د جڤاکێ مە دا، دیاردەکا نەخۆش هەیە ب ناڤێ “لۆمەکرن”. ئەڤ دیاردە ب بێدەنگی و هێدی هێدی دچیتە د ناڤ پەیوەندیێن مە یێن ڕۆژانە دا و گیانێ ڕێزگرتنێ و نێزیکبوونێ دکوژیت. مخابن، لۆمەکرن بوویە ڕەفتارەکا بەردەوام بۆ گۆتن و ڕەخنەگرتنێ ل سەر گەلەک تشتا: ژ شێوازێ ئاخفتنێ و ئاخفتنا دروست یان شاش، جۆرێ جلک و بەرگان، ڕێڤەچوونێ، هەتا دگەهیتە هەلبژارتن و بڕیارێن تایبەت یێن ژیانێ.
چ مفا د ڤێ ڕەفتارێ دا هەیە؟ د ڕاستی دا، چ مفا تێدا نینە! لۆمەکرن ب تنێ سەدەمێ دلگرانکرنێ، دوورکەفتنا مرۆڤان ژ ئێک و دروستکرنا جۆرەکێ نەئارامییێ یە د ناڤبەرا مە دا. دەمێ کەسەک بەردەوام د بن گرانییا لۆمەیێن خەلکی دا بیت، ئازادیا هەلبژارتنێ و ئارامیا دەروونی ژ دەست دددەت. ل جهێ هندێ کو جڤاک ببيتە جهەک بۆ ئاڤاکرن و پشتەڤانیکرنا ئێکودو، دبیتە دادگەهەکا نەدیار کو هەمی بەردەوام تێدا خەلکی دادوەر دکەن و سزایێن دەروونی ل سەر ئێک د دەن.
ئەڤ لۆمەکرنا بەردەوام، شیانێن کەسایەتی دکوژیت و شیانێن داهێنانێ د ناڤ گەنجان دا بێهێز دکەت. گەلەک کەس ژ ترسا گۆتنا خەلکی و لۆمەیێن جڤاکی، دەست ژ خەونێن خۆ بەرددەن و نەوێرن پێنگاڤێن نوو ب هاڤێژن. مرۆڤ نەچێتە د ناڤ چ قۆناغەکا نوو یا ژیانێ دا، بێی کو بەرامبەری لۆمە و گۆتنێن دەورۆبەرێن خۆ ببیت. ئەڤەژی وەک ژەهرەکا ڤەشارتی یە کو شارەزا و شیانێن مە هەمییان بێهێز دکەت و بەرهەمداریێ کێم دکەت.
ل جهێ هندێ کو ئەم هەمی نیشانا تبلێن خۆ ب دەینە کێماسیێن ئێکودو، دەم هات بگەهینە وێ باوەریێ کو جیاوازی جوانیا ژیانێ یە. ڕێزگرتن ل ئازادیا تاکەکەسی د هەمی بواران دا، نیشانا پێگەهشتن و ڕوشەنبیریا جڤاکی یە. بلا ل جهێ لۆمەیێ و شکاندنا دلان، پەیڤێن پڕ ژ هیڤی و پشتەڤانیێ ل سەر لێڤێن مە بن؛ چونکە لۆمەکرن چ جاران نەبوویە ڕێکا دروستکرن و چاکسازیێ، بەلکو ب تنێ دیوارێن دوورکەفتنێ بلنتر دکەت.
وەرەن دا هەمی پێکڤە ڤێ دەستکاریێ ژ خۆ دەستپێبکەین و دەستێ ئێک بگرین بۆ ئاڤاکرنا نەریتەکێ پر ژ ڕێز و خەمخۆریێ. بتنێ ب ڤێ چەندێ دێ شێین جڤاکەکێ ساخلەم و هزرڤەکری ئاڤا بکەین کو تێدا ئازادیا تاکى دهێتە پاراستن و بەهرەمەند دبنە خودان هێز و هەلوێست.
