ زانینێ و پێشکەفتنێ و تەکنەلوژیایێ و ژیرێ دەستکرد و بەهایێن مروڤی و پرانسیبێن مافێن مروڤی و پيکڤەژیانا ئاشتیانە بەلاڤبووین، هشتا هێز و دەستهەلاتدار هەبن ب عەقلیەتەکا کەڤن و گەنی رەفتارێ بکەن و سیاسەتێ ب هاژون!.
هەرێمەکا دەستووریا دانپێدای بکەنە ئارمانج و مافێن وێ یێن دەستوری پێشیل بکەن، و شایستەیێن وێ یێن دارایی لێ ببرن، و دەستهەلاتێن وي یێن دەستوری لێ بستینن!. و یێن د هەولا هندێ دا هەرێما کوردستانێ د وەلاتێ خۆدا دەستهەلاتێن خۆ ب کارنەئینیت و کاروبارێ خۆ برێڤە نەبەت!.
کورد کەڤنترین مللەتێ دەڤەرێ و مللەتەکێ ئاشتیخوازە چ جاران فراوانخوازی نەکریە و چ وەلات داگیر نەکرینە و دژمنکاتیا کەسي نەکریە، تنێ ڤیایە وەلاتێ وی یێ رزگارکری بیت و مللەتێ وئ یێ ئازاد بیت و ب ئارامی بژیت، و خەبات و قوربانی دانا وێ ژبۆ وەلاتەکێ ئازاد و مللەتەکێ سەرفرازە.
هەرێما کوردستانێ شیا ببیتە کیانەکێ سیاسیێ ئارام کو مەترسیێ ل سەر دەردوران چێنەکەت،و ببیتە سەربورەکا دیموکراتی ل دەڤەرێ کو مللەتێن دی چاڤ لێ کەن، و ببیتە وارەکێ مروڤ دوستیێ و پێکڤەژیان کو خەلکين ژێکجودا هەبوونا خۆ یا ئازاد تێدا ببینن،و ببیتە ناڤەندەکا جیهانی یا دژی تیرورێ و هەڤپەیمانێن نێڤدەولەتیێن بۆ بهێنە پێکئینان، و ببیتە ژێدەرەکێ دابینکرنا نەفتێ و ووزێ بۆ جیهانێ و بشێت پشکەکي ژ پێتڤیێن جیهانێ دابینکەت، و بڤان ئەرکان هەرێم شیایایە ببیتە هەبوونەکا سیاسی و ئابوریا باش بو عیراقا فیدرال و سەقامگیریا هەرێمایەتیی و جیهانی، سەر ڤێ هەمیێ را پشتی هەمی سیاسەت و کریارێن دژمنکارانە، کیلگەهێن وێ یێن نەفتێ یێن دکەڤینە بەر هێرشێن درونێنێن بومبرێژکری، کو ئارمانج ژێ لێدانا ژێرخانا ئابوری و شادەمارێ ژیانا هەرێما کوردستانێ یە، و سوتنا نەفتێ و ترساندندنا کومپانیان دا ئەڤ کیلگەیە ژ کاربکەڤن و کریارێن نەفتێ لێ نەهێتەکرن!.
سەیرە لژێر سەروەریا دەولەتا عیراقێ گروپێن چەکدارێن پشکدار د پروسەیا سیاسی دا ڤان کیلگەها ب درونەیان بکەنە ئارمانج و ئاگری بەردەنێ، خۆ داهاتیێ ڤان کیلگەها هەر بۆ گەنجینا دەولەتا عیراقێ یە و بەهرا هەمی خەلکی تێدایە، و ئەو زیانێن بڤان کریارێن دژمنکارانە ب هەرێمێ کەفتین هەمان زیان ب دەولەتا عیراقێ ژی کەفتینە، هەروەکو چاوا قەدغەکرنا هنارتنا نەفتا هەرێما کوردستاني ل دیف بریارا دادگەها نێڤدەولەتیا ل پاریسێ زیان ب کوردستانێ ئێخستی هەر ئەو زیان ب عیراقێ ژی کەفتیە، و ئەڤە سامان و داهاتیێ دەولەتێ یە ل هەر هەرێمەکا دەولەتێ بهێتە دەرئینان، ئەڤجا پێتڤیە ئەوێن دەست دڤان کریارێن تیرورستی دا هەی بهێنە گرتن و سزادان، و یافەرە بریاربدەستێن عیراقێ هەڤبگرن و بەرژەوەندێن دەولەتێ ب هەرێمێ ڤە ل بەرچاڤبگرن، و لێکتێگەهشتنان ل سەر هەمی بابەتان بکەن، و پێگیری ب دەستوری بکەن و یاسایێ سەروەرکەن، و بهێلن هەرێما کوردستانێ ب ئارامی گەشە بکەت.
ئارامی و سەقامگیری و گەشەبوونا کوردستانێ د بەرژەوەندیا هەمیان دایە، دخێرا هەمی عیراقێ و دەولەتێن هەرێمایەتی و جیهانێ دایە. و دەم هاتیە هەمی لایەن ب تاک و هێز و مللەت و دەولەت و حکومەت ڤە تێبگەهن و سەرەدەریەکا ئەرێنی دگەلدا بکەن، دا د بەرژەوەندیا هەمیاندا بیت.
