کەتوارێ سیاسی یێ کوردستانێ د ناڤبەرا ئالنگارییێن مێژوویی و بەرپرسیارییا نەتەوەیی دا
گازیکرن و هەول و کۆشش و بزاڤ؛ مافە، ماف کارکرن و ئەرک و ئارمانجە. دیارە هەر مللەتەک ل گورەی ژینگەها خۆ یا سیاسی ب میکانزمەکا سیاسی ل سەر هندەک ئارمانجێن دەستنیشانکری هەناسا خۆ یا سیاسی د هەڵکێشیت. مللەتێ کورد ل ڕۆژهەڵاتا ناڤەڕاست ب گشتی، ل ئیراقا فیدرال ب تایبەتی، ب شێوە و ڕێکێن جودا جودا بەرەڤانیکرنێ ژ مافێن خۆ یێن ڕەوا دکەن و ب گیانەکێ سیاسی هەول ددەن پاراستنێ ل سەر وان دەستکەفتێن خۆ یێن سیاسی و ئابووری ب ڕێکێن یاسایی و دەستووری بکەن، هند داواکارییێن خۆ یێن دى یێن سیاسی بلند بکەن.
دیارە ئەڤ واقعێ سیاسی یێ کوردی یان کوردستانی ل ڕۆژهەڵاتا ناڤەڕاست ب گشتی دروست بوویی، ل ئیراقا فیدرال دا ب تایبەت، درێژەپێدانا وان ڕێکەفتنێن سیاسی یێن ئێک ل دویڤ ئێک دژی مللەتێ کورد هاتینە ئەنجامدان ب نوێنەراتییا هندەک لایەنێن دیارێن کو پشتی ب دووماهیک هاتنا جەنگێ جیهانییێ ئێکێ و دویێ و ب داوی هاتنا قووناغا کۆلۆنیالزمێ ئێکسەر هاتە پێش، ب هەستەک و بەرێخودانەکا نەدادپەروەرانە ڕەفتار و سەرەدەری ل گەل مافێن نەتەوەیی، سیاسی و ڕەوشەنبیری یێن مللەتێ کورد هاتە کرن وەکی ڕێکەفتنا (سایکس – بیکۆ، لۆزان).
ململانێیێن نەتەوەیی و هه‌ڤسەنگییا هێزێ
ژ ئەنجامێ نە هەستکرنا مللەتێ کورد ب دادپەروەرییا سیاسی و کۆمەڵایەتی ل قووناغێن سیاسی یێن جودا جودا، زۆربەیا جاران پارت و بزاڤێن سیاسی یێن کوردی ل سەر بنەمایێ هزرێ (الفکر) د بلندکرنا درووشمێن ڤەگەڕاندن و پاراستنا مافێن گەل و نیشتمانا خۆ دا یەک دەنگ و یەک هەڵوه‌ست بوون. ڕاگەهاندنا دەولەتەکا سەربەخۆ یا کوردی ئێکەم ئارمانج و خاستا زۆربەیا پارت و بزاڤێن سیاسی و گەلێ کورد بوو، هەول ژ بۆ ڤێ ئارمانجێ د بەردەوام بوون، لێ ب سەدەما کۆلۆنیالزمێ ژناڤچوون. ئارمانج و خاست و هیڤییێن مللەتەکی ب درێژاهییا ژییێ خۆ تووشی نهامەتی و دەربەدەری و دەردەسەرییا بوویی، ل گورەی دەم و جهـ و قووناغێن سیاسی دهێنە گۆهوڕین.
ل گەل ڤێ یەکێ، ئەڤ چەندە دبوو جهێ نیگەرانییێ و سەرسوڕمانێ بۆ وەلاتێن دەوروبەر. ئەڤ یەکە ب گەف دزانین بۆ ژناڤچوونا ئێکپارچەییا وان وەلاتان و تەحەددایا سەروەرییا ناڤخۆ دکر و ب مەترسی دزانین ل سەر دروستبوونا ململانێیێن نەتەوەیی یێن درێژخایەن. ئەڤ چەندە هاتە پێش؛ ئەڤرۆ ئەم یێن دبینین ئەڤ کولتوورێ سیاسی یێ ئیراقا فیدرال ب تایبەت، ل ڕۆژهەڵاتا ناڤەڕاست ب گشتی، پڕە ژ ململانێیێن درێژخایەن د ناڤبەرا حکومەتێن ناڤەندی و پێکهات و پارت و لایەنێن کوردی درێژەپێدان هەیە.
پشتی هاتنا یاریزانێ سێیێ و ئەکتەرێ نێڤدەولەتی بۆ ناڤ یارییێ، دیارە هه‌ڤسەنگییا هێزا حکومەتا ناڤەندی دهێتە گۆهۆڕین بەرامبەر هێزا توکمە و ئێکگرتی یا ئەکتەر و لایەنێن کوردی. لێ ئەگەر ڤەگەڕینە مێژوویێ، دێ بینین پشتی ب داوی هاتنا جەنگێ جیهانی یا ئێکێ و دویێ، دیارە حکومەتێن ئێک ل دویڤ ئێک و هەرێما کوردستانێ شییا پێشکەفتن و پێشڤەچوونێن باش ب دەستڤە بینیت یان ب خۆڤە بگریت ل سەر ئاستێ سیاسی و دیپلۆماسی ب هێزکرنا پەیوەندیێن خۆ ل گەل حکومەتا ناڤەندی ل بەغدا و ل سەر ئاستێ نێڤدەولەتی، هەروەسا شییا پێشڤەچوون و پێشکەفتنێن باش ل دویڤ خۆ بینن ل سەر ئاستێ ئابووری ژ لایێ ب هێزکرنا ژێرخانا خۆ یا ئابووری و باشترکرنا داهاتێ سەرتاسەری.
پەندا دیرۆکێ و هۆشدارییا قووناغێ
کاکلکا خالا من دڤێت بەحس بکەم و بیرا هەر نیشتمانپەروەرەکی لێ بینم، ئەڤ پێشکەفتنا ئابووری و سیاسی پشتی ڕێفراندۆما ٢٥ى ئەیلولا ساڵا ٢٠١٧ێ یه، ئەوا ژ ئەنجامێ نەبوونا کۆدەنگییەکا سیاسی یا نیشتمانی – نەتەوەیی سەرنەکەفتی، کوردستان ئێخستییە بەر هندەک سزایێن ئابووری و سیاسی یێن بەرفرەهـ و توند یێن حکومەتا ناڤەندی ل بەغدا. لڤینێن ئابووری ئیفلیج کرن، ژ ڤەگەڕاندنا بەشەک ژ ناوچێن ناکۆکى ل سه‌ر هه‌یى و ژ لایێ سیاسی ڤە کوردستان زۆر لاواز کر.
ئەگەر ئەو پارت و بزاڤێن سیاسی و کەسایەتییێن سیاسی یێن کوردی ل ڕۆژهەڵاتا ناڤەڕاست ب گشتی، ل عیراقا فیدرال ب تایبەت، ئەڤرۆ ڕۆل د پێشئێخستن و پێشکەفتنا ئابووری و سیاسی یا کوردستانێ دا و ب هێزکرنا پێگەهێ سیاسی یێ کوردستانێ و پاراستن و داکۆکیکرن ژ ماف و دەستکەفتێن نەتەوەیی و نیشتمانپەروەری دا هەیی، ب دروستاهی هەست ب وی بەرپرسیارییا نەتەوەیی و نیشتمانپەروەرییا گەل و مللەتێ خۆ نەکەن، دوور نابینم دووبارە پێگەهێ هەرێما کوردستانێ زۆر لاواز ببیت و قەبارەیێ هەرێما کوردستانێ زۆر بچووک ببیت، دووبارە واقعی سیاسی یێ کورد دروست ببیت بۆ مە هەمیان جهێ نیگەرانی و سەرسوڕمانێ بیت.
