د روژمێریا کورداندا بوهار دەستپيکا سالا کوردی یە و ژ ئيکێ نەوروزێ بوهار دەستپێدکەت کو ريکەفتی ٢١ ئاداري یە.
جڤاکێ کوردستانێ ل دیف ژینگەهـ و سەقایێ کوردستانێ کاروبارێن خۆ ريکخستینە، و سێ ورزين سالێ بوهار و هاڤین و پایز یێن کار و بەرهەمئینانێ و عمبارکرنێ نە، داکو ل وەرزێ زڤستانێ کو وەرزێ جيگیرکرن و سەرەدەریکرنا سر و سەرما و بەفر و بارانێ یە، خۆ پي بگرن و دەربازکەن بۆ وەرزێ بوهارێ.
وەرزێ بوهارێ ل کوردستانێ ب بووکا سالێ و وەرزی نووژەنکرنا ژیانێ دهێتە هەژمارتن.
بوهار گەشبوونا ژینگەهێ یە، هەر ئەو گەشبوون دلێ خەلکی ژی گەش دکەت و گيولێ وان خوش دکەت، نەمازە کو یێن شیایین خۆ ژ ئاستەنگێن زڤستانێ دەربازکەن، بهیڤی و ئومێد ل داهاتووی دنێرن. و دەست ب کاروچالاکیێن ژیانێ.
ل بوهارێ ژینگەها سروشتی و یا مروڤی و یا تەڤ ژینداران خۆش دبیت، هەروەکو نوبوونەکا نوی.
پشتی زستانەکا سر و سەرما و ب بەفر و باران وەرزی بوهارێ دهێت و ژیانێ دەتە ژینگەهێ و سروشتی د خەملینیت.
د ڤی وەرزی دا، سروشت ژ خەوا خۆ یا گران رادبیت و جارەکا دی دهێتە نووژەنکرن. چیا و دەشتێن کوردستانێ ب کەسکاتیێ دهێنە پۆشین، و دەنگێ عەڤر و روناهیا بروسیان تێکەلی دەنگێ گژلوک و تەرگ و باران و ليمشتێن ئاڤێ دبن، و ئاوازين چویچک و شالویل و بلبلان تێکەلی بایێن هین و تەزی دبن، و بيهنا گول و نێرگز و کەسکاتیێ ل گوند و باژێران بەلاڤ دبن، ئێدی جوانی رەوشا خۆ ل سەر هەمی قولاچين وەلاتی دا بەردەت، و دیمەنين گەش ل هەمی جها خۆ نیشا مرۆڤی ددەن، و ئارامیێ و خەمڕەڤێن دەتە گیانێ مروڤی و گەشبینیي چێدکەت.
سەرێ سالا کوردستانێ، دەستپێکا بوهارێ ژ نەوروزێ دەستپێدکەت، نەوروز جەژنا نەتەوەیا کوردستانێ یە، سەرسالێ یە، جەژنا رزگاربوونێ یە ژ زڤستانێ، جەژنا سەرهەلدان و ئازادیێ یە، جەژنا سەرکەفتنا روناهیێ یە ل سەر تاریاتیێ. چالاکیێن بوهارێ لڤێ روژا پیروز دەستپێدکەن، ب هەلکرنا ئاگري نەوروزێ، و سرود و سترانان ،و گوڤەند و شەهیانان، وگەشت و سەیرانان.
یا ڤی وەرزی خوش دکەت دلخوشیا خەلکێ یە و دەرکەفتنا وانە ب جلوبەرگێن کوردی بۆ جهين سروشتی بۆ گەشت و سەیران و دەمين خوش. و ئەڤ رەوشە ب دريژاهیا وەرزی بەردەوام دبیت.
ب کورتی، بوهار ل کوردستانێ تەنێ گوهۆڕینا سەقای و رەنگێ سروشتی نینە، بەلکو ژیانەکا نوو یە کو تێدا سرۆشت و مرۆڤ پێکڤە دبنە تابلۆیەکێ رەنگاورەنگ و جوان. بوهار وەرزێ ڤەژینا نویبونەڤێ و ڤیانێ، تەڤایێ و کارکرنێ و ئاڤاکرنێ یە.
لڤێ نوبوونێ دا چالاکیێن مروڤی مشە دبن و هەمەجوور دبن، و هەلکەفت و بیرەوەری لێ چێدبن.
هەر ژبەر پیروزیا ڤی وەرزی و دەستپيکرنا وێ، هەرسال خەلکێ کوردستانێ چالاکیێن جوراوجور بڤێ هەلکەفتنێ دکەن، و چێروکا ئەفسانەیا کاوەیێ ئاسنگەر ژی هەر د نەوروزێ دا ئەنجامدایە، هەروەکو ب سەدان داستان و چالاکیێن دی بڤێ هەلکەفتنێ و دڤی وەرزی دا دهێنەکرن.
ل کوردستانێ پتریا هەلکەفتن و بیرەوەریێن وێ یێن خوشی و نەخوش لڤی وەرزی دانە، شادی و شینی، و گوڤەند و بەهی تيکەلی هەڤ دبن.
دژمن و نەیاران گەلەک نەوروز و بوهارێن کوردستانێ ل خەلکێ وێ کرینە شینی و گری، لي هەردەم گیانێ بەرخۆدانێ و قەپخازیێ ل دەف کوردان هەبوویە، و شیاینە خۆ لێ دەربازکەن، و نویاتیەکا دی ژێ چێکەن، و هەبونا خۆ یا نەتەوەیا کوردستانێ ب سەپینن.
بکورتی دێ چەند بیرەوەریێن ئادارێ پێشچاڤ کەم بۆ بیرئینان..
ل ٢١ ئادارێ نەوروزە و سەرسالا کوردی یە و جەژنا نەتەوەیا کوردستانێ یە، هەر بۆ وێ روژێ ڤە ئەفسانەیا کاوەیێ ئاسەنگەر دهێتە گرێدان.
و ل ٢١ ئادارا سالا ٦١٢ بەری زاینێ لەشکەرێ میدی شیان دەستێ خۆ دانە سەر نەینەوا و دوماهیێ ب ئمبراتوریەتا ئاشوری بینن.
ل ١٩٠٣/٣/١٤ ژ دایکبونا بابێ روحیێ نەتەوا کورد بارزانیێ نەمرە و ل ١٩٧٩/٣/١ مالئاڤاهی کر.
ل ١١ ی ئادارا ١٩٧٠ ێ ريکەفتنا ميژوویا ١١ ی ئادارێ یا دانپێدانێ ب مافين گەلێ کوردستانێ، ول ١٩٧٤/٣/١٨ دوماهی هاتنا گفتوگویا پارتی دیموکراتی کوردستانێ و حکومەتا عیراقێ سەبارەت ب ئوتونومی یا کوردستانێ، ب پاشگەزبوونا حکومەتا عیراقێ ب ريکەفتنا ١١ ی ئادارێ. و ل ١٩٧٥/٣/٦ رێکەفتنا خیانەتکاریا جەزائیر یا دژی شورەشا ئەیلولا نیشتیمانی.
ل ١٩٨٦/٣/٧ رێکەفتنا ئاشبوونا نیشتیمانی دناڤبەرا پارتی و یەکێتی. ل ٢٠٠٣/٣/٢ رێکەفتنا ستراتیژی دناڤبەرا پارتی و یەکێتی. و ل ١٩٩٥/٣/٢٨ دەستپێکرنا گەرا دوێ یا شەرێ نافخو.
ل ١٩٩١/٣/٥ سەرهلدانا گەلێ کوردستانێ ل رانیە دەستپيکر و ڤێرا چوو، و ل ٧ ێ ئادارێ سليمانیێ رزگارکر و ل ١١ ی ئادارێ هەولێرێ رزگارکر و ل ١٤ ئادارێ دهوکێ رزگارکر و ل ١٩٩١/٣/٢٠ کەرکوکا دلێ کوردستانێ رزگارکر. و ل ١٩٩١/٣/٢٩ کوچرەوا ملیونی دەستپيکر.
ل ١٩٨٨/٣/١٦ کیمیابارانا حەلەپچە .
ل ٢٠٠٣/٣/٢٠ دەستپێکرنا شەري ئازادکرنا عیراقێ ژ رژيما دکتاتوری.
ل ١٩٢٥/٣/٢١ سەرهەلدانا مەزنا شێخ سعید پیرانی.
ل ١٩٧٦/٣/٢٥ مالئاڤاهیا سەرکردەیێ کورد ئیحسان نوری پاشا.
ل ١٩٤٧/٣/٣١ سێدارەدانا پێشەوا قازی محمدی.
هوسا بدەها هەلکەفت و بیرەوەریين دی.
و لدەستپيکا بوهارا ئەڤ سالە ژی شەرێ ئەمریکا و ئسرائیلی دژی ئیرانێ دەستپێکر، و ئاگرێ ڤی شەری کارڤەدانا خۆ ل سەر جیهانێ و دەڤەرێ و کوردستانێ هەیە، بهیڤینە ئەڤە شەرە ب دوماهی بهێت و چارەسەریێن ئاشتیانە بۆ ناکوکیێن نێڤدەولەتی و دوزێن مللەتان بهێنە دیتن، و ئێدی شەر و کوشتن و وێرانکرن بدوماهی بهێن، و عەقلیەتا سەپاندنا ب هێزێ و سەرکوتکرنا یێ دیتر نەمینیت و رێز ل مروڤی و بەهایێن مروڤی بهێتە گرتن و هەر تاکەک و کومەک و پێکهاتەک و مللەتەک و نەتەوەیەک ب مافێن خۆیين رەوا شاد ببیت. و ئاشتی و ئاسایش و ئارامی جيگیربیت و مروڤ خوشگوزار و بەختەوەر بیت.
.بلا ئێدی دەرفەت بۆ کوردستانێ ژی دابینبیت بشێت ب ئازادی نەوروز بوهار و هەلکەفتنێن خۆ بخوشی بکەت
