ما کەنگی شەڕ بدوماهی هاتینە، و ئاشتی و ئارامی هەنە، هندی مە دیتیە شەڕن، و هندی مە گوهلێبوویە هەر شەڕن، و پەڕێن پەرتووکا مێژوویێ ژی ب خوینێ د تەڕن، دوهی شەڕ بوو، و ئەڤرۆ ژی شەڕە و لدیف ڤێ عەقلیەتا سەرکێشیێ دکەت سباهی ژی هەر شەڕە!.
شەڕ ئەو ليکدان و پێکدادنن یێن دولایەن و پتر توندوتیژی دژی هەڤ بکاردئینن و زیانێ ب هەڤدئێخن ب مەرەما بدەستڤەئینانا بەرژەوەندان و خۆ سەپاندنێ و نەچارکرنا یێ دیتر خۆ بچەمینیت و مەرجێن لایەنێ سەرکەفتی ب پەژرینیت. ئەڤە ڕەفتارەکا مروڤییە ل ئاستێ تاک و کوم و کومەلە و قەوارێن سیاسی و دەولەتان دهێتەکرن.
شەڕ ژ کەڤندا هەبوونە، ژبۆ بجهئینانا بەرژەوەند و دەستکەفتیان، و دگەرەوا وێ دا قوربانی ژ هەردوو لا دکەڤن.
مێژوویا مروڤایەتیێ مێژوویا شەڕ و ململانێ بوویە و دگەرەوا وێ دا تاک و کوم و جڤاک و مللەت و دەولەت وێران بووینە و ژ نافچووینە، و ل سەر کەلەخين شکەستیا و وێرانکرنا وەلاتان دەولەت و ئمبراتوریەت ئاڤاکرینە.
شەڕ، ململانێ و پێکدادانێن توندوتیژ و چەکداریێن رێکخستیە دناڤبەرا لایەنێن شەرکەردا، ب ئارمانجا ئيکلاکرنا ململانێ و سەپاندنا ئیرادێ و زالبون ل سەر یێ دیتر ژ بۆ بدەستڤەئینانا دەستکەفتیێن ستراتیژی و ئیدولوژی و ئابوری.
گەلەک جورێن شەڕان هەنە، شەڕێن سەرتاسەری یێن دناڤبەرا دوو دەولەتان و پتر و یين جیهانی و یێن بەرەیی و یێن پارتیزانی و یێن نافخویی و یين خەلکی و یێن بنوینەراتی، و د شەرين چەکداریدا هەمی جورێن چەکی دهێتە بکارئینان، حەتا یێ ژەهراوی و کومکوژ و وەدغەکریێ نێڤدەولەتی، هەروەسا شەڕێن ئابوری و مەدیایی و دەرونی و هەوالگیری ژی هەنە.
شەڕ دهێنە پولینکرن ل سەر دوو پولان، شەڕين ڕەوا و شەڕێن نە ڕەوا.
شەڕێێن ڕەوا، خۆ د شەرێن بەرەڤانیکرنێ و رزگاریخوازیێ و ئازادیخوازیێ و دادپەروەریێ دا دبینە ڤە، کو د ڤی شەڕی دا بەرەیێ مافدار ل هەمبەری بەریێ دژمنکار دراوستیت، و داخوازا مافێن خۆیين رەوا دکەت، و هەمی شەڕێن دی دکەڤنە د خانەیا نە ڕەوایێ دا، چ یين فراوانخوازیێ بن یان یێن خۆ سەپاندنێ بن یان یێن شکاندنا ئیرادا یێ دیتر بن یان یێن بەلاڤکرنا بیرو باوەران بن یان یێن سەرکوتکرنێ بن یان یێن تیرورێ بن یان یێن برسیکرنێ بن. هەروەسا شەڕ هەنە هەردوو لایەن مافدار نینن و دژمنکارن، بەلێ شەڕ نینن هەردوو لایەن د مافداربن.
مخابن لڤی سەردەمێ دبێژنێ عەقلانیەت و زانست و تەکنولوژی و مافێن مروڤان هشتا لوژیکێ شەڕی و پێکدادانێ بۆ بدەستڤەئینانا دەستکەفتیان یێ زالە و گەلەک قوربانی لێدکەڤن.
نهو شەڕەکێ جیهانیێ مەزن ل روژهەلاتا ناڤین رویدەت، جەمسەرێن وێ یێن سەرەکی، ئەمریکا و ئسرائیل ژلایەکی و ئیران ژ لایەکێ دی ڤە یە، بەلێ پتریا دەولەتێن کەنداڤی تێئێخستی نە و باندورا وێ ل سەر هەمی جیهانێ هەیە، ئەڤە شەڕەکێ نەڕەوایە، هەر سێ جەمسەرێن شەڕی چ بەهانە هەبن دمافدار نینن، شەرەکێ هوسا بکەن و جیهانێ و مروڤایەتیێ بکەنە د مەترسیێ دا و بکەنە قوربانی ئارمانجين خۆ یێن نەڕەوا.
ئیسرائیل دبێژیت ئەڤە بۆ مە شەڕەکێ هەبوونێ و مانەڤێ یە، دژمنێن مە یێ خۆ چەکداردکەن و بەرهەڤ دکەن دا کو مە نەهێلن!، ئیرانا ئیسلامی دبيژیت ئەڤە سیاسەتا مەیە دڤيت هەمی مروڤایەتیێ ڤەگەڕینین سەر ڕێکا ڕاست و مەیێ گوتی مرن بۆ ئەمریکا و مرن بۆ ئسرائیلی و مرن بو دەستهەلاتێدارين دەولەتان و شوڕەشا خۆ دهنێرینە دەرڤە!، و ئەمریکا ژی وەکو جەمسەرەکێ جیهانی بەرژەوەندێن خۆ ل هەمی جیهانێ هەنە و سیاسەتا خۆ گورەی بەرژەوەندێن خۆ برێڤە دبەت، و بەرژەوەندێن خۆ ژی پولینکرینە ب یێن ستراتیژی و ژینداری و لاوەکی، و ل سەر وی بنگەهی هەڤپەیمانی دروستکرینە و کاری بۆ دکەت.
ئەمریکا یا بەرهەڤە شەڕی بکەت ل سەر هەر گەفەکێ ل سەر بەرژەوەند و هەڤپەیمانين خۆ یێن ستراتیژی و ژینداری و حەتا یين لاوەکی ژی، و ب دیتنا ئەمریکا ئیران گەفەکا مەترسیدارە ل سەر بەرژەوەندێن وێ یين ستراتیژی و ژینداری ل ئسرائیلی و ل کەنداڤی و ل دەولەتێن کەنداڤی. ئەڤ تيکەلبوونە، ئسرائیل شەڕێ هەبوونێ و پاراستنا کیانێ خۆ دکەت، و ئەمریکا شەڕێ پاراستنا بەرژەوەندێن خۆ دکەت، و ئیران شەرێ فراوانخوازیێ و ژناڤبرنا ئیسرائیلی و لێدانا بەرژەوەندين ئەمریکا دکەت، دڤێ هەڤکێشێ دا هەمی لایەن شەڕکەرن و دمافدار نینن چونکی د دەستپێشخەریا شەڕی دانە و ئەنجام ددەن و زیانێ دگەهینن و ڤێ دکەڤن و خەلکەکێ دی ژی دکەنە قوربانی شەڕێن خۆ!.
دیارە ژی ڤان دەولەتان ژميژە ل بەر بوو شەڕەکێ هوسا هەلێخن، ئەڤ چەکدارکرنە و کومڤەکرنا ڤان جورە موشەک و روکيت و فروکە و تەکنولوژیا شەڕی بۆ پەقینەکا هوسا بوویە.
شەڕ وێرانکرنە، و رکاتی ل سەر قەپخازیێێن بي بنەما مالخراپکرنە، ئەگەر بریار بدەستێن ڤان دەولەتێن شەڕکەر ژیرێ و وژدانێ بکاربینن و مروڤدوستبن دێ خۆ ژ شەڕان و پێکدادانێ دەنە پاش، و دێ ب رێکێن دیبلوماسی و ب دانوستاندنا ل چارەسەریێن ئاشتیێ گەڕن و ناهيلن ئالوزی چێبن و ئاستەنگ بکەڤنە د رێکاندا. و هەکە ئیرادا چارەسەریا ئاشتیانە هەبیت، هەمی کێشە و گرفت دهينە چارەسەرکرن.
هەريما کوردستانێ ژی ئێک ژ قوربانیێن ڤی شەڕی یە، و دکەڤیتە بەر دەستدرێژیێن لایەنەکێ شەڕکەر کو ئیرانە و راستەوخۆ یان برێکا نوینەرێن وێ دکەڤیتە بەر حنگێن لێدانێ و زیانێن مەزن ڤێ دکەڤن!.
دیارە داگیرکەرين کوردستانێ کو ژ نەتەوەیێن دراوسين کوردستانێ نە و هەڤئاینن ئاشتی و برایەتی دگەل کوردستانێ نەڤیایە، و سیاسەتا تەپەسەرکرن و سەرکوتکرنێ دژی کوردستاني بکاردئینن، و د بەرهەڤنینن دانپێدانێ ب مافێن نەتەوەیێن کوردستانێ بدەن، ژ بەر هندێ کوردستانی دبەرخۆدان و خەباتا رزگاریخوازیێ و بەرەڤانیکرنێ ژ مافين خۆ یێن رەوا دا بوویە، و لاڤا دکەت داگیرکەر بکەڤنە د شەڕ و ئالوزیاندا دا لاواز ببن و دەرفەت چێببیت مافێن خۆ بدەست ڤە بینن، هەکو کورد دبێژن بەلکی شولا مە دناف شولاندا چێبیت!.
هەرێما کوردستانێ ژ ئەنجامێ خەبات و بەرخۆدانا کوردستانێ، دناف گيلەشوکا شەڕێ عیراقي و هەڤپەیمانا نێڤدەولەتی چيبوو، و ل روژئاڤیێ کوردستانێ ژی کیانەکێ کوردی ژ ئەنجامێ شەڕێ نافخویی ل سوریا و تێکەلبوونا دەولەتێن زلهێز د وی شەڕیدا چيبوو، ب هیڤینە ل روژهەلاتا کوردستانێ ژی هەبوونەکا نەتەوەیا کوردستانێ ژ ڤی شەرێ جیهانێ سەرهلدەت و چيبیت. و چاڤەرێینە ل باکور ژی تشتەکێ وەسا چێبیت!.
کوردستان بێی کو تاگیر و مایتێکەر بیت یا دنیڤا ڤی ئاگری دا و پەلوخێن ڤێ دکەڤن، سەر هندێ را شیایە خۆ پارێزیت و مایتێکرنێ د بەرژەوەندا چ لایەنەکی دا نەکەت، و ئەوا باشە حەتا نوکە کوردستان بینەرە و تاگیر نینە و بەرژەوەندا کوردستانێ ل بەرچاڤ گرتیە.
پەیامين سەرکردایەتیا کوردستانێ و بتایبەتی یێن سەروک بارزانی د ئارامکەرن و ب هیڤینە و لوێ باوەرينە بڤێ سیاسەتێ دێ بەرەیێن شەرخواز و شەڕکەر شکەستنێ ئینن و کوردستان دێ ب مافێن خۆ شاد بیت.
