د سەردەمێ نوکە دا، زۆر کەس گرنگيیێ ب بؤچوون و ئاخفتنێن کەسانێن دی ددەن هه‌تا وی ڕادەيی ئاراميیا دەروونێ خۆ ژبیر دکەن، هندەک مرۆڤ هەوڵ ددەن ژیانا خۆ ب وی شێوەيی ب رێڤە ببەن کو خەڵک ژ وان ڕازی بن، نەکو ئەو ب خۆ د ژیانا خۆ دا ئارام و دلخۆش بن. لێ پرسیارەکا گرنگ دهێتە پێش: بۆچی مرۆڤ پتر گرنگیيێ ب ئاخفتنێن کۆمەڵگەهێ ددەت ژ ئارامییا دەروونێ خۆ؟!!
ئێک ژ ئەگەرێن ڤێ دیاردەیێ، ترسا مرۆڤیيە ژ ڕەخنە و ئاخفتنێن خەلکی، زۆر کەس دترسن ئەگەر ب شێوەیەکێ جیاواز ژ کۆمەڵگەهێ هزر بکەن یان بژین، دێ ژ لایێ خەلکیڤە توشی رەخنەیان بن یان ژی دێ ب شێوەیەکی نەرێنێ بینین، بۆ نموونە، کەسەکی دڤێت کارەکی ب خۆ ب هەلبژێریت کو حەز ژێ دکەت، بەلێ ب ڕامانا خێزان یان کۆمەڵگەهێ، ئەو کارە نە یێ گرنگە. لەوما؛ ئەو کەس دێ ئارمانجێن خۆ هێلیت و ڕێکا ژیانا خۆ گوهۆڕیت، ب تنێ ژ بۆ هندێ دا کەسانێن دی ژ وی د رازی بن.
هەروەسا، د تۆڕێن کۆمەڵایەتی ژی دا، ئەڤ کێشەیە پتر دیار دبیت. ئەم ڕۆژانە زۆر کەسا وێنه و ڤیدیۆیان دبینین کو دهێنە بەلاڤکرن ژ لا یێ هەر کەسەکیڤە ژ بۆ پتر ب دەستڤەئینانا لایک و سەرنجا کەسانێن دی بؤ خۆ بكێشن، بۆ نموونە، کەسەک دێ جلكه‌كێ گرانبها کڕیت یان ژیانا خۆ ب شێوەیەکێ جیاواز نیشان دەت، نە بوو کو ئەو بخۆ دێ دلخۆش بیت، بەلکو بۆ کو خەڵک ژێ ڕازی بن. ئەڤ چەندە دشێت ببیتە ئەگەر کو ئەو کەسە یێ دلخۆش نەبیت و وى بخۆ باوەری ب هه‌بوونا وی کێم ببیت.
ژ لایەکێ دیڤە، هندەک مرۆڤ هزر دکەن کو قەبولکرنا کۆمەڵگەهێ نیشانەیا سەرکەفتنێیە. ئەوان دڤێن هەمی کەس ژ وان ڕازی بن، هەر چەندە ئەڤە نە تشتەکێ ب ساناهیيە، چونکی هەر مرۆڤەکى هزر و بۆچوونێن خۆ هەنە و نەشێین هەمی کەسا ژ خۆ ڕازی بکەن. دەمێ مرۆڤ هەوڵ ددەت هەمی کەسا دلخۆش بکەت، د وی دەمی دا مروڤ ژ خۆ دویر دکەڤیت و هەست ب وەستیانێ و نە ئاراميیا دەروونی دکەت.
بۆ نموونە، کچەکێ دڤێت ب شێوەیەکێ سادە بژیت و ب ئارامی بخويينیت، بەلێ هەمی دەما دترسیت خەلک دەربارەی وى چ بێژن یان ژی کوڕەکی دڤێت کارەکێ نوی دەست پێ بکەت، بەلێ بەرێ خۆ ددەتە ئاخفتنێن خەلکی و ژ ترسا شکه‌ستنێ ئارمانجا خۆ دهێلیت. ئەڤ نموونە نیشان ددەن کو ترسا بۆچونێن کەسێن دی دشێت ببیتە بەربەستەک د پێشکەفتنا مرۆڤی دا.
لێ یا گرنگە مرۆڤ بزانیت کو ڕێزگرتنا خەلکی ڕەفتارەکا جوانە، بەلێ نەبیتە ئەگەر ئەم ئاراميیا دەرونێ خۆ ژ دەست بدەین. پێدڤییە ئەم گوهدارییا بۆچوونێن کەسانێن دی ژی بکەین بەلێ د هەمان دەم دا، ژیانا خۆ ل سەر بنەمایێ بۆچوونا هەر کەسەکێ ئاڤا نەکەین. مرۆڤ دڤێت خۆ بنیاسیت، بەهایێن خۆ بپارێزیت و ب هۆشیاری بڕیاران بدەت.
ژ بەر ڤێ چەندێ، ئارامییا دەروونی بەشەکێ گرنگە و نابیت بۆ ڕازیبوونا کەسێن دی تێک بدەین. ڕاستە مروڤێن ناڤا چڤاکی بۆچوونێن خۆ هەنە، بەلێ هەر کەسەکی ماف هەیە ژیانا خۆ ب شێوەیەکێ دروست و ئارام ئاڤا بکەت، چونکی ئەگەر مرۆڤ هەمی ژیانا خۆ بۆ ڕازیبوونا خەڵکی ته‌رخان بكه‌ت، دبیت ژیانا خۆ ژبیر بکەت. ژیانا خۆ بەر ب ئاراستەیەکێ نەدیار ببەت. سەرکەفتنا دروست؛ ئەوە کو مرۆڤ خۆ بنیاسیت و ڕێزێ ل خۆ بگریت و بێێی ترسا ژ ئاخفتنێن خەڵکی، ب شێوەیەکێ باش و بەرپرسیارانه ژیانا خۆ ببه‌ته سه‌ر وه‌كى ئه‌و هه‌یى بژیت.
