ئەگەر ئەم ژ کوژییەکێ سیاسی و دیرۆکی ڤە ل ئاخڤتنێن ئێڤارا ٢٤ێ حوزەیرانا ٢٠٢٦ێ یێن شاسوار عەبدولواحیدێ سەرۆکێ حزبا نەوەی نوێ بنێڕین، دێ بۆ مە دیار بیت کو ئەو هزرێن گەنی یێن وی گۆتین نە ب تنێ جهێ گومانێ و ڕەخنێ نە، بەلکو د ئاستێ جەماوەری و بەها و نیشتمانی ژی دا، دچنە د خانەیا وان – گۆتنێن بێ مەعنا و نەواقیعی- کو دیرۆکا سیاسی یا کوردستانێ ب درێژاهییا پێڤاژوویا خۆ، چەندین نموونەیێن ب ڤی ڕەنگی ب خۆڤە دیتینە و دەرئەنجام هەمی وەک دلۆپێن ئاڤێ ل سەر کەڤرێ خۆڕاگر و ب هێزێ نیشتمانی، ژ بەر هەتاڤا راستیێ، زوها و هشک بووینە.
ب دیتنا من یا کەسوکی، دڤێت ئیرادەیا جەماوەرێ کوردستانێ، ب هەمی لایەن و حزب و ئایدۆلۆجیا ڤە، ب چەپەرەکێ موکوم یێ نیشتمانی ل هەمبەر پەیڤێن ئەڤی پۆپۆلیستی راوەستن چونکی چەوا وێرەکیێ ددەتە خۆ و بەحسی نەمان و هەلوشاندنا هەرێما کوردستانی د کەت! هەرێما کوردستانێ کو ب خەبات و خوینا هزاران شەهیدان و قوربانیدانێن مەزن و ب رۆندکێن دایک و خووشکان ئاڤابووی! لەوڕا پێدڤییە جەماوەرێ کوردستانێ ب هەمی پێکهاتێن خۆ ڤە، ب خۆپێشاندانێن بەرفرەهـ یێن نەرازیبوون و ماندەلکرن و و ریسواکرنێ راببن و سکالایان بۆ داواکارێ گشتی بلند بکەن و داخوازا دادگەهکرنا ڤی سنێلەیێ سیاسەتێ بکەن.
دیسان داخوازکرنا پۆستێ سەرۆک وەزیرێن هەرێما کوردستانێ بۆ هەڤپەیمانییەکێ کو نەخشەیێ وێ د زیندانێ دا هاتییە کێشان، ب دیتنا من، نە یا واقیعییە و گەلەک یا دوورە ژ بنەمایێن دیموکراتی و هەلبژاردنان و نەزانینە ب ئەلفوبایێن دەولەتداریێ و سڤکاتیکرنە ب هشیارییا سیاسی و ئیرادەیا گەلێ کوردستانێ. حوکمڕانی و رێڤەبرنا وەلاتی رێزگرتنە ژ دیموکراسیەت و یاسایێ، نەک دابەشکرنا پۆستانە ل سەر مێزەیێن زیندانێ و نیفاق و دوروییاتییا سیاسی. ئەوێ ڤێ داخوازێ ل بن چەترا بەرژەوەندیێن تەنگ دکەت، رەنگە نەزانیت یان باش دزانیت و خۆ ل گێلیێ ددەت کو پارتی دیموکراتی کوردستان هێزا جەماوەری یا ئیکێ یا بێهڤەڕکە و خودان پڕۆژەیەکێ نیشتیمانی و نەتەوەییە و سەرکێشییا ئەزموونەکا سەرکەفتی یا حوکمڕانیێ ل هەریما کوردستانێ کرییە، لەوڕا ژی خودان رێژەیا بلندترە ژ کورسیێن پەرلەمانی.
خەلکێ مە باش دزانیت کو کاروانێ ئاڤەدانکرنێ ب دەنگەدەنگێ ڤاڕێ و نەشاز مینا دەنگێ شاشوارەکی ناراوەستیت و کا چەوا د گۆتنا ناڤدار دا هاتییە کو “کاروان دبووریت و ….”، ئەڤ هەرێما کو ب خوین، خەبات، دەنگێ مللەتی و ب هەلبژارتنێن شەرعی و دیموکراتی دروستبووی، ب هەوار و گازیێن ڤان جۆرە دەنگان ناهێتە راگرتن و هەژاندن. دڤێت ئەڤ دەنگێن نامۆ کو خۆ د ناڤ کەڤشکێ هزرا خۆ یا تەنگ دا زیندان کری باش بزانن کو هەرێما کوردستانێ دێ مینیت سەربلند ل سەر سەرێ هەر کەسەکێ بزاڤێ بکەت ژ خۆ قەهرەمانەکێ وەهمی ب سیناریۆیێن چێکری دروست بکەت، لەوڕا ئەڤ کەسێن پۆپۆلیست، د چاڤێن جڤاکێ کوردی دا پتر جهێ پێکەنین و پێتڕانکیێ نە نەک کو ببنە بابەتەکێ ژ هەژی هندی بیت، مرۆڤ هزرا خۆ تێدا بکەت.
ئەڤ جورێ ئاخڤتنێن سەرکۆکێ نەوەی نوێ کرین چ تشتەک نینە ژ بلی بلقێن هەوای و پێلێن ئاڤێ یێن خۆ ب کەڤرێن ب هێزێن هەرێما کوردستانێ ددەن و دبنە کەف! هەرێما کوردستانێ پشتگرێدان ب سازیێن خۆ و ئیرادەیا گەلێ مە، دێ ب هێز و موکومییا خۆ یا بەردەوام بیت، ل دەمەکێ کو ئەو کەسێن حەز دکەن مەزناهییەکا درەو ل سەر پەقیشکێن گۆتنان ئاڤا بکەن، ل هەمبەر هشیارییا مللەتێ کوردستانێ و حوکمێ دیرۆکێ، ل نێزیک دێ خۆ بینن شەرمزار و روی رەش.
تێبێنی: ئەڤ بابەتە دەربڕینێ ژ دیتنا من یا کەسۆکی دکەت.
